Bugorooraabu hutok di egaba di kujoti
6
Ña nownu, kurebooraaku kata Jesus ya kugano hukoohuk ya kuhaŋ to, ña jûdewwi kalobem elobay yata greegua ya kûŋuŋunoor ma ya kêenul kaaku kalobem êbrew ya kuholiil, mata ma kûwukenem bûkutuwaataabu batayiil hukoohuk na kûgiiterem miñamu mata huriyahu. 2 Ña kumakaaku kata Jesus di kûmeb bûynenaabu peh bata Jesus ban di keeniil: “Jakut ma ûli uwaa'bo jañaaŋenaju jata elobay yata Emitay, ma ulob keb mata huriyahu. 3 Moo kutiyaay, jijot bukanaku hutok di egaba kâynenaayaku, kammi huc Buynum Bunapaabu, ban di kujaalho, ma uwulaaliil bugoroora'ube barem ume; 4 ma ûli mbi ooli usoh lit di kalhawaku kata Emitay, di poop bugoroorabu bata jañaaŋenaju jata elobay yata yo.”5 Ña êsukay peh di sûumiil noon, ña di kujot Estevoŋ agam anaw âynemmi Emitay meeŋ, ban poop nan huc Buynum Bunapaabu, di Philiipi, di Prokoru, di Nikanor, di Timoŋ, di Parmenas, di poop Nikolaw ata Antiyokiya, anebeem di buruŋabu bata jûdewwi. 6 Ña di kuŋalliil ki kuwul kumakaaku kata Jesus ma kuga uŋenaw watayiil di buko ma kulhaw Emitay be batayiil.
7 Ña elobay yata Emitay ya ewaasoor. Ña di êsukay yata Jerusaleŋ, burebooraabu bata Jesus hukoohuk ya buhanto, bumaaŋenaabu poop lhay bata kûboñaku kata Emitay di kûynen Jesus.
Husohahu hata Estevoŋ
8 Be Estevoŋ Emitay di ewulool hûpiiraahu hâamak, ban nan huc sembaasu sata yo. Ña ya aga no miñamu mata sembaasu sata Emitay, di poop sîmanjumasu sata yo di êsukay. 9 Bukan kaaku kawoom di êsukay yata Sîreeni, di kata Alesandriya, di kata Siliisiya, di poop kata Aasiya kata di eluupay yata kâmebooraku kata jûdewwi yaaneyim Libeertus, di mulaañiil di Estevoŋ ma kulaañenoor d'oo. 10 Be Buynumabu bata Emitay di bûwul Estevoŋ mâmiilankenamu mâamak, poopii an aaliit ahaatool.
11 Ña di kuncaam bukan kaaku ma keeniil mbi kêenul kujame na Estevoŋ âlobikoorum mata Moyses, di poop Emitay. 12 Ña di kusullen êsukay, di yahaanay yatayiil, di poop buŋiicaabu bata kûboñaku kata Emitay, ma kusoh Estevoŋ ban di kuŋarool be di Hulhanahu Hâmakaahu hata jûdewwi. 13 Ban di kûŋarul bukan kaaku ma ya kusoosenool ma kêenul: “Âynaaw ume kukaku pooko ya âlobikoor mata Eluupay yanapaay yata Emitay, di poop mata kûboñaku kata Emitay. 14 Ban poop nujame ma ammi Jesus ata Nasare mbi awap Eluupa'uye yata Emitay, ban natiinoor mûndeemaanamu ma Moyses âysolaam.” 15 Ña bukanaku kaleehom di Hulhana'uhu Hâmakaahu hata jûdewwi, di kujiker Estevoŋ kew, di kujuk ma buulabu batawool bunokoorum non bata amalaak.