Emitay di êsukay yata yo
9
Moo, ma ilobuul malhegen kaan, înje jata Kristu, moo îcaloriit, ban poop bûyegetabu bûmbaam ma busoolhenen Buynum Bunapaabu, bûyisom kaan wahaw wa ilobem di wo malhegen. 2 Be êsigiray yûmbaam yoyu ma êgunum noon, ban di esaat mata hûlaamahu hâbaworiitaahu, 3 poopii nîkin ma kapaawaaku kulo d'înje, ma uwaasoor di Kristu mata jâkinaju ja îkimmi kutiyom, kaamom ka uwoogum hûsim. 4 Mata buko bukanaku kata Israyel ka Emitay egam kuñool yo; ma ewuliil majaaŋaamu mata yo, ban di ega yaŋaayay di buko, ma ewuliil kûboñaku kata yo, di jâbinkenaju jata yo jalhegenumaayaju, ban di elobi poop mata wahaw wa yemmi mbi ewul. 5 Mata buko kugam êbajoorumay yata sîmpawoli sihaan, dâ Kristu âcaalhumulom, aamom agam Emitay yahammi wahaw peh, ya mbi esali be nanoonan. Amiin!6 Be aatuba unongaal kaan ma elobay yata Emitay eloom coohenut, mata bukanaku kagam kata êbajoorumay yata Israyel, ntuwa buko peh kugam bukanaku kata Israyel kalhegenumaayaku. 7 Mata ntuwa bukanaku peh kagam êbajoorumay yata Abrawoŋ, kugam kuñoolool. Mata Emitay yemmi Abrawoŋ: “Di kuñool Isaki, dô da mbi êbajoorumay yatayi êcaalhumul.” 8 Moo, nîkine êenul, ntuwa bukanaku kabajim di hûsimahu hata Abrawoŋ, kugam kuñool Emitay. Be bukaaku ka yoo yemmi mbi ewulool, ko kagam kuñool yo. 9 Mata mo ma Emitay eloom Abrawoŋ yeenool: “Hukahu mbi hûriiŋ ha mbi îlaañul, Saara aamom apañoori mbi âcaalhul di aŋilaw îinaaw.”
10 Ban poop ntuwa oo keb agamom, be Rebeeka poop nâcaalhul di magabaamu mata ampawaayaw anoraw aamom Isaki, agam ampawolaal. 11-12 Be balaa'ubu, koo baroŋ ma kûkuloorim, koo bagaworut makeel majake, di makeel makojuwe, Emitay di yeen Rebeeka: “Aahu araheem, mbi aga agorooraaw ata aahu inŋetaaw.” Emitay ega mo ma hunongahu hata yo heeli hujuum; ntuwa mata wahaw wa balaabu kugam, be ega non ma ejotem an, ma êwoolool. 13 Mata Baŋiicerabu Bâñoyyaabu mo ma buloom kaan: “Jako nîkimmi, ma ilat Êsawu.”
14 Ña bu mbi ulobaal? Soŋo mbi oonaal pîya, Emitay egawut anaw acolum? Mumulet! 15 Mata yoo yemmi Moyses: “Înje mbi iñankiit anaw a îkimmi iñankiit. Mbi ibonket poop anaw a îkimmi ibonket.” 16 Moo, wahaw uwu peh, ntuwa mata hunongoor, di bagawer ajamaat, be mata kañankiitaku kata Emitay. 17 Mata Emitay mo ma eloom di Baŋiicerabu Bâñoyyaabu ma yeen Pharawo: “Momakiimom nilhaalelli ma mbi îyis sembaasu sûmbaam d'aw, ma mbi kañaaŋaku kûmbaam kûwooli âmbasuk peh.” 18 Moo, Emitay ya eñankiit anaw a êkimmi eñankiit, di ega poop bûyegetabu bank bata anaw a êkimmi ega mo.
Hubirikahu hata Emitay, di kañankiitaku kata yo
19 Be anaw naaliye arinkom aanom: “Kama ga jaa non mo magam, moo mata wa ma Emitay yêenumem ejamaatay kubaje kûbajumiñ? Aymoom aalim alat wahaw wa Emitay êkimmi ega?” 20 Kama aw aymoom jagam ajamaataw, a mbi kuñoosoor di Emitay? Elomp yeeliye erink anaw ateepuyom ma yeenool: “Kama mata wa nuteepom ume?” 21 Kama ateepaaw ata silompasu, aaliit aŋar bukapabu ma ateep silompasu sigaba, ban naga yaayu ehaŋ majak yaayu?
22 Moo, bu nooliyaam ulobaal, Emitay yoo bâkiner êyis hubirikahu hata yo bukanaku, di êkin poop êyisiil sembaasu sata yo? Mata ya emunten meeŋ di bukanaku kajommi ma kulesi, kareesem ki kûbuyi. 23 Di êkin poop êyis husaanumahu hata majaaŋaamu mata yo d'ulaal ja eñankiitum, jaamom ja êbandooraalim kata niŋanu ma mbi ôomiyaal di majaaŋaa'umu; 24 mata ulaal poop bukanaku ka Emitay êwoom, be ntuwa keb di tutaru tata jûdewwi, be di tutaru poop tata kaaku kagawutum jûdew. 25 Mata mo ma Baŋiicerabu buloom di kaytaku kata Oseyas bêenul:
“Mbi îwoolul bukanaku kagawutum kûmbaam,
ma kuga bukanaku kûmbaam.
Êsukay ya îkintum, di elaañ ega
êsukay ya îkimmi.”
26 Ban nâanul joon: “Tiŋatu tanoratu ta bukanaku keenuum:
‘Miwuul jigawut bukanaku kûmbaam’,
be mbi kêenuu'to, miwuul kuñool Emitay yaroŋaay.”
27 Moomu poop kaŋ, ma Isayiyas aloom mata Israyel ma âanul:
“Palimo ma êsukay yata Israyel kuyejum non
hulhuus hata di kasamaaku, be bukanaku kinŋet ka mbi kupak.
28 Mata Ata Emit aatubi apiyo kaga
batalenabu âmbasuk peh.”
29 Non ma Isayiyas abiim bi alob joon âanul:
“Gaween jaa non Ata Emit Ahammi Sembe Wah Peh,
awalhentolaa'bo êbajoorum yakeel,
mbi ugaweenaal non êsukay yata Sodooma, di poop yata Gomoora.”
30 Ña bu mbi ulobaal? Mbi oonaal bukanaku kagawutum jûdewwi, kapaamutum ma kuga bukanaku kacolum, be di kugawi bukanaku kacolum mata kâynenaku. 31 Be bukanaku kata Israyel kasoom keb kûboñaku kata Emitay ma mbi kugawi bukanaku kacolum di Emitay, ña kugawuti mo. 32 Mata wa ma kugawutumim bukan kacolum? Mata kupaamut ma mbi kucol, di kâynenaku, be buko di kusoh di kûboñaku kata Emitay ma ya kupaam jo di bagawerabu batayiil. Momakiimom ma kûpungulhowummi di “huwaaliisahu hata hûpungulhaahu.” 33 Non ma demmi ma eŋiicim kaan:
“Jijiker, mbi iga Siyoŋ huwaaliisahu hata hûpungulhaahu,
niga bo poop huwaaliisahu hâamak ha mbi ya hugayiil kulo.
Be anaw âynemmi di ho, aatubi alako di ñipuñ.”