11
Moo, jisoollhen bagawerabu bûmbaam non ma înje isoolhenem bata Kristu.Mata jâhipenooraju
2 Malhegen înje nisaluul, mata di wahaw peh ya jiwolhuwom, mata ma jisoom elobay ya ilhikitenuum. 3 Nîkine ma jinamulen kaan, Kristu oo agam hûkuwahu hata ânniine peh; ânniinaaw poop naga hûkuwahu hata anñaakanaw; Emitay poop di ega hûkuwahu hata Kristu. 4 Moo, ânniine peh ammi ma alhawem di Emitay, be mante añaaŋenem kûboñaku kata yo, nâhipen hûkuwahu hatawool, mbi âŋarul ñipuñaañu be batawool. 5 Anñaakan poop peh, ammi ma alhawem di Emitay, be mante nañaaŋen kûboñaku kata yo, bâhipent hûkuwahu hatawool, mbi âŋarul ñipuñaañu be batawool, mata mbi ga non omu ma alhasom. 6 Moo, anñaakanaw âhipent jaa hûkuwahu hatawool, ña kama alhaso. Be ga jaa pûñuneniye ma anñaakanaw akento, be mante nalhaso, ña kama âhipen hûkuwahu hatawool. 7 Mata jakut ma ânniinaaw âhipen hûkuwahu hatawool, mata oo êmanjumay yata Emitay, di poop majaaŋaamu mata yo; be añakanaw o majaaŋaamu mata êmanjumay yata ânniinaaw. 8 Mata ânniinaaw âwwentumi anñaakanaw, be anñaakanaw di ânniinaaw nâwwenumim. 9 Ânniinaaw poop âwwenti mata anñaakanaw, be anñaakanaw mata ânniinaaw nâwwenumim. 10 Moo, mata poop kumalaakaku, momakiimom ma anñaakanaw mbi âhipenum hûkuwahu hatawool, ma yîs kaan ya ajam di apañoorool.
11 Be di kayooŋ Ata Emit, anñaakanaw nabaje ênjariŋ di ânniinaaw, ânniinaaw poop nabaje ênjariŋ di anñaakanaw. 12 Mata non ma anñaakanaw âwwenumim di ânniinaaw, moomu poop kaŋ ma anñaakanaw abajem ânniinaaw. Be dôo peh di Emitay ukaayumulom.
13 Moo, jinongoor mo ma di ûyegetaw watawuul, mante jake ma anñaakanaw alhaw Emitay bâhipent hûkuwahu hatawool? 14 Mûtuutumaamu poop mûyisolaal kaan, ânniinaaw awuyen jaa, di ga ñipuñaañu be batawool. 15 Be añakanaw abaa'jaa walaw waballhum di jak, mata Emitay ewuloo'wo ma mbi ûhipen hûkuwahu hatawool. 16 Be anaw âkin jaa añoosoor mata eloba'uye, neeliye iñaaŋenool kaan ulaal ûgaworiitaa'mo, palimo grîsiya yata Emitay êgaworiit mo poop.
Huriyahu hata Ata Emit
17 Moo, mata wahaw wa mbi ilobuul mata wo maame, eetubi isaluul, mata kâmebooraku katawuul, ntuwa be bata majake, be be bata majakutaamu. 18 Wahaw wâtiyaaraw, nijame di kaan, na mbi jîmeboor ma jisal Emitay, ya jîgiitoor ma jiga waasaaw. Moo, nîynene di kaan, deeli ga malhegen. 19 Malhegen jake ma jîgiitoor ma jiga waasaaw, ma mbi ooliyaal poop ûmiraal kaaku kammi di malhegenumaayamu. 20 Momakiimom na jîmeboorem tanor, ntuwa Huriyahu hata Ata Emit jiriyem, 21 mata na mbi jeen jiri, bukaaku ya kusing kuri wahaw watayiil; kaaku di kulako to di bacaarabu, kaaku di kûkali. 22 Kama jibajut siluupasu satawuul ma jîriwuu'bo, di jîjakenuu'bo? Be mante jîkine ma jirembeel grîsiya yata Emitay, ma jiga ñipuñaañu bukanaku kabajutum makeel? Wa jîkimmi ilobuul? Mante pîya jîkine isaluul? Iyiy, etukasaluul.
23 Mata wahaw wa iyabulom di Ata Emit, woowu poop wa iñaaŋenuum di kaan, Ata Emit aamom Jesus, hukaru na Judas aŋoonoom, nasoh hûmburuwaahu 24 ma asal Emitay, ban natii'ho ma âanul: “Ûde eniilay yûmbaam yawulim be batawuul; mbi ya jiga ume ma mbi ya jiwolhuwom.” 25 Moomu poop kaŋ manoramu, na kubammi huriyahu, nasoh jikoopaaju, ban nâanul: “Ûde jikoopaaju jata yaŋaayay yunkulay yagawumim hûsimahu hûmbaam. Moo, hukoohuk na mbi jiga ume, di jiwolho eketay yûmbaam be na mbi îlaañul.” 26 Momakiimom, nanoonan na jitokommi hûmbuuruwaa'uhe, di jisiben di jikoopaa'uje, di jiñaaŋen mata eketay yata Ata Emit, be na mbi âlaañul.
27 Moo, anaw atonkoñ jaa hûmburuwaahu hata Ata Emit, be mante nasiben di jikoopaaju jatawool, di hunongahu hajakutaahu, natile di eniilay, di poop hûsimahu hata Ata Emit. 28 Momakiimom anoowan ata di miwuul, jake ma alasuwooro para, ban nkit natokoñ hûmburuwaahu, nasiben poop di jikoopaaju, 29 mata atokoñ jaa hûmburuwaahu, nasiben poop di jikoopaaju banamulent mata eniilay yata Ata Emit, mbi atokoñ, nasiben be bata hûjimenahu hatawool. 30 Momakiimom kameeŋe kata di miwuul keekut ban sembe, kaaku kûjuut, poopii kaaku kukete ban. 31 Moo, ulasuwooruwaa'jaa kâtiyaar, Ata Emit atukaga an batalen. 32 Be na mbi Ata Emit agawolaal batalenabu, oo acolenem d'ulaal ma aatuba mbi alesolaal di manor di kata di etaama'uye.