Eroŋay yunkulay
12
Moo, kutiyaay, hurim kañankiitaku kata Emitay, nilhawuul ma jiwuu'yo siniilasu satawuul, ma silaañ siga non wahaw wawaasenumim waroŋaaw, wanapum wa yoo êkimmi. Mata jâbinkena'uju jo ja mbi ya jiga be bata yo. 2 Aatuba jiga non ma bukanaku kata di etaamay kugawem, be mbi jiwaa'bo Emitay ma ehilijen ûyegetaw watawuul, ma mbi jeeli jinamulen wahaw wa Emitay êkimmi, di jeeli poop jîmir wahaw wajakum, di unap, ban di ûsuum.
3 Mata, mata kañankiitaku kata Emitay, mo ma ewulumommi bugoroora'ube, moo neenuul, an akeel ata di miwuul aatuba agawooro tiŋatu ta Emitay egawutoom; be anoowan nanong jak ma awalen humuumahu hatawool arewen di kâynenaku ka ewuloom. 4 Mata non ma eniilay yata ajamaataw ebaam ujimaw lhay, be woo poowo ya uga bugoroorabu bâbutim. 5 Moomu poop kaŋ ma ulaal ugawaam, palimo ma umeeŋaam, be eniilay yanor nugawaam di Kristu, ban ulaal omu ma usohooraam non ma ujimaw wata eniilay usohoorum.
6 Emitay ewulolaal ugorooraw wa Buynum Bunapaabu buwulem wâbutiyoorum. Moo, anaw abaam bugoroorabu bata jañaaŋenaju jata kûboñaku kata Emitay, nañaaŋen ko non ma ewuloom kâynenaku. 7 Non bata jagorooraju jata bukanaku, naga bo; non bata jalhikitenaju jata bukanaku, naga bo; 8 non bata jâtikenaju jata bukanaku, naga bo. Anaw awulem bukan wah, naga mo, aahu aalim kaga annahaanaw ata bukanaku, naga mo di bûyeget bajake; aahu aalim jaanenaju jata bûsukateenaaku, naga mo di bûyeget bâsuume.
Kûcecen kameeŋe
9 Kâkinooraku katawuul, jeetuba jiga ko kata bûhooloorabu. Di jilat poop wahaw wajakutum, ma jisoh waawu wajakum. 10 Jîkinoor kâkinooraku kata batiyaayabu balhegenumaayabu di Kristu. Ban poop di jiga sembe ma jiboolaat kutiyuul haŋ non ma jiboolaatoorom.
11 Di jisoh bugoroorabu nîk, ma aatuba jiheleken; di jigoroor hâah bugoroorabu bata Ata Emit. 12 Jîririgen ma jikob wahaw wa jikobem di wo, di jîmuñ di hûlaamahu ha jemmi di ho, di jenken poop di kalhawaku kata Emitay. 13 Di jeenen bûsukateenaabu kagam bûynenaabu, di jiwalen poop emaasooraay di siluupasu satawuul.
14 Di jilhaw Emitay, ma ewul hûpiiraahu bukanaku katiikoorewuum. Aatuba jilhaw Emitay ma êgawikooriil. 15 Di jîririgen di bukanaku kammi ma kûririgemmi, di jikaaw poop di bukanaku kammi ma kukaawem. 16 Miwuul peh jinongoor hunongoorahu hanorahu, an aatuba anongoor kaan nahaŋe apaalool, be anoowan nanongoor kaan oo ntuwa an âamak. An poop, aatuba anongoor, nâanul, oo nahaŋe mâmir makeel.
17 An aatuba agalen ma aga an miñ makojuwe, apaalool agawoom kôji; be di jenken ma ya jiga miñ majake be bata an poopool. 18 Di jenken poop ma jibaj kâsuumaayaku di bukanaku peh. 19 Kutiyaay, aatuba jîyab bugalen di uŋenaw watawuul, be jiwaa'bo ma Emitay mbi eyab bugalen be batawuul. Mata dôdu ma ŋiicim kaan, Emitay yeene: “Înje ikiim kayab bugalen. Înje mbi igalen be batawuul. 20 Momakiimom,
anaw âsuumutim acaaret jaa, nuwulool ari,
basibenabu busohoo'jaa, nuwulool asiben.
Mata ugawoo'mo jaa,
mbi ugawool ma apuñuwi.”
21 Moo, aatuba uwaa'bo ma majakutaamu muhaati, be nonken ma uhaat mo, di bagawerabu bajakaabu.