BAGAWERABU
BATA KUMAKAAKU KATA JESUS
Hûcukumahu
1
Apaalom Tiyoophilu, kaytaku kûtiyaaraku ka iŋiiculim, niñaaŋeni miñamu poomo ma Jesus agam, di maama alhikitemmi bukanaku na âcukum bugoroorabu batawool, 2 di poop maama aloom di sembaasu sata Buynum Bunapaabu kumakaaku katawool ka ajotum kaan mbi kuga, ii be na aŋarim be hatiya di emitay. 3 Be na akeem, ban ya aga ma kujukool uyaas wameeŋe ii be na âriiŋemmi kukaku keemo bukanaku egaba, ma âyisiil kaan malhegen omu ma arommi, ban ya alobiil mata kâyyaku kata Emitay. 4 Huk haahu koo ma kuleehom, naan kumakaaku katawool: “Mbi jilako Jerusaleŋ ii be na mbi Ampawom awuluul miñamu ma ammi mbi âboñul non ma jijammi ma ilobuum. 5 Mata malhegen Joŋ mumelamu na âbatisummi bukanaku, be miwuul leetubi piyo, mbi jîbatisumi Buynum Bunapaabu.”Jesus naŋari be hatiya di emitay
6 Naanu kumakaaku katawool koo ma kûmeboorum, ña di kurinkool keenool: “Ata Emit, kama maame mbi ulaañen Israyel Kâyyaku katayiil?”
7 Be Jesus naaniil: “Mumulet bi jîmir niŋanu, di poop hukahu ha ampawom apimmi mata sembaasu satawool. 8 Be sembaasu sata Buynum Bunapaabu mbi sîwalowul ma silako di miwuul, ma siwuluul sembe ma mbi jilob mûmbaam di êsukay yata Jerusaleŋ, di poop Jûdeya pooyo, di Samariya, ii be âmbasuk peh.” 9 Na Jesus ya aloom umu, koo too ma kujikerem d'oo, ña Emitay ya eŋarool be hatiya ii be na kawiiñaku ukaylom ki kugaayenool, ña kubajut kujukool joon.
10 Be koo baroŋ ma kulhagum hatiya di emitay ma ya kujiker Jesus oo ma akayem, kûynaaku egaba kalhiimom tûmpaay, di kûgawuu'to weh ñata ta kemmi, 11 ban di keeniil: “Kûynaaku kata Gâlileeya, kama mata wa ma jêemummi ute ma ya jijiker hatiya di emitay? Jijaa, Jesus umu a jijuum non ma aŋarim ute di miwuul be hatiya di emitay, moomu poop kaŋ ma mbi âlaañul, naga non ma jijukoom oo ma akayem.”
12 Ña kumakaaku katawool di kûwalowul di hurimbiliŋahu haaneyim Oliveyra ma kulaañ be Jerusaleŋ. Hurimbiliŋa'uhu ta hemmi râagiit di hânkijahu hata Jerusaleŋ, teeliye tîriiŋ ekilometer yanor. 13 Na kugam kûriiŋe di hânkijahu hata Jerusaleŋ, di kukay ki kuŋool di etaahay ma kukay be di êwaanaatay dâ kuwalemmi; Kaamom: Pedru di Joŋ, di Tiyaagu, di Andre, di Philiipi, di Tome, di Bartolomew, di Matews, di Tiyaagu aamom añool Alphew, di Simoŋ ata di kaasaaku kâkimmi kuyab etaamay, di poop Judas añool Tiyaagu. 14 Ña buko kaŋ peh, di poop yaaraay yaayu, di Mariya aamom iñaaw Jesus, di poop kutiy Jesus ya kuga hurim hanor ma kûmeboor ma ya kulhaw Emitay.
Matiyas naŋar hiŋahu hata Judas
15 Di kuka'uku, kurebooraaku kata Jesus kaalim kûriiŋ bukan êteemeer di anabawo koo ma kûmeboorum, ña Pedru nalhaalo di tutaru tatayiil ma âanul: 16 “Kutiyaay, jake ma ga non ma Baŋiicerabu Bâñoyyaabu buloom. Mata Buynum Bunapaabu mo ma buloom di David mata Judas, aamom anaw agam asisenaaw ata bukanaku kasoom Jesus. 17 Mata Judas oo atayeen di kaasaaku katoolaal, ban oo poop anaw âwoolim be bugoroora'ube. 18 Ban malhegen Judas bancaamabu bata malesamu ba kuncaamoom, boo nânoomummi hankahu, ban poop di hanka'uhu dô da alolom ma apajulo, ma mulaawamu matawool muwaasoor. 19 Ma mujamo di êsukay peh yata Jerusaleŋ, momakiimom hanka'uhu di hûwooli Aseldama, yaamom di elobay yatayiil hankahu hata hûsimahu.”
20 Ban Pedru naaniil joon: “Mata momu ma muŋiicim di kaytaku kata uñaaŋaw wata jasalaju jata Emitay di kaan:
‘Eluupay yatawool mbi elako to tîikooyo,
ma an aatuba akin dô.’
Di kêenul poop:
‘An aahu mbi aŋar hiŋahu hata bugoroorabu batawool.’
21-22 “Momakiimom jake ma ujotaal an aahu ata di bukanaku ka ya kareboorum d'ulaal noo kaŋ na Joŋ âbatisum bukanaku, di poop na Ata Emit Jesus ya areesum ute d'ulaal ii be na aŋarim be hatiya di emitay. Ma anaw umu mbi abomi d'ulaal di bugoroora'ube bata jañaaŋenaju jata bukanaku kaan Jesus nalhaalowulo di kuketaaku.”
23 Ña di kujot kûynaaku egaba: Jose aaneyim poop Barsabas, a kasaapaku katawool keeneyim Justu, di poop aahu aaneyim Matiyas. 24 Ban di kulhaw Emitay ma kêenul: “Ata Emit, aw ûmiim êsigir yata ajamaat peh. Moo, nulhawi ma ûyisoli di buke egabaay anaw a ujotum, 25 a mbi agawi di bugoroorabu bata kumakaaku kata Jesus, ma aŋar hiŋahu ha Judas awaatom ma akay ba âkimmi.” 26 Ña di kuga êtukaya ma kûmir, be di elo di Matiyas, ña di kugawool di kaasaa'uku kata kumakaaku kata Jesus kaamonom kuŋen di an anor.