KAYTAKU KA PAWLU AŊIICUM BE BATA GRÎSIYA YATA
ROOMA
Hûcukumahu hata êliibra'uye
Pawlu aŋiicum Kayta'uke na ujaañaw ûrimmi kîyyaku kugaba di kunŋen di hutok di ugaba (57), be mante na ûrimmi kîyyaku egaba di kunŋen di hutok di ûhaaji (58), be bata êgrisiyaay yata Rooma yaalim ega nata pentekosti êcukum (Bag 2:10). Mata Pawlu âmusut akay bo, be nâkin ma akay ki ajukiil, ban nahul be Espaaña. Na agam oo boo di êsukay yata Kôrintu, oo ma alaañumulom bûkayabu bûhaajutabu bata jañaaŋenaju jata elobay yata Emitay, oo ma abandoorum ma alaañ be Jerusaleŋ, ña naboñ kayta'uke añakanaw agam âynenaaw aaneyim Phebe ata Senkreya di huyaahu hata Kôrintu (Rom 15:22—16:2). Be na Pawlu agam nâriiŋe Jerusaleŋ di kusohool ma kukullhool. Be nagam ujaañaw ûhaaji uhule, nkit nâriim Rooma koo baroŋ ma kusohoom.
Moo, kayta'uke naanu ya keeni Hujuumenumahu hata Kristiyaniismu. Mata nownu sîgrisiyaasu lhay soo di silobasu, mata jûdewwi kaaku ya kûkin ma bûynenaabu bata di siheet saasu peh kagawutum jûdew kuga non ma kûboñaku Kapiyaaku kuloom. Sitaŋa'usu bûynenaabu bata Rooma koo di êsukay yahammi mabaj sembe sîsukasu peh; Ña Pawlu nâkin ma keeli kunamulen elobay yata Emitay jak, ma kûmir di kaan Emitay ya ega anaw acol kayooŋ di yo hûrim mata kâynenaku katawool. Ban nâyis di kaan jûdewwi, di poop bukanaku kagawtum jûdewwi keeliye kucol kayooŋ di Emitay na mbi kûbajumiñaku katayiil kupasi. Moo, wahaw uwe weeliye ugawi keb na mbi anaw âynen Jesus (kapitulu 1 di 4). Nâyis poop di kaan bûynenaabu ya buyab eroŋay yunkulay di Kristu di kumellh di sembaasu sata kûbajumiñaku, di sata eketay (5—8). Ban di kapitulu 9 di 11 nañaaŋen maama Emitay mbi ega be bata Israyel. Kapitulu poop 12 be kayooŋ, nâyis maama âynenaaw aalim aroŋ, ma âanul anaw âkimmi apaalool ya aga non ma kûboñaku kuloom (Rom 13:8). Di kapitulu 16 nasaap bukanaku lhay, ma aga non anaw ammi Jine akayorutum Lisbuwa be nabaa'bo kupaalool lhay, ña nasaapiil.