Jijam di yahaanay kaakum êsukay
13
Moo, anoowan mbi ya ajam di yahaanay kaakum êsukay, mata bajut yahaan yakeel, ya Emitay ejotutum, mata buko peh yoo egawiitom. 2 Momakiimom, anoowan ahuusuum yahaanay kaakum êsukay, nahuusule Emitay yagawiitom; mata bukanaku kahuusuulem yahaanay mbi kûŋarul hûlaamahu be batayiil. 3 Mata bukanaku kagawem jak kûkoliyoriit yahaanay yata êsukay, be bukaaku kagawem kôji, ya kûkoliyiil. Moo, nûkine ma ôotukakoli yahaanay yata êsukay? Mbi ya uga jak, ma mbi kusali. 4 Mata buko koku ma kugawem di bugoroorabu bata Emitay matayi. Be uga jaa kôji, mbi ûkoliyiil, mata mumulet bi kûlhiimulul ujaasiyaaw watayiil ebeebel. Mata ya kules bukanaku kagawem kôji, mata ma kemmi di bugoroorabu bata Emitay. 5 Momakiimom jake ma mbi ya ujamaal di yahaanay yata êsukay, be ntuwa keb ma aatuba mbi kulesolaal, be poop mata mo ma ûyegetaw watawuul ûkimmi jiga. 6 Moo, mbi ya jiyuup, mata buko bugoroorabu bata Emitay kugawem di bo, jiyuup ma mbi keeli kuga bo. 7 Moo, mbi ya jincaam wahaw wa yahaanay kata êsukay kemmi mbi uncaami; di jiyuup; di jisohii'poop jak.Ûkin bukanaku
8 Aatuba jiyaarer an wah wakeel, be wahaw keb wa mbi jiga, mbi ya jîkinoor. Mata anaw âkinem bukan, anaw umu oma agawem non ma kûboñaku kata Emitay kuloom. 9 Mata kûboñaku kata Emitay keene: “Aatuba jikumen di anaw a jiyaboortum, aatuba ubuj an, aatuba ûkuut, aatuba ucal, aatuba ûsiibuwikoor wah.” Moo, di kûboñ peh kabaam, koku ma kubomim di kûboña'uke, kammi: “Ûkin apaali non ma aw ûkinoorom.” 10 Mata anaw âkinem an, âgaworiit apaalool kôji, momakiimom anaw umu âkinem an, nagawe ban non ma kûboñaku kata Emitay kuloom.
11 Moo, jiga mo, mata jîmire etaŋay ya oomaam di yo; mata tîriiŋe ma utonkuwaal di kaŋotaku, mata kapakaku katoolaal kuhaŋ ban mareeken di naana na unebejaam kâtiyaar di buruŋabu bata Kristu. 12 Mata busonnaaru tihulhe ban, mowme ulaamaal di tutulaaru, moo, ûjupuluwaal wahaw peh wagaweyim di emuucenay, ma ûjupuwaal mûtiikumaayamu mata tutulaaru. 13 Moo, ureesaal di malhegenumaayamu non bukanaku kareesem tutulay, ma aatuba ulakuwaal di maŋaamamu, di êkalaay, di jâgawikooraju, di wahaw wâpuñunenim, di bacecabu, di poop jâsiibuwikooraju; 14 be jîjupo hunoonahu hata Ata Emit, aamom Jesus Kristu, ma aatuba jîkuumen wahaw wajakutaaw wa eniil ajamaat êkinem.