Yahaanay yata êsukay di kusoh Pedru koo di Joŋ
4
Be Pedru di Joŋ koo baroŋ ma kulobem di êsukay, ña bumaaŋenaabu bata Emitay, di annahaanaw ata bupooyaabu bata Eluupay yata Emitay, di poop bukaaku kata di kaasaaku kata sadusewwi di kûriiŋuu'to. 2 Ña di mulaañiil mata ma kumakaa'uku kata Jesus ya kulhikitemmi êsukay ma ya kulobiil kaan Jesus na alhaalowulom di kuketaaku, moo bukanaku kakeem poop mbi kûlhaalawul di kuketaaku. 3 Ña di kusohiil ki kukulh ma kulako dô be hata kajom mata ma jaley ajommi. 4 Be bukan kameeŋe kajammi eloba'uyu di kûynen. Ña yîinaay kâynemmi Jesus di kuhaŋ to, ma kûriiŋ soŋo sînjunnaasu hutok.5 Na jaley agam natitijene, yahaanay yata jûdewwi, di buŋiicaabu bata kûboñaku kata Emitay, di poop yahaanay yaayu, di kûmeboor Jerusaleŋ ma kulhan. 6 Di hulhana'uhu, annahaanaw âmakaaw ata bumaaŋenaabu bata Emitay aaneyim Anaas oo dôo, di Kayphaas, di Joŋ, di Alesandri, di poop bukan kaaku kagam kata yaŋ annahaanaw umu ata bumaaŋenaabu bata Emitay. 7 Ban di kûŋarul Pedru koo di Joŋ ki kuga ta kemmi, ban di kurinkiil keeniil: “Sembaasu, di poop kañaaŋaku kata ay jîgawumem di wahaw uwu?”
8 Be Pedru oo too huc Buynum Bunapaabu, ña na nalaañeniil aaniil: “Miwuul yahaanay yata êsukay, 9 jaat miwuul magawem d'ûli batalenabu mata ma ugam jak âynaaw ume, a jirinkem d'ûli maama ugam ma âju. 10 Be jake ma miwuul, di poop êsukay peh yata Israyel, jîmir kaan âynaaw ume ammi ute ma âjum jak, di sembaasu sata kañaaŋaku kata Jesus Kristu ata Nasare nâbuunenumim, aamom a jiriiŋum di êkrusay, be Emitay di elhaalellool di kuketaaku. 11 Jesus oo agam huwaaliisahu ha miwuul buteepaabu jilatum, be hoo hulammi huga kâjajaku kasoom eluupay. 12 Di Jesus keb an aalim abaj eroŋ yâbaworiit. Mata ute di etaamay peh, bajut an akeel agam non Jesus a Emitay egam ma aga apakenaaw ata êsukay.”
13 Ña na yahaanay yata hulhanahu kujuum Pedru di Joŋ ma kurumemmi ma ya kulob, ban kûmire kaan buko ntuwa bukan kâmire makeel, ban poop kulekoorut, ña di kujaahali. Be ban di kuwolho kaan buko ya kurebooremmi di Jesus. 14 Be kubajut kugawiil makeel, mata âynaaw a kubuunemmi oo to ma ajummi. 15 Ña di kuga Pedru koo di Joŋ ma kûcaalh dô di hulhana'uhu, ma buko kutabulhenoor maama mbi kuga. 16 Ña ya kulob ma kêenul: “Bu mbi ugawaal kûynaa'uke? Meeno êsukay peh yata Jerusaleŋ kûmire kaan miñamu mata sembaasu sata Emitay kugam, ban ooliitaal ulataal; 17 be ma miña'ume metuba muhaŋ mawaasoor di êsukay, ûlhusaaliil ma keetubi kulaañ joon kulob an akeel mata kañaaŋaku kata Jesus.”
18 Ña di kûwolliil, ban di keeniil keetubi mbi kulhikitenurer joon an akeel mata kañaaŋaku kata Jesus. 19 Be Pedru di Joŋ di kulaañeniil keeniil: “Kûynaake, kama di hunongahu hatawuul, haŋ majak ma uga non ma jiloom, ma uhuusul Emitay? 20 Ûli mumulet bi ulobut mata miñamu ma ujuum, di maama ujammi.” 21 Ña mata ma êsukay peh ya esalum Emitay mata ma âynaaw umu abuunenim, ña kubajut maama mbi kuga ma kûnaguliil. Ña di kûlhusiil lhînŋa ban di kuwalheniil. 22 Âynaaw umu a abuunenim di sembaasu sata Emitay, nabaje ujaañaw wahammi bukanaku egaba.
Bûynenaabu di kulhaw Emitay
23 Be na kuwalemmi Pedru koo di Joŋ, ña di kukay ki kutoo'bo kupaaliil ma kuñaaŋeniil maama yahaanay yata bumaaŋenaabu bata Emitay, di yahaanay yata êsukay kulobuliim. 24 Be na kuñaaŋeniimom, ña buko kaŋ peh di kulhaw Emitay di manor ma kûbinken yo ma kêenul: “Ata Emit, âwwemmi hatiya di emitay, di etaamay, di kasamaaku, di poop miñamu peh mândom; 25 Mata Buynum Bunapaabu batayi, moo bu gam ma âmpawoli David agam agorooraaw atayi alob âanul:
‘Mata wa, ma bukanaku kagawutum jûdewwi kulhaalowumulom di huuñahu,
ma kûnongikoor ebeebel?
26 Kîyyaku di yahaanay yata sîsukasu satayiil, di kubom
ma kuga banor Ata Emit,
agam anaw a Emitay êyyemmi.’
27 “Ban Pedru naaniil joon: Mata malhegen Erodis, di Ponsiw Pilaatus, ute di êsuka'uye kubomum di bukanaku kagawutum jûdewwi, di poop bukanaku kata Israyel, ma kutiik Jesus aamom Agorooraaw anapaaw agam Mesiyas, 28 ma kuga miñamu poomo ma kûnongaalim di sembaasu satayi kaan mbi muga. 29 Moo Ata Emit, ujiker non ma kûlhusem di mo kuñooli; uwuliil sembe ma keeli kurumen ma kulob elobay yatayi êsukay. 30 Ûboñul sembaasu satayi sata jabuunenaju, ma sîmanjumasu, di miñamu mata sembaasu satayi mugayi di kañaaŋaku kata Jesus, aamom Agorooraaw atayi anapaaw.”
31 Na kugam kubane kalhawaku kata Emitay, dîŋadu dâ kulakom di digogoroor. Ña buko peh, di keen kaŋ huc Buynum Bunapaabu, ña uynumaw watayiil di ûtik ma ya kuñaaŋen bukanaku elobay yata Emitay.
Bûynenaabu di kûgiitoor miñamu matayiil
32 Be buyooŋa'ubu peh bata bukanaku kâynemmi, ya kunong hunong hanor di kulob hurim hanor. An âanoriit miñamu matawool oo akiimom diyoonool; be miñ kaŋ peh ma an abaam, naŋaa'mo ki kûgiitoor. 33 Ña kumakaaku kata Jesus ya kulob di sembaasu sâmakaasu sata Emitay, mata jalhaalaaju jata Ata Emit Jesus di kuketaaku. Ña Emitay di ewulii'no hûpiiraahu harem kaŋ noon. 34 Noo, an alet di buko abajut wah. Mata bukanaku kabaam kankaku, be mante siluupasu, ya kunon'so ban di kuŋar bancaama'ubu 35 ki kuwuu'bo kumakaaku kata Jesus ma kûgiiter bo bukanaku, ma kuga anoowan nayab waawa mbi uyejool.