Pawlu nalob kaan oo âmakaaw ata Jesus
9
Ña ma irinkuul: Kama înje eeliit iga wahaw wa îkimmi? Kama înje igawut amakaaw ata Jesus? Kama ijukut Jesus, agam Ata Emit atoolaal? Kama ntuwa miwuul jigam bugoroorabu bûmbaam ba igam be bata Ata Emit atoolaal? 2 Be palimo înje igawut amaka ata Jesus be bata bukan kaaku, be be batawuul nigawool; mata miwuul jigam êmanjumay yâyisum kaan nigawe âmakaaw ata Ata Emit, mata miwuul bukanaku katawool.3 Moo, hurimahu hûmbaam hoohe be bata bukanaku kawatatenewommi: 4 Kama ûli ujoonut ma kûwuloli wah uri mata bugoroorabu ba ommi di bo? 5 Kama ûli ooliit poop ureboor di yaaraay kagam bûynenaabu kagam kûpañooroli ûli bakayer êsuk, non ma kumakaaku kaaku kugawem kaamom kutiy Ata Emit, di poop Pedru? 6 Soŋo kama înje Pawlu, di Barnabe keb oolim ugoroor ma mbi ubaj wahaw wata huriyahu? 7 Kama ay aalim alako di huselloorowutaahu, ban ya ancaamooro? Kama ay aalim aga ewoortaay yata muriyaayamu, ban aatukari muriyaayamu mata dô? Ay âtekenem sibaasu, ban atukaŋar miilhamu mata so?
8 Soŋo iloo'mo elob ajamaat keb? Kama kûboñaku kata Emitay kulobut mo poop? 9 Mata di kûboñaku Kapiyaaku moo ŋiicim kaan: “Aatuba ukumb butumabu bata hûmuunaahu hammi ma huyokosem di emaanaay.” Soŋo Emitay hûmuunaahu keb enongoorum mata ho? 10 Kama di eloba'uyu ntuwa matoolaal Emitay êlobumom? Malhegen matoolaal muŋiicumim, mata anaw awammi, koo di aahu ayokosem trîigu, ya kugoroor di kâynenaku kaan mbi kuyab di wahaw wajalim. 11 Moo, ûli ugiiten jaa wahaw wata Emitay di tutaru tatawuul, ña jakut ma uyab wah wata bugal di miwuul wata ube di etaamay? 12 Kama bukan kaaku kujoon jaa ma kuyab di wahaw watawuul, ña ûli uhaŋut majoon ma uyab di wo? Be ûli uyabut makeel matawuul ma ujoonum uyabeen, be numunten ka mbi uminden elobay yâsuumaay yata Kristu.
13 Kama jîmirut kaan bukanaku kagoroorem di Eluupay yata Emitay, ya kuri opherta yata dô? Kaaku poop kagoroorem di Altar yata di Eluupay yata Emitay, ya kuyab karebaku katayiil kata eluway yata uncaamaw wâbujeyidom. 14 Moomu poop kaŋ ma Ata Emit aloom kaan, bukanaku kañaaŋenem elobay yâsuumaay yatawool, mbi ya kûkuumenumi di yo.
15 Be înje iyabut bugal bakeel ba ijommi di bo, ban poop ntuwa momakiimom nîŋiicumul kayta'uke be baabu di miwuul ma mbi jigawom mo, mata haŋ majak ma iket; ka mbi an akeel agawom ma maama eelim îsaloorowum mukaaño. 16 Momakiimom na iñaaŋenem elobay yâsuumaay îsalooruworiit, mata ûdu bugoroorabu bûmbaam ba mbi iga. Moo, niñakiitooruwe înje bañaaŋenent elobay yâsuumaay! 17 Mata gaween jaa non bugoroora'ube ya iga bo di hunongahu hûmbaam non ma îkimmi, mbi ya incaameeni; be magam Emitay eboñommi ma iga bo, momakiimom ma bûgawummi bugoroorabu ba ijommi iga. 18 Moo, ña bugalabu bûmbaam bôobey? Sûumom noon ma iñaaŋen elobay yâsuumaay balobut mata bugal, bayabut poop wah wakeel wa ijommi iyabeen mata ma iñaaŋeneyom.
19 Malhegen înje anaw ammi ma âwaayemmi, igawut amiikeel ata an akeel, be nigawooro amiikeelaw ata êsukay peh, ma mbi eeli ihaŋ mabaj bukanaku lhay kagam bûynenaabu. 20 Momakiimom na mbi igoroor di tutaru tata jûdewwi, ña niga non buko, ma mbi eeli iŋalliil be baabu Kristu. Palimo ma îgaworiitum non ma kaaku kasoom kûboñaku kata Emitay kugawem, be na mbi igoroor di tutaru tatayiil, niga non buko ma mbi eeli iŋalliil be baabu Kristu. 21 Moomu poop kaŋ na mbi ilako di tutaru tata bukanaku kâmirutum kûboñaku kata Emitay, ña niga non an âmirutukom, ma mbi eeli iŋalliil be baabu Kristu. Be ntuwa îmirut kûboñaku kata Emitay, mata înje omu di kûboñaku kata Kristu. 22 Nîriiŋ poop di bukanaku ka kâynenaku katayiil kankutum, niga poop non an a kâynenaku katawool kankutum, ma mbi eeli iŋalliil be baabu Kristu. Momakiimom ya iga bagawer peh di tutaru tata bukan peh, ma mbi eeli ibaj buruŋ ma ipaken bukan kaaku. 23 Moo, ya iga ume peh, mata elobay yâsuumaay, ma mbi eeli êemi di yo.
Âkuujaaw ata Kristu
24 Miwuul jîmire kaan, di eteyay yata asingasinga, bukanaku peh ya kutey, be an anor keb ahaatem ma ayab bugalabu. Moo, jitey poop di sembe ma mbi jeeli jiyab bugalabu. 25 Mata an peh agam âkuujaaw, ya amunten ma eniilay yatawool êlaam, ma mbi aali ahaat kâkuujaku, nayab bugalabu bata ênkuuhaay yata bûgaalabu yaatumbi epiyo. Be ulaal mapaamaalem di bugalabu bata sînkuuhaasu saatumbi sikaañowurer. 26 Momakiimom ma înje iteyumem, nicoohen ma nki îriiŋ di huŋiicahu. Niga poop non ânagulooraaw ata sisuukuwa, a sisuukuwaasu satawool sicoohenem. 27 Mata ya iga eniilay yûmbaam ma êlaam, ma eeli iga yo ejam d'înje, ma mbi iñaaŋen bukanaku elobay yata Emitay, ban eetuba mbi iga anaw alom.