Âynaaw agam kayakasaku abuunenim
3
Huk haahu, Pedru di Joŋ koo ma kukayem be di Eluupay yata Emitay be kalhawaku kata yo kata na jaley âkilhuwem. 2 Di rewoo'no âynaaw boo abajim di kayakasaku a kuŋarem ki kuwalen di êtingaay yaaneyim Êtingaay Yajakaay yata Eluupay yata Emitay, ma mbi ya alhaw êsukay kânebejedom esarahay. 3 Na âynaaw umu ajuum Pedru koo di Joŋ ma kunebejem di Eluupay yata Emitay, nalhawiil esarahay. 4 Pedru koo di Joŋ di kujikerool kew, ban Pedru naanool: “Jijaa, ûjikeroli ma!” 5 Ña âynaaw umu najikeriil di hunongahu di kaan mbi kuwulool wah wakeel.6 Be Pedru naanool: “Ibajut ûuru, palimo praata iwuli, be mbi iwuli wahaw wa ibaam. Di kañaaŋaku kata Jesus Kristu ata Nasare, ulhaalo ma urees.” 7 Ban Pedru nasoh kaŋenaku katawool kûriraku ma aanenool ma alhaalo. Ña to kaŋ cab ûkandumaw watawool di ûtik. 8 Ña âynaaw umu nabelho ma ajuum, ban na arees. Ban di kunebej koo di Pedru, di Joŋ di Eluupay yata Emitay ma ya arees, nabelho ma ya asal Emitay. 9 Êsukay hîm di kujuk âynaaw umu ma areesem ma ya asal Emitay. 10 Na kugam kumanje kaan oo ma kuwalen di êtingaay yaaneyim Êtingaay Yajakaay yata Eluupay yata Emitay ma ya alhaw esarahay, ña di kujaahali ma, mata miña'umu ma kujuum.
Pedru nalob di bukanaku di Eluupay yata Emitay
11 Na âynaaw umu asoom Pedru koo di Joŋ ma ya kurees, ña êsukay hîm di kujaahali ma kûteyil be ta kemmi taaneyim buhandabu bata Salomoŋ. 12 Be na Pedru ajuum ma êsukay ya eteylom naaniil: “Kûynaake, miwuul jata Israyel, kama mata wa ma jîjaanaŋenumem mata wahaw we wagawim? Kama jîjikeroli ume kew ûriiŋ noon, sembaasu sâtooli, be mante bagawerabu bâtooli bulhebum di Emitay momawuumom âynaaw ume narees? 13 Emitay yata Abrawoŋ, di Isaki, di Jako, yaamom yata simpawolaal sihaan, yoo êyyemmi agorooraaw ata yo aamom Jesus, a jisoom jiwul yahaanay yata êsukay, a jilatum poop na Pilaatus ammi awalhenool. 14 Di jilat agorooraaw anapaaw agam alhegenumaayaw, ma jilhaw ma Pilaatus awalheluul anaw alesaaw. 15 Ma jibuj anaw akiim eroŋay, be Emitay di elhaalellool di kuketaaku; ûli ujuum na wahaw we ugam. 16 Miwuul jijuke âynaaw ume a jîmiim, hurim sembaasu sata kañaaŋaku kata Jesus soo sagawoom abaj sembe ma arees. Malhegen âynaaw ume a miwuul peh jijuum, hurim kâynenaku kata di Jesus kugawoom âju.
17 “Moo kutiyaay, înje nîmire kaan hurim kâmiraati koo kawuumom ma miwuul di yahaanay yatawuul, jîgawummi umu Jesus. 18 Be Emitay egamom ma mbi ga non ma ebiim bi êlobumul di buñaaŋenaabu bata elobay yata yo di kaan, Kristu mbi âlaam. 19 Moo, jiwatatenooro ma jîynen Ata Emit ma mbi apas kûbajumiñaku katawuul, 20 ma awuluul kahepulen ka mbi kûkayumul di Kristu ajotim kata kaŋ niŋana, aamom Jesus agam ahikulaaw. 21 Be Jesus, mbi alako dô para hatiya di emitay, be na mbi Emitay alaañen wahaw peh ma unkulo, non ma yoo ebiim bi êlobumul di buñaaŋenaabu bata elobay yata yo kanapaaku. 22 Mata Moyses moo na aloom âanul: ‘Emitay yatawuul mbi êlhaalenul añaaŋenaaw ata elobay yata yo agam non înje di êsukay yatawuul; oo mbi jijam d'oo, ma jiga wahaw peh wa mbi alobuul. 23 Be anaw a mbi ajamut d'oo, mbi âcaalheni di êsukay ma abuji.’ 24 Buñaaŋenaabu hîm bata elobay yata Emitay, cûkumul di Samuwel be kaŋ di kaaku kâyoolim, kulooloom mata kuka'uke kûbanumaku koomaam di ko.
25 “Miwuul jigam kuñool buñaaŋenaabu bata kûboñaku kata Emitay kaakum yaŋaayay ya Emitay egam napiyaanu di simpawuul sihaan na eloom di Abrawoŋ yeenool: ‘Âmbasuk hîm mbi abaj hûpiira hurim êbajoorumay yatayi.’ 26 Mo ma Emitay elhaalenumulom agorooraaw ata yo di kuketaaku, di ebollool kâtiyaar be batawuul ma awuluul hûpiira ma agawuul anoowan natiinoor bagawerabu batawool bajakutum.”