Kûcecenaku kata mata ûkiinaw
10
Kutiyaay, nîkine ma jiwolho wahaw wagam noo simpawolaal, non ma kupooyumim kawiiñaku kânaageniim, di poop non ma buko peh kûtipum Hulhuwahu Hâyemaahu, 2 ma buko peh ya kusoolhemmi Moyses, ña di kûbatiisi di kayiiña'uku, di poop hulhuwa'uhu. 3 Ban poop buku peh di kuri wahaw wanoraw wâcaalhumulom di Emitay, 4 di kusiben poop mumelamu manoramu mâcaalhumulodom. Mata mumelamu ma kusibemmi, mata di huwaaliisahu hata Emitay ha ya hareboorum di buko. Huwaaliisa'uhu Kristu. 5 Be noo, Emitay êririgent di bukan kameeŋe kata di buko. Momakiimom ma kûketummi, ma sihuluŋaayasu satayiil siwaasoor bo di ekinkay.6 Moo, wahaw uwu wagam, ugawi ma mbi uga kûcecenaku be batoolaal, ma aatuba mbi ujukaal wahaw wajakutaaw nûkinaa'wo non buko. 7 Aatuba mbi jikay poop keenaayaku di ûkiinaw non ma kaaku kata di buko kugam; mata mo ma ŋiicim kaan: “Êsukay di kuleeho no ma ya kuri, di kujaken, ban di kulhaalo ma kûraar.” 8 Moo, aatuba ukaayaal kâmoora non ma bukaaku kata di buko kugam, ña bukanaku kârimmi sînjunnaasu anabawo di sîhaaji (23.000), di kulo ma kuket di hukahu hanorahu. 9 Aatuba ulasuwaal Ata Emit, non ma bukaaku kata di buko kugam, silunasu di sirumiil ma kuket. 10 Aatuba jîŋuŋunoor poop non ma bukan kaaka kata di buko kugam, amalaakaw ata eketay nabujiil.
11 Moo, wahaw uwu peh uga mo di buko ma uga êmanjumay, ma mbi uŋiici be batoolaal jaamaam di hûbanumahu hata kukaku kata etaamay, ma mbi ujukaal nuwollhuwaal.
12 Moo, anaw anongum kaan omu ma ajummi jak, najaamo ka mbi alo! 13 Mata kabunten peh kârillom di miwuul, koku poop kaŋ kanoraku kalowem di ajamaat. Be Emitay ma egam yâynenaayay, eetubi ewaa'bo ma kabuntenaku kahaŋuum sembe kulo di miwuul. Mata na mbi kûriiŋul, yoo mbi ewuluul sembaasu ma jijuum be na mbi jihaat ko.
Keenaayaku kata kumalaku
14 Moo, kutiyom ka iboolaatum, jitey keenaayaku kata ûkiinaw. 15 Malhegen înje malobem di miwuul, mata miwuul bukanaku kanamulemmi, moo jeeliye jinongoor mata wahaw wa ilobem di miwuul. 16 Kama jikoopaaju dâ usibenaalem santaseya, ja oonumaalem Emitay jêrejep, ntuwa na mbi ûsibenaa'dô, nôomiyaal di hûsimahu hata Kristu? Ban poop na mbi utijaal hûmburuwaahu ma utokoñaal, ntuwa nôomiyaale poop di eniilay yatawool? 17 Mata hûmburuwaahu hoo hanor, ban ulaal numeeŋaal; be ulaal peh utokoñaahom, mata ulaal eniilay yanoray.
18 Jinongoor ma mata bukanaku kata Israyel. Kama bukanaku kagoroorem di Altar, ntuwa buko kutokoñem wahaw wâbujeyidom? 19 Moo, wa nîkimmi ilobuul? Soŋo pîya neene ûkiinaw, di poop wahaw wawaasenumim, ujake makeel? 20 Iyiy! Wahaw wa îkimmi ilobuul, neene wahaw wa bukanaku kâmirutum Emitay kûwaasenummi di ûkiinaw, wahaw uwu ugawi be bata kumalaku, ntuwa be bata Emitay. Moo, îkint ma jêemi di kumalaku. 21 Mata mumulet bi jisiben di jikoopaaju jata Ata Emit, ban di jisiben joon di jata kumalaku; jeeliit poop jiri di wahaw wata Ata Emit, ban di jiri joon di waawu wata kumalaku. 22 Be pîya, ma mbi ugawaal Ata Emit abirik? Kama pîya, jîkine jêenul nuhaŋaalool mabaj sembe?
Wahaw wa âynenaaw aalim aga
23 Bukan kaaku ya kêenul: “Nooliyaale ugawaal wah peh.” Be ntuwa wah peh ujakum. Malhegen nooliyaale ugawaal wah peh, be ntuwa woo peh weelim ujuumen kâynenaku kata bukanaku. 24 Mata jakut ma an aga wahaw wajakum be batawool keb, be mbi ya ugawaal wahaw wajakum be bata bukan kaaku.
25 Moo, jeeliye jiri wahaw peh wanoomim di husiilaayahu barinkut baaba ûcaalhumulom, ka mbi bûyegetabu bata an bugawool anong makeel; 26 mata Ata Emit akiim etaamay, di poop wahaw peh wândom.
27 Momakiimom, anaw agawutum âynenaaw, âwooluul jaa be huriyahu, jîkin jaa di jikay; be na mbi jîriiŋ, di jiri barinkut makeel, ka mbi bûyegetabu bata an bugawool anong makeel. 28 Be anaw aani jaa: “Wahaw uwe, wata heenaayahu” ña aatuba uri wo, mata bûyegetabu bata anaw umu alobimom. 29 Be eenut mata bûyegetabu batayi, be mata bûyegetabu bata an aahu.
Moo, an aahu naaliye arink âanul: “Mata wa ma wahaw wa îkimmi iga, êtukawaayen ma iga wo, mata bûyegetabu bata an aahu? 30 Kama een jaa Emitay jêrejep mata wahaw wa mbi iri, mata wa ma anaw aahu mbi awatatenom mata wahaw uwu wa eenyom ban jêrejep?”
31 Moo, jake na mbi jiri wah wakeel, be mante di jisiben wah, be mante poop di jiga wah wakeel, jiga wo ma Emitay mbi esali. 32 Moo, jiga wahaw wajakum waatumbi uga bukanaku kagam jûdew, di bukaaku kagawutum jûdew, palimo poop grîsiya yata Emitay, ma elo. 33 Mata înje poop, ya iga wahaw wa mbi weenen bukanaku peh, îpaamoriit wahaw wajakum keb be bata înje, be wajakum be bata bukanaku peh, ma mbi keeli kupak.