Kañankiitaku ka Emitay eñankiitum bukanaku kata Israyel
11
Moo, ma irink, kama Emitay yoo elatum bukanaku kata yo? Ntuwa moo! Înje anaw ata Israyel, ata di êbajoorumay yata Abrawoŋ, jata di hiilhahu hata Benjamiŋ. 2 Malhegen Emitay elatut bukanaku kata yo, kaamom ka êjotaalim kata niŋanu. Kama jîmirut non ma Baŋiicerabu Bañoyaabu buloom mata Êliyas, na aloom mata bukanaku kata Israyel ma aan Emitay: 3 “Ata Emit, kubuje ban buñaaŋenaabu peh bata kûboñaku katayi, ban di kutah Altar satayi, ban koo kâpaamewuum d'înje ma mbi kubujom, mata înje keb iŋañunom di buñaaŋenaabu bata kûboñaku katayi.” 4 Be bu Emitay elaañenoom? Di yeenool: “Înje umu ma îñoorum bukanaku kârimmi sînjunnaasu hutok di sigaba (7.000), kâtiigentum ma kulhaw bâkiinabu bata Baal.” 5 Moomu poop kaŋ ma Emitay ejotum maame bukan kaaku kaŋañom, mata kañankiitaku kata yo. 6 Be ntuwa mata wahaw wakeel wa kugam wajake, be mata kañankiitaku kata yo. Mata gaween jaa non mata wahaw wa kugam, ña kama kañankiitaku kata yo kugawut kañankiit kata malhegen.7 Mowme bu mbi ulobaal? Wahaw wa Israyel kupammi kujukut wo, mata ma ûyegetaw watayiil ukalum, be bukaaku kajotim, di kujuu'wo, 8 non ma ŋiicim kaan:
“Emitay egawiim ma ûyegetaw watayiil ukal,
ma kûkilaku katayiil ketukajuk,
ûjaŋayaw watayiil, wetukajam be kaŋ hukahu hata jaat.”
9 David nâanul poop: “Ûlundaayaw watayiil, mbi uga ekoliŋenay be batayiil,
di uga poop hûmbaalumahu da mbi
kugolenoor ma kulesi;
10 nuga kûkilaku katayiil ma kuga hûp ma ketukajuk,
nugawiil poop ma ujeeŋandaw watayiil ûkupo.”
11 Moo, ma irink joon: Kama jûdewwi koo kûpungulhom ma kulo, ban ketukalhaalo? Ntuwa moo! Mata, mata hulowahu hatayiil, hohakiimom ma kapakaku kukayimulom be bata bukanaku kagawutum jûdewwi, ma jûdewwi mbi kuga kugabaaku di buko. 12 Mata hulowa'uhu hata bukanaku kagam jûdewwi, hoo huŋallom husaanumahu be bata âmbasuk peh, bahooterabu batayiil, di bûŋarul poop husaanumahu be bata bukanaku kagawutum jûdewwi. Moo, na mbi jûdewwi kûlaañul be bata Emitay ma kupak, mbi hûpiiraahu hatayiil huhaŋ to.
13 Be miwuul jagawutum jûdewwi, miwuul nilobem di miwuul. Mata palimo înje jagam âmakaaw ata Jesus, ma iga agorooraaw atawuul, be sûumom noon mata bugoroora'ube, 14 mante niga bukanaku kata êsukay yûmbaam, ma kuga kugabaaku di miwuul, ña kaaku katayiil di keeli kupak. 15 Mata na Emitay elatum bukanaku kagam jûdew, ña di baj buruŋ ma bukanaku kata âmbasuk peh kuga kâsuumaay di yo. Moo, na mbi Emitay elaañ êkin bukanaku kagam jûdewwi, wa mbi uga no? Mbi baj eroŋay be bata bukanaku kammi ma kukeem. 16 Mata emaanaay yâtiyaaray yajalim, eyinteni jaa di kaŋenaku kata Emitay, non ña yoo peh ya mbi ejali, yata Emitay. Uwulaa'jaa poop Emitay kuhaaraku kata buyaajabu, non ña saanasu peh sata bo, yoo ekiisom. 17 Mata saan saasu sitiji jaa di buyaajabu bata ûuba, ma miwuul jagawutum saanasu sata di bo, jitepeni dô ma jiŋar hiŋahu hatayiil, ma jêemmi di kuhaaraku, di poop hûsimahu hata bo, 18 aatuba jilob bûlaat, be jilob jaa bûlaatabu, di jiwolho kaan, ntuwa miwuul jisoom kuhaaraku kata bo, be kuhaaraku kata bo kusohuum.
19 Be jeeliye jêenul: “Saana'usu soo sitijim ma mbi seeli sitepeni dô.” 20 Malhegen! Be buko kutiji mata ma kûynentum, ña miwuul jâynemmi di jitepeni dô. Be aatuba jigawooro mata ma jîtepenidom, be jîñag, 21 mata Emitay eñankiitut jaa saanasu sâwoodom, moomu poop kaŋ ma yeetubi eñankiituu poop. 22 Moo, jisoh mâsuumamu mata Emitay. Mata miwuul jijuke non ma Emitay ejakum bûyeget; be ban di êhaah be bata bukanaku kalom, di êsuum bûyeget be bata miwuul jajakum ûyeget, miwuul bankener ma jîynen di mâsuumaamu mata yo. Be miwuul poop jenkent jaa, jeeliye jitiji. 23 Be buko kûlaañuu'jaa ma kûynen Emitay, Emitay mbi etepeniil poop, mata ebaje sembe ma egawii'mo. 24 Mata miwuul jagam saanasu satijim di buyaajabu bata ûuba bagawutum balhegenumaayabu, ma jitepeni di baabu balhegenumaayabu, benkiteemo saanasu sata baabu balhegenumaayabu sâtepenidom?
25 Kutiyaay, nîkine ma jîmir wahaw wâñoorim wa Emitay êkimmi, ma aatuba jigawooro, mata malhegen bukanaku kata Israyel kugawi ma ûyegetaw watayiil wank, be na mbi tîriiŋ na mbi bukanaku kagawutum jûdew ka mbi kunebej di buruŋabu bata Emitay kûrir. 26 Ban nkit êsukay yata Israyel di kupakeni, non ma demmi ma ŋiicim di kaan:
“Ahikulaaw mbi âcaalhumul Siyoŋ,
a mbi âcaalhen majakutaamu mata êbajoorumay yata Jako.
27 Ûde yaŋaayay yûmbaam ya mbi iga di buko,
na mbi ipas kûbajumiñaku katayiil.”
28 Moo, di karebaku kata elobay yâsuumaay, bukanaku kagam jûdew, buko bûsuumoortaabu bata Emitay matawuul, be di karebaku kata jajotaju, Emitay yoyu ma êkiniim, mata ma ejotum simpayiil sihaan. 29 Mata yoo êpasenoriit kaga wahaw wa eloom be bata bukanaku ka ejotum. 30 Malhegen, kâtiyaar miwuul jagawutum jûdewwi jîhuusuhuusunom Emitay, be mowme eñankiituu'ban mata ma jûdewwi poop kuhuusuuyom. 31 Mata buko koo kuhuusuum Emitay, ma mbi kubaj kañankiitaku di yo, non ma eñankiituum poop. 32 Mata Emitay yoo ewaam bukanaku peh ma kuhuusuu'yo, ma mbi yeeli eñankiitiil poop peh.
Kañaaŋaku kata jâbinkenaju jata Emitay
33 Mâlahamu mata majaalhaamu mata Emitay,
di mâmiilankenamu mata yo, muhahuhah noon!
Ay aalim âmir mata bugoroorabu bata yo?
Ay aalim poop âmir mata hunongahu hata yo?
34 Ay âmiim poop bûyegetabu bata Ata Emit?
Be mante, an naaliye aga anamulenaaw ata yo?
35 Ay awuuyom ban nakeel wah kâtiyaar,
ma yoo poop mbi ega ban di elaañenool?
36 Mata yoo êwwemmi wahaw peh.
Wahaw poop peh wâwum, ûwu mata yo, di ûwu poop be bata yo.
Mata yoo mbi esali be nanoonan. Amiin.