Hukahu ha Buynum Bunapaabu buwalowulom
2
Na hukahu hata kâlundaayaku kaaneyim pentekosti hûrimmi, bûynenaabu peh bata Jesus koo ma kûmeboorum tiŋ tanor. 2 Ña to kaŋ wûb, di lhôkumul hûtutut hatiya di emitay non buhentela bâamak bûtekewuum, ma bûriiŋul di bunebej di eluupay da kemmi, ña di elhok kaŋ wûlulul. 3 Ña bukanaku peh kâlakodom, di kujuk miñamu manokoom non ûlelemp wata sambun, ma uwaasoorum ki mûnaagen anoowan ata di buko. 4 Ña buko kaŋ peh di keen kaŋ huc Buynum Bunapaabu, ña ya kulob silob saasu sa bugam ânoowan alob.5 Noo, bukanaku kata di buruŋabu bata jûdewwi kâcaalhumulom di âmbasuk peh, koo dô Jerusaleŋ. 6 Na kugam kujame ma lhoom umu palabab, ña buyooŋabu bata bukanaku di kûkayil ki kûmeboor to. Be na ânoowan ata di buko ya ajammi di elobay yatawool maama kurebooraaku kata Jesus ya kuloom, ña di kujaahali kaŋ noon. 7 Buyooŋa'ubu bata bukanaku mata ma kujaahalim, ña ya kulob kêenul: “Be! Kama bukana'uke kalobem di ume ntuwa Gâlileeya kuwoom? 8 Bu gawe, ma ulaal ujamaaliil ma kulobem di elobay yatoolaal? 9 Ban ulaal jaamaam ute: Kaaku kata êsukay yata Paartiya, kaaku kata Midiyaŋ, kaaku kata Elaŋ, kaaku kata Mesopotaamiya, kaaku kata Jûdeya, kaaku kata Kapadoosiya, kaaku kata Pontu, kaaku kata Aasiya, 10 kaaku kata Phriisiya, kaaku kata Panphiiliya, kaaku kata Ejiptu, di poop kata di bantaabu bata êsukay yata Libiya bakotum êsukay yata Sîreeni, di kaaku kagam emaasooraay yata Rooma 11 kagam jûdewwi, di poop kaaku kasoom buruŋabu bata jûdewwi, di poop kaaku kata di sîsukasu sata Kreeta di Arabiya. Bu gawe ma kulob mata miñamu mâmakaamu ma Emitay egam, ulaal nujamaal di elobay yatoolaal?” 12 Ña buko kaŋ peh di kujaahali noon, poopii kubajut maama mbi kunongoor poop. Ña ya kurinkoor ma kêenul: “Kama way uwe?”
13 Be bukan kaaku ya kurineniil ma ya kêenul: “Bukana'uke koku ma kûkalim.”
Pedru nalob ma añaaŋen bukanaku
14 Be Pedru di kulhaalo koo di kumakaaku kaaku kata Jesus kaamom kunŋenay di an anor, ban nalob ma âŋaaŋulo aaniil: “Miwuul kutiyom jaamom jûdewwi, di poop miwuul peh jammi ma jikimmi ûde Jerusaleŋ, jitallhen ma jijam maama mbi ilob ma inamulenuul. 15 Jijaa, bukana'uke kulet ma kûkalim non ma jilobem di mo, mata ma tirem ute uloomaal para di ewooraay yagasom hutok di sibakiir yata di bûjom. 16 Be miña'ume, mo maamom ma añaaŋenaaw ata elobay yata Emitay aaneyim Jowel aloom mata mo âanul: 17 Ata Emit naane:
‘Di kukaku kâreesewuum mbi îwalenul Buynumabu bûmbaam
ma been huc di ejamaatay peh.
Kuñooluul kîinaaku, di kaaku kaaraaku mbi kuñaaŋen bukanaku elobay yûmbaam;
Mbi îbaahul êsuubañiilay ma îyisiil hunongahu hûmbaam;
Buhallenaabu nigayiil kûmir hunongahu hûmbaam di sîyawutasu.
18 Malhegen, mbi îwalenul Buynumabu bûmbaam
ma iga bo di bugorooraabu bûmbaam kîinaaku, di kaaku kaaraaku,
koo poop di kuka'uku mbi kuñaaŋen bukanaku elobay yûmbaam.
19 Mbi iga bukanaku ma kujuk miñamu mata sembaasu sûmbaam hatiya di emitay;
niga poop ube di etaam, ma bukanaku kujuk sîmanjumasu.
Mbi kujuk hûsimahu, di sambunasu, di poop ekooliitay.
20 Jalay mbi muucen,
hulheeŋahu poop mbi hulaañ hûyem non hûsim; ban nkit hukahu hâmakaahu hata sembaasu sata Ata Emit hûriiŋ
21 Noo, an peh âwoom kañaaŋaku kata Ata Emit,
mbi apak.’ ”
22 Ban Pedru naaniil joon: “Kutiyom, miwuul jata Israyel, jitallhen ma jijam maama mbi ilobuul. Emitay yoo êyisuum kaan Jesus ata Nasare oo anaw a yoo ebollom. Mata di Jesus êgawummi wahaw wâmakaaw, di miñamu mata sembaasu sata yo, di poop sîmanjumasu sa agam ta jemmi. Ban miwuul kaŋ peh jîmiimo. 23 Be Emitay non ma êkimmi ega, di mâmiilankenamu mata yo êbandooraalim ma ega Jesus alo di uŋenaw watawuul. Momakiimom ma jîgawummi bubujaabu batawool, mata ma jiwuloom bûlhapitaabu ma kuriiŋool di êkrusay. 24 Be Emitay di egawool ahaat sembaasu sata eketay, ma elhaalellool di kuketaaku, mata mumulet bi eket ehaatool. 25 Mata David, mo ma aloom mata Jesus âanul:
‘Înje ya ijuk nanoonan Ata Emit,
mata oo ya alako di kaŋenom kûrir ma etuba îkolii.
26 Momakiimom, êsuumaay yoyu di êsigiray yûmbaam;
ban butumabu bûmbaam ya bulob ma isal Emitay;
ban poop eniilay yûmbaam mbi ehepulen mata ma îseekunyom;
27 mata aw Ata Emit ootubi uwaa'bo yâarooray yûmbaam ma elako di kuketaaku;
ootubi uwaa'bo poop eniilay yata anaw atayi Anapaaw ma ekuuñ.
28 Mata aw ugawommi îmir uruŋaw wata eroŋay;
buulabu batayi ya bugawom êsuumaay elako di êsigiray yûmbaam.’ ”
29 Ban Pedru naaniil joon: “Kutiyom, nîkine inamulenuul jak jak mata ampawolaal ahaan aamom David. Ampawolaal umu ahaan nakete ban, ban nahoki; êluŋay yatawool poop yoyu ute di etaamay yatoolaal be jaat. 30 David ma agam añaaŋenaaw ata kûboñaku kata Emitay, nâmire kaan Emitay ebiibiim enuur yêenul di êbajoorumay yatawool mbi anaw abaji, a mbi aleeho di Kâyyaku katawool. 31 David nâmire maama Emitay mbi ega, momakiimom nalob mata jalhaalaaju jata Kristu di kuketaaku, na ammi yâarooray yata Kristu yeetubi ewalhi dô di kuketaaku, eniilay yatawool poop yeetubi ekuuñ.
32 “Jesus ume a ulobem di miwuul, oo ma Emitay elhaalellom di kuketaaku, ûli too peh maame. 33 Malhegen Jesus oo abaam hûpiiraahu ma aŋari aleeho di kaŋen kûrir kata Emitay yaamom ampawool, yaamom yawuloom Buynum Bunapaabu non ma ebiim bi elobool. Moo, miña'ume ma jijamem di mo, di jijuk, Buynum Bunapaabu ba Jesus awalellom. 34 Mata David akayit be hatiya di emitay, be oo humuumool moo naloom âanul: ‘Ata Emit oo ammi Ata Emit ûmbaam: Bila ma uleeho di kaŋenom kûrir, 35 be na mbi iga kûsuumutaaku katayi non kapenk da mbi ujuumen ûkandumaw watayi.’ 36 Moo, jake ma êsukay peh yata Israyel êmir kaan, Jesus a jiriiŋum di êkrusay, oo ma Emitay egam ma aga Ata Emit, di poop Kristu.”
Bukanaku kârimmi sînjunnaasu sîhaaji di kûynen Jesus
37 Be na êsukay ejammi ma Pedru aloom umu, ña di mugoriil noon; ña ya kurink Pedru di poop kumakaaku kaaku kata Jesus ma keeniil: “Kutiyaay, ña ûli bu mbi uga?”
38 Be Pedru nalaañeniil aaniil: “Jiwatatenooro mata kûbajumiñaku katawuul ma anoowan âbatisayi di kañaaŋaku kata Jesus Kristu, ma Emitay epas kûbajumiñaku katawuul, ma mbi jiyab Buynum Bunapaabu. 39 Mata miña'ume mo ma Emitay yemmi mbi êboñul bi ewuluul di kuñooluul, di poop bukan kaaku kammi râagi kaamom ka Ata Emit âwollom.”
40 Ban Pedru na alobiil miñ mameeŋe ma agayiil kûynen, ma ya anamuleniil aaniil: “Jîrangi bukana'uke kalesaaku ma mbi jipak.” 41 Ña bukan kameeŋe di kûynen hurimahu hata Pedru ma kûbatiisi. Huka'uhu bukanaku kâynemmi eloba'uyu ma kubom di kurebooraaku kata Jesus, di kuhuut kâriiŋ sînjunnaasu sîhaaji.
Bagawerabu bata bûynenaabu bûtiyaarabu bata Jesus
42 Ña bûynenaabu peh bata Jesus di kusoh tir ma ya kuga non ma kumakaaku kata Jesus kulhikiteniim, ban di kusohoor non batiyaay, ya kuri tanor, ban poop ya kulhaw Emitay. 43 Be mata ma kumakaaku kata Jesus ya kugam miñ mameeŋe mata sembaasu sata Emitay, di poop sîmanjum sameeŋe, ña ânoowan ajuum nâjanaŋen. 44 Be bukanaku peh kâynemmi Jesus, ya kulako tanor, ban ya kubom miñamu matayiil peh tanor; 45 ya kuŋar kankaku katayiil, di poop miñ maamu matayiil kunoom, ban di kûgiitoor bancaamabu ma kuga anoowan naŋar baaba mbi buyejool. 46 Hukoohuk ya kûmeboor di ekaakay yata Eluupay yata Emitay di hunong hanor. Di siluupasu satayiil poop, ya kuri tanor di êsuumaay yarem kaŋ noon di ûyegetaw wasetum. 47 Ya kusal Emitay, êsukay poop peh ya êririgen di buko. Ña Ata Emit hukoohuk ya abaŋeniil bukanaku ka mbi kumellh.