Jûdewwi di kulat ma Emitay egawiil kucol
10
Kutiyaay, hunongahu hammi di êsigiray yûmbaam, di kalhawaku ka ilhawem Emitay, nîkine ma bukanaku kata Israyel kupak. 2 Mata înje nîmire jak kaan buko kûkine meeŋ ma kugoroor be bata Emitay, be kunamulent maama mbi kuga. 3 Mata ma kûmirutum maama Emitay egawem an ma acol di yo, momakiimom ma kûpaamummi di bagawerabu batayiil maama mbi kuga ma kucol, ma kulat maama Emitay êkimmi. 4 Mata di Kristu kûboñaku kata Emitay kûwuñenummim, moo bukanaku kâynenoom, mbi kucol di Emitay.5 Malhegen, Moyses moo naŋiicum kaan, anaw asoom kûboñaku kata Emitay, mbi aroŋ mata ko. 6 Be mata ma Emitay egawem an acol mata ma âynemmi, momakiimom Moyses nâanul: “Aatuba urinkooro ma ôonul, ay mbi aŋool be hatiya di emitay ma nki âgawul Kristu ma âwalowul?” 7 Aatuba urinkooro poop ma ôonul: “Ay mbi awalo be di husunahu hâlahaahu di etaam ma nki âgawul Kristu ma âlhaalowul di kuketaaku?” 8 Moo, Moyses wa nâkimmi alob? Naane, elobay yata Emitay yoyu utu di miwuul, di utumaw watawuul, di poop sîsigirasu satawuul, yaamom elobay yata kâynenaku ya uñaaŋenuum. 9 Mata ulob jaa salh di butumabu batayi di kaan, Jesus agam Ata Emit, ban nûynen di êsigiray yatayi di kaan, Emitay elhaalelloom di kuketaaku, mbi upak. 10 Mata di êsigiray an âynenem ma aali aga anaw acolum di Emitay; di butumabu poop an alobem ma awatatenooro mata kûbajumiñaku katawool, ma apak.
11 Mata Baŋiicerabu Bañoyaabu beene: “An peh âynenoom, aatubi apuñeni.” 12 Mata Emitay êgaworiit aahe di aahe, êgaworiit ume jûdew, ume ntuwa jûdew. Mata yoo egam Ata Emit ata an poopool. Moo, ya ewul wahaw wajakaaw an peh âwooleyom. 13 Mata an peh âwoom kañaaŋaku kata Ata Emit, mbi apak.
14 Be, bu mbi kuga ma kûwool anaw a kûynentum? Bu mbi kuga poop ma kûynen, an bañaaŋentiil? 15 Bu poop mbi kuñaaŋen, an babontiil? Mata dôdu ma ŋiicim di kaan: “Anaw añaaŋenem elobay yâsuumaay, ereesay yatawool ejakjak.”
16 Be ntuwa bukanaku peh kemmi aawo elobay yâsuumaay. Non ma Isayiyas aloom âanul: “Ata Emit, aymoom âynemmi elobay yatoolaal?” 17 Mata jajamaju jata elobay yañaaŋenim, jigawem an âynen. Eloba'uyu yañaaŋenim, yata Kristu.
18 Be înje nirinkuul eenuul: “Kama buko kujamut elobay yañaaŋenim? Malhegen kujame! Mata dôdu poop ma ŋiicim di kaan:
Hurimahu hatayiil kujammi di etaamay peh,
baloberabu batayiil, di buwaasoor poop di âmbasuk peh.”
19 Moo, nirinkuul joon eenuul: Kama êsukay yata Israyel kûmirut mo? Kûmii'mo. Mata Moyses moo naloom âanul:
“Mbi igawuul kugabaaku di bukanaku kagawutum êsuk.
Nigawuul poop ma jibirik di bukanaku kâmirutum makeel.”
20 Isayiyas nalob joon bâkoliit ma âanul, Emitay yeene:
“Bukanaku kapaamutommi, di kujukom,
kaaku poop karinkutum mata înje, nîcallhiil.”
21 Be mata Israyel, Emitay moo eloom yêenul:
“Kukaku pooko, ya iñuur uŋenaw wûmbaam be bata êsukay yâjamaatim, ban di kank ûyeget.”