Hunongahu hata jabujaju jata Jesus
14
Nagam ŋañunuwe kukaku kugaba ma kâlundaayaku kûriiŋ kaaneyim Paaskuwa di kata kûmburuwaaku kaakutum phermentu yahaanay yata bumaaŋenaabu bata Emitay, di bulhikitenaabu bata kûboñaku kata Emitay, ya kupaam maama mbi kuga ma kusoh Jesus kubuj an bâmirut. 2 Be di kêenul: “Mumulet bi ugawaa'mo di hukahu hata kâlundaayaku, ka mbi êsukay ega ute bûgagaroorabu.”Añakanaw nâyu muheeñamu di hûkuwahu hata Jesus
3 Ban na kugam koku di êsukay yaaneyim Betaaniya ma kuriyem di eluupay yata Simoŋ âjuutemmi kâjuutaku kata êtoogoonay. Anñaakan aahu nâkayil di jîrungaju jateepumim miñamu maaneyim alabastru, jo ma jimemmi muheeñamu maseerum noon maaneyim nardu. Na ârintom, nawap jo ma âyu muheeña'umu di hûkuwahu hata Jesus. 4 Be bukan kaaku kaleehotom di mulaañiil, ña ya kulob ma ya kêenul: “Kama mata wa nakajen mo? 5 Muheeña'umu meeeliyene munoomi, di ebaj bancaamabu bahammi sîteemeer sîhaaji (300) sata praata, ban nuwulaa'bo kûsukateenaku.” Ña ya kucecenool. 6 Be Jesus naaniil: “Jiwalhoo'bo! Mata wa ma jîlaamenumem d'oo? Maama agawommi, mujake noon. 7 Mata miwuul mbi jilako ute di kûsukateenaku be niŋanu, moo hukahu ha jîkimmi, jeeliye jicookooriil, be înje, eetubi ilako ute di miwuul be nanoonan. 8 Be añakanaw ume, miñamu maamom ma mbi agaween, mo ma agawommi. Mata nâsaasaaliyom ban muheeñamu be huhokahu hûmbaam. 9 Malhegen ma ilobuul eenuul: Di âmbasuk peh ta elobay yâsuumaay mbi elobi, miña'ume poop ma añakanaw ume agam mbi mulobi to, ma mbi ya awolhuwi.”
Judas nanoom Jesus
10 Ban Judas Iskariyotis aamom ata di kurebooraaku kunŋen di egabaay kata Jesus, nakay ki kûtabulhenoorul di yahaanay yata bumaaŋenaabu bata Emitay, ma mbi awuliil Jesus. 11 Ña na kutallhenoom ban, di kûririgen d'oo noon, ña di keenool mbi kuwulool bancaamabu. Ña Judas ya apaam tiŋatu târiitom ta mbi awulumiiwool.
Huriyahu hata kâlundaayaku kata Paaskuwa
12 Ban, haahu di hukahu hûtiyaarahu hata kâlundaayaku kata kûmburuwaaku kabajutum phermentu, naamom na jûdewwi kuŋaalem mûgaraniinaamu mata Paaskuwa, kurebooraaku kata Jesus di kurinkool keenool: “Ûtey nûkimmi ta mbi ûli ukay ki ubandoor ma mbi uriyaal Paaskuwa?” 13 Ña naboñ kurebooraaku katawool egaba ma aaniil: “Jikay be di hânkijahu hata êsukay, na mbi jîriiŋ dô mbi jipaam di âynaaw apeenowlom elompay yata mumelamu, 14 di jisoolhenool jîriiŋ, di jeen ata eluupa'uyu, alhikitenaaw naane ooni: Di êwaanaat ûyey mbi ari Paaskuwa di kurebooraaku katawool? 15 Oo mbi âyisuul êwaanaatay yâamak yammi hatiya di etaahay yaakum miñamu peh, dô da nki jibandoor.” 16 Kurebooraaku katawool di kukay be di hânkijahu hata êsukay kûriiŋ, di kutook wahaw peh non ma Jesus alobiim, ña di kubandoor dô be huriyahu hata Paaskuwa.
17 Na jaley agam nalowe, Jesus di kukay di kurebooraaku katawool be dô. 18 Na kugam kokariyem, di kuri ii, Jesus naaniil: “Ma ilobuul malhegen eenuul: An aahu di miwuul ammi ma uriyem dânor, mbi aŋoonom.” 19 Ña kurebooraaku katawool di kuga ñânkiiteni, ban anoowan ya arinkool aanool: “Mante înje pîya?” 20 Be Jesus naaniil: “Malhegen aahu ata di miwuul kaŋ, ommi ma ûjupem dânor di jiboolaju. 21 Malhegen Añool Ajamaat, mbi aket non ma Baŋiicerabu Bâñoyyaabu buloom matawool, be buhiiraabu bâamak mbi busoh anaw a mbi aŋoonool! Haŋ majak poop, ma anaw umu aatuba abajeeni.”
22 Buko baroŋ ma kuriyem, Jesus nasoh hûmburuwaahu ma asal Emitay, ban natii'ho awul kurebooraaku katawool ma aaniil: “Aayuwaal jiri, ûde eniilay yûmbaam.” 23 Ban nasoh joon jikoopaaju ma asal Emitay ban nawulii'jo kujaken poopiil. 24 Ban naaniil: “Ûde hûsimahu hûmbaam, haamom hata yaŋaayay hâyuwim be bata bukan kameeŋe. 25 Malhegen neenuul eetubi ijakenurer joon êbiiña, be kaŋ na mbi ijaken yaayu yunkulay di kâyyaku kata Emitay.”
26 Na kugam kuyeeŋe kañaaŋaku kata jasalaju jata Emitay, ban di kukay di hurimbiliŋahu hata Oliveyra.
Jesus nalob kaan Pedru mbi alatool
27 Ban Jesus naan kurebooraaku katawool: “Miwuul peh mbi jilatom, mata dôdu ma ŋiicim kaan: Mbi ibuj âtekenaaw, be sîgaraniinaasu mbi siwaasoor. 28 Be na mbi îlhaalowul di kuketaaku, mbi iyabuul kayooŋ be Gâlileeya.” 29 Be Pedru naanool: “Palimo kulati peh, be înje eetubi ilati!” 30 Be Jesus naanool: “Ma ilobi malhegen eeni, jaat hukare, bala kalhitaaku kulhit ñeemo ñagaba, mbi ôonul ûmirutom ñeemo ñâhaaji.” 31 Be Pedru ya alob kañakat ma yâanul: “Înje eetubi ilatureri kaŋ kuur, palimo ma uketa tanor.” Kurebooraaku katawool poop kaaku di kuloo'mo.
Jesus nakay be tiŋatu taaneyim Jetsemaani
32 Ban Jesus nakay di kurebooraaku katawool be tiŋatu taaneyim Jetsemaani. Na kûrimmi, naaniil: “Jileeho ute ma înje ikay ki ilhaw Emitay.” 33 Nakay di Pedru, di Tiyaagu, di Joŋ. Ña bûyegetabu batawool di bûgun noon, ña di gawool ñânkiiteni. 34 Ña naaniil: “Hûyoojaahu hammi di êsigiray yûmbaam huhahe noon, poopii hohami hubujom, be jilako ute ma aatuba jînanno.” 35 Ban narees deh, nâtiigen ma aya buulabu batawool di etaam ma alhaw Emitay ma an yo êkin jaa, di ega hûlaama'uhu ma hetuba hulo d'oo. 36 Di kalhawa'uku yâanul: “Ampoom, Ampoom, malhegen nooliye uga miñ peh! Ûcaalhenom jikoopaa'uje jata hûlaamahu, be aatuba uga non ma înje îkimmi, be uga non ma aw ûkimmi.”
37 Ban nâlaañul be ta kurebooraaku katawool êhaajiyaay kemmi, âriiŋ natookiil ma kuŋotum. Ña naan Pedru: “Simoŋ, aw maŋotem? Ooliit uleeho jinŋet baŋotut? 38 Aatuba jînanno, jilhaw Emitay ma aatuba jilo di kabunten; malhegen di ûyegetaw watawuul jîkine jiga mo, be siniilasu satawuul sibajut sembe.”
39 Ban nâcaa'to ma alaañ joon alhaw Emitay non ma alhaweyom. 40 Ban nâlaañul joon âriiŋul, natookiil joon ma kuŋotum, mata kaŋotaku ma kusohiim noon, ña kunamulent maama mbi kulobool.
41 Ban nâlaañul joon hûhaajutahu âriiŋul naaniil: “Miwuul jiroŋ kaŋ ma jiŋotem ma jihepulen! Ña yeje! Mata tîriiŋe ma Añool Ajamaat awuli bûlhapitaabu. 42 Jilhaalo ma ukaayaal, mata anaw a mbi anoomom nahuutulo ban.”
Husohahu hata Jesus
43 Jesus oo baroŋ ma alobem, Judas aamom ata di kurebooraaku katawool kunŋen di egabaay nâriiŋuu'to, ma âreboorul di buyooŋabu bata bukanaku, ka yahaanay yata bumaaŋenaabu bata Emitay, di poop yahaanay yata êsukay kubollom, ma kûsohul ujaasiyaaw, di kûgolaku. 44 Anaw a mbi anoom Jesus, oo ma alobuliim ban maama mbi ga ma mbi kumanjool. Ma aaniil: “Anaw a mbi îpoon, di jeen oomu; di jisohool lit, ma jikay d'oo.”
45 Na Judas ârimmi ta Jesus ammi naanool: “Alhikitenaawe!” Ban nâpoonool. 46 Ña di kusoh Jesus. 47 Aahu ata di kurebooraaku kata Jesus alakotom, nâlhiimulul kajaasiyaaku ma alhib agorooraaw aahu ata annahaanaw âmakaaw ata bumaaŋenaabu bata Emitay, natij kâjaŋayaku. 48 Ña Jesus naaniil: “Kama jîŋarul ujaasiyaaw di kûgolaku be husohahu hûmbaam non an âhoŋe nigawe? 49 Inja ulaal ya ulakuweenaam tanor hukoohuk di Eluupay yata Emitay ma ya ilhikitenuul elobay yata Emitay, an asohutonno. Be ume mugayi, ma mbi ga non ma ŋiicim mûmbaam.”
50 Ña kurebooraaku peh kata Jesus, di kuwaasoor ma kutey. 51 Be ajaajuwaw aahu agaayoorum eleesaay keb ma ya asoolhen Jesus, na kemmi kusohool, 52 nabet eleesaay, ma atey barindiŋ.
Jesus di kugawool batalenabu
53 Ban di kuŋar Jesus be di eluupay yata annahaanaw âmakaaw ata bumaaŋenaabu bata Emitay, ta yahaanay yata bumaaŋenaabu bata Emitay, di yahaanay yaayu yata êsukay, di poop yahaanay yaayu yata bulhikitenaabu bata kûboñaku kata Emitay, kemmi ma kûmeboorum. 54 Pedru ya asoolhen Jesus râagi ii be di ekaakay yata eluupa'uyu yata annahaanaw âmakaaw ata bumaaŋenaabu bata Emitay. Âriiŋ naleeho ta bupooyaabu bemmi kot sambunasu, ma ya kûlhumbo. 55 Yahaanay yata bumaaŋenaabu bata Emitay, di kaasaaku peh kata hulhanahu, ya kupaam bukanaku ka mbi kusoosen Jesus, ma mbi kêeliwum to kubujool, be kubajut. 56 Bukan kameeŋe ya kusoosenool, be baloberabu batayiil bujooŋoorut. 57 Bukaaku di kulhaalo ma ya kusoosenool kêenul: 58 “Ûli nujamool ma ya ammi mbi awap Eluupay yata Emitay yateepumim uŋen ajamaat, ban niteep yaayu yaatumbi eteepumi uŋen ajamaat kukaku kûhaaji.” 59 Be palimo poop ma ya kuloom umu, baloberabu batayiil, bujooŋoorut.
60 Ña annahaanaw âmakaaw ata bumaaŋenaabu bata Emitay, nalhaalo to di êsukay ma arink Jesus aanool: “Kama ma kulobem di ume d'aw, otukalaañeniil?” 61 Be Jesus, alaañentool makeel. Annahaanaw umu âmakaaw narinkool joon aanool: “Kama aw Kristu aamom Añool Emitay a mbi asali?”
62 Jesus naanool: “Aa, înje oo. Be mbi jijuk Añool Ajamaat, ma aleehom di kaŋen kûrir kata Ata Emit ata sembaasu oo ma âkayewuum di kayiiñaku hatiya di emitay.” 63 Ña annahaanaw umu, naruusul bulhiimaabu batawool, ban nâanul: “Kama ay nki mbi urinkaal joon! 64 Inja jijame non ma âgelikoorum Emitay! Ña bu jinongum?” Ña buko kaŋ peh, di kêenul manooman mbi abuji.
65 Ña bukan kaaku ya kucuhenool. Di kûhipen buulabu batawool, ban ya kumabool umiñaw di uraabaw, ban ya kurinkool keenool: “Ûrejoli, anaw amabim?” Bupooyaabu poop bata eluupay, ya kumabool umiñaw di uraabaw.
Pedru nalat Jesus
66 Pedru oo baroŋ ma aleehom ube di etaam di ekaakay, âjuraw aahu ata di bugorooraabu kata annahaanaw âmakaaw ata bumaaŋenaabu bata Emitay, 67 najuk Pedru oo ma âlhumbuwem. Najikerool jak, ban naanool: “Aw poop, miwuul jilakuwemmi tanor di Jesus ata Nasare.” 68 Be Pedru nalat ma âanul: “Înje îmirutool. Inamulent poop miñamu ma ulobem di mo.” Ban nâcaa'to ma akay be di hureesahu hata eluupay, ña kalhitaaku di kulhit. 69 Na agorooraaw umu ajukoom joon, nalaañ aan bukanaku kaleehotom: “Âynaaw ume ata di buko.” 70 Be Pedru nalat joon. Piyowut, bukanaku kalakotom di keenool: “Malhegen aw ata di buko, mata aw poop ata Gâlileeya.”
71 Be Pedru nalat ma ya ânuurikoor ban nâanul: “Inja îmirut âynaaw umu a jilobem d'oo!” 72 Piyowut, kalhitaaku di kulhit joon hugabutahu. Ña Pedru, nawolho non ma Jesus abiim bi alobool aanool: “Bala kalhitaaku kulhit ñeemo ñagaba, mbi ôonul ûmirutom ñeemo ñâhaaji.” Ña Pedru nakaaw ma ya alhooŋooro.