Ânaniyas koo di apañoorool Saphiira
5
Be âynaaw aahu aaneyim Ânaniyas ayaam añakanaw aaneyim Saphiira, di kunoom hankahu hatayiil, 2 ban di kujamoor di apañoorool ma aŋar bancaam baabu añak, ban naŋar baabu awul kumakaaku kata Jesus. 3 Ña Pedru narinkool aanool: “Ânaniyas, mata wa nuwaa'bo Esatanaay ma êjupuwi ma ega hunonga'uhu di êsigiray yatayi? Ma uñak bancaam baabu, ban nucal uwul Buynum Bunapaabu? 4 Hanka'uhu bala oon unon'ho, ntuwa hatayi? Ban poop na unon'hom, bancaama'ubu ntuwa batayi? Moo mata wa nuga umu? Ucalut uwul ajamaat, be nucale uwul Emitay.” 5 Na Ânaniyas ajammi ma aloom umu, ña nalo to ma aket. Ña êsukay peh kajammi mata Ânaniyas di kûkoli noon. 6 Ña ejaajuway yaayu di kûlhaalowul ma kuŋarool kulhiimen, ban di kukay d'oo ki kuhok.7 Na kuhokulom Ânaniyas ban, piyowut haŋ siwoora sîhaaji, apañoorool nâhankul ma ânebejul bâmirut makeel. 8 Ña Pedru narinkool aanool: “Ûyisom ma, bancaamabu boobe kaŋ ba jînommi hankahu?” Saphiira naanool: “Aa, moomu kaŋ!” 9 Ña Pedru naanool: “Mata wa ma jîjaamoorummi di apañoori ma jilaso Buynumabu bata Ata Emit? Jijaa ejaajuway konka di êtingaay kâlaañumewuum huhokahu hata apañoori, mbi kukay d'aw poop kaŋ marimaare.” 10 Ña to kaŋ cab nalo to di ûkandumaw wata Pedru ma aket. Na ejaajuway kunebejulom kûriiŋul di kutookool ma akeem, ña di kukay d'oo ki kuhok ta apañoorool ahokim. 11 Ña bûynenaabu, di poop bukan kaaku kajammi mata wahaw uwu di kûkoli noon.
Kumakaaku kata Jesus di kuga miñamu mata sembaasu sata Emitay
12 Be bûynenaabu ya kûmeboor di buhandabu bata Salomoŋ, kumakaaku katawool ya kuga miñamu mata sembaasu sata Emitay, di poop sîmanjumasu di êsukay. 13 Bajut an akeel agawutum ata di buko arumene ma akay ki kubom, be êsukay ya kulob jak matayiil. 14 Ña buyooŋabu bata yîinaay, di yaaraay di kûynen ma kunebej di buruŋabu bata Ata Emit, ña bûynenaabu di buhaŋ to. 15 Hurim miñamu mata sembaasu sata Emitay ma kumakaaku kata Jesus ya kugam, ña êsukay ya kuga bukaniil kâjuutum kumboliñaaku ki kuwalen di kûluulaku ma mbi Pedru ayaa'to, mante yâarooray yatawool di egoriil. 16 Ña bukanaku ya kûcaalhumul di sîsukasu sakotum Jerusaleŋ ma kûŋarul bukaniil kâjuutum, di kaaku ka kumalaku kûjupom, be koo kaŋ peh di kûju.
Kumakaaku kata Jesus di kukullhi joon
17 Ña annahaanaw âmakaaw ata bumaaŋenaabu bata Emitay, di kupaalool kaaku kata di kaasaaku kata sadusewwi di kûsiibuwikoor kumakaaku kata Jesus, 18 ña di kusohiil ki kukullh di ekullhay yata êsukay. 19 Be no hukaru, amalaakaw ata Ata Emit nâkayil âbabul sîtingaasu sata ekullhay ban nakay di buko be tîyaŋ, ban naaniil: 20 “Jikay be di Eluupay yata Emitay ma nki jiñaaŋen êsukay elobay peh yata eroŋa'uye yunkulay.” 21 Ña kumakaa'uku kata Jesus di kuyab hurima'uhu. Na titijemmi bûjomaru bîb, di kukay be di Eluupay yata Emitay ki kulhikiten êsukay elobay yata yo. Ña annahaanaw âmakaaw ata bumaaŋenaabu bata Emitay, di kupaalool yahaanay yata di hulhanahu, di kûwool yahaanay yata êsukay yata Israyel be hulhanahu, ban di kuboñ ma kûŋarul kumakaaku kata Jesus di ekullhay.
22 Be na kupooyaaku kata Eluupay yata Emitay kûrimmi kûtookutii'do di ekullhay, ña di kûlaañul ki kuñaaŋeniil 23 ma keeniil: “Na ûrimmi nutook ekullhay ma ekullhim kaŋ jak, nutook poop bupooyaabu bo to ma bupooyem jak di sîtingaasu, ña nûbabul, be ûtookut dô an.” 24 Na annahaanaw ata hupooyahu hata Eluupay yata Emitay, di yahaanay yata bumaaŋenaabu bata Emitay, kujammi ma kulobiim umu, ña kûmirut maama mbi kunongoor mata kumakaa'uku kata Jesus, di poop wahaw wa mbi uga. 25 Nownu âynaaw aahu nâriiŋuu'to ma aaniil: “Jijaa, kûynaaku ka jîkulhum di ekullhay bukonka di Eluupay yata Emitay ma kulhikitenem di êsukay.” 26 Ña annahaanaw ata hupooyahu hata Eluupay yata Emitay, nakay di kûynaaku katawool ma nki kûŋarul kumakaa'uku kata Jesus. Be kugawutiil di sembe mata ma kûkolim ka mbi êsukay kumabiil kuwaaliisaku.
27 Ña di kuŋariil be ta annahaanaw ata bumaaŋenaabu bata Emitay ammi di hulhanahu. Ña na arinkiil 28 aaniil: “Kama oonutuul aatuba jilob joon mata kañaaŋaku kata Jesus? Poopii elobay ya jilhikitenem di êsukay mata kañaaŋaku katawool ewasoore ban peh Jerusaleŋ. Ban jîkine jîwatatenoli ma jêenul ûli uwuumom na âketum!”
29 Ña Pedru di kupaalool kumakaaku kata Jesus di keeniil: “Ûli haŋ majak ma uga mata Emitay, ma uwaa'bo maama ejamaatay êkimmi. 30 Mata miwuul jiriiŋum Jesus di êkrusay ma jibujool, be Emitay yata simpawolaal di elhaalellool di kuketaaku; 31 ban di eŋarool ega di kaŋen kûrir kata yo, ma egawool aga Annahaanaw, di poop Ahikulaaw; ma êsukay yata Israyel mbi kubaj buruŋ ma kuwatatenooro mata kûbajumiñaku katayiil, ma mbi Emitay epas ko. 32 Moo ûli, di Buynum Bunapaabu, baamom be Emitay ewuum bukanaku kajamem di yo, ûli ugam bukanaku kajuum na wahaw uwe ugam.”
Hurimahu hata Gamaliyel
33 Na êsukay kalakotom di hulhana'uhu kujammi ma kuloom umu, ña di kubirik di buko lhînŋa poopii di kûkin kubujiil. 34 Be phârisew aahu ata di kaasaaku kata hulhana'uhu aaneyim Gamaliyel agam alhikitenaaw ata kûboñaku kata Moyses, a êsukay kûynemmi, na alhaalo ma aaniil kûcaalhen para kumakaa'uku kata Jesus be tîyaŋ. 35 Ban naaniil: “Yîinaaye, miwuul jata Israyel, jijaamo mata wahaw wa jîkimmi jiga kûynaa'uke. 36 Mata piyowut, na âynaaw aaneyim Tewdas alhaalowulom taate ma aan bukanaku oo an âamak. Ña yîinaay kaalim kûriiŋ sîteemeerasu sibakiir di kureboor d'oo, be na bukanaku kubujoom, êsukay peh ka ya kareboorum d'oo, di kuwaasoor, ban an ajamut matayiil joon. 37 Ban aahu nâlhaalowul joon nata buŋiicabu bata êsukay aaneyim Judas ata Gâlileeya, ma bukanaku poop lhay kureboor d'oo, be na kubujoom, êsukay peh ka ya kareboorum d'oo di kuwaasoor. 38 Moo kûynaa'uku aatuba jigawiil makeel, jiwalhiil ma kukay, mata ga jaa non hunonga'uhu, be mante bugoroora'ubu bûkayumul di ejamaatay, di jeen mbi bubawo! 39 Be ga jaa non bata Emitay, non mumulet bi jeeli jikajen bo. Mata jenken ja, di ga poop non miwuul matiikem di Emitay. Ña êsukay di kuyab hurimahu hata Gamaliyel.”
40 Ña di kûwoolul kumakaa'uku kata Jesus ma kûnaguliil, ban di keeniil mumulet bi nki kulaañ kulob joon mata kañaaŋaku kata Jesus, ban di kuwalheniil. 41 Ña kumakaa'uku kata Jesus di kûcaalh di eluupa'uyu yata hulhanahu koo ma kûririgemmi noon, mata ma Emitay êkimmi ma kûlaam mata kañaaŋaku kata Jesus. 42 Ña huk kaŋ peh ya kukay di Eluupay yata Emitay, di poop siluupasu ki kulhikiten êsukay, ma ya kuñaaŋeniil elobay yâsuumaay ma keeniil Jesus oo agam Mesiyas.