Eroŋay ya Buynum Bunapaabu buwulem
8
Moo, mowme hûjimenahu hata Emitay hulee'ban be bata bukanaku kammi ma kusohoorum di Kristu Jesus. 2 Mata kûboñaku kata Buynum Bunapaabu kagawem an eroŋ mata kasohooraku katawool di Kristu Jesus, kuhikulom ban di kûboñaku kata kûbajumiñaku, di poop kata eketay. 3 Be Emitay di ega wahaw wa kûboñaku kata Emitay keeliwutum kuga, mata ma hunoonahu hata siniilasu satoolaal hugam kûboñaku kata Emitay ma ketukabaj sembe. Di êboñul Añool yo ma âkayil di eniilay non yata ajamaat ata kûbajumiñaku, ma mbi âbuy ko di hunoonahu hata siniilasu satoolaal. 4 Emitay ega mo, ma mbi ooliyaal ugawaal non ma kûboñaku kacolaaku kuloom, mata uletaa'ban nugawaal non ma eniil ajamaat êkinem, be non ma Buynumabu bata Emitay bûkimmi.5 Mata bukanaku kagawem non ma eniil ajamaat êkinem, ûyegetaw watayiil poop ya ulako di wahaw wa eniil ajamaat êkinem; be bukanaku kagawem non ma Buynum Bunapaabu bûkimmi, ûyegetaw watayiil ya ulako poop di wahaw wa boo bûkinem. 6 Mata bukanaku ka ûyegetaw watayiil ujooŋoorum di hunoon ajamaat, mbi ugawiil kuket, be ujooŋoor jaa di Buynumabu bata Emitay, mbi ugawiil kuroŋ, di kubaj poop kâsuumaayaku. 7 Malhegen bukanaku ka ûyegetaw watayiil ujooŋoorum di hunoon ajamaat, kûjamoororiit di Emitay, mata kêeliyoriit kujam di kûboñaku kata yo; malhegen mumulet bi keeli kuga mo. 8 Mata bukanaku ka hunoonahu hata siniilasu satayiil hemmi ma hulhopemmi ûyegetaw watayiil, keeliit kuga Emitay êririgen di buko.
9 Be miwuul nokoor jaa non malhegen Buynumabu bata Emitay bobu di miwuul, jilee'ban di jiga non ma siniilasu satawuul sîkimmi. Mata anaw aakutum Buynumabu bata Kristu, anaw umu ntuwa atawool. 10 Mata Kristu omu jaa di miwuul, palimo siniilasu satawuul sikete mata kûbajumiñaku, be Buynumabu bata Emitay mbi bugawuul jiroŋ, mata Emitay esohuu'ban non bukanaku kacolum di yo. 11 Non Buynumabu bata anaw balhaalellom Jesus di kuketaaku bobu di miwuul, anaw umu poop alhaalelloom di kuketaaku, mbi aga poop siniilasu satawuul saketem siroŋ, mata ma Buynumabu batawool bemmi di miwuul.
12 Moo, kutiyaay, wahaw wa mbi ugawaal mowme, aatuba mbi ya ugawaal non ma siniilasu satoolaal sîkimmi. 13 Mata jiga jaa non ma siniilasu satawuul sîkimmi, mbi jiket; be jiga non ma Buynum bata Emitay bûkimmi, ma bugawuul jibuj bagawerabu bajakutaabu ba siniilasu sîkinem, mbi jiroŋ. 14 Mata bukanaku peh ka Buynumabu bata Emitay bureesunenem, buko kuñool Emitay. 15 Mata Buynumabu ba jiyaam, betukagawuul jiga emiikeelay ma jilaañ jîkoli, be mbi bugawuul jiga kuñool yo, ma mbi jeeli jîwoo'yo ma jeen yo: “Aba, Ampoom.” 16 Mata Buynuma'ubu bata Emitay, boo bulobem di ûyegetaw watoolaal ma bûyisolaal di kaan, ulaal kuñool yo. 17 Moo, non ma ugawaam kuñool yo, mbi uyabaal wahaw wa yemmi mbi ewul bukanaku kata yo, ban mbi uyabaa'wo di manor di Kristu, ulaal bamunteneraal ma ûlaamaal d'oo, ma mbi ooliyaal poop ôomiyaal di majaaŋaamu matawool.
Majaaŋaamu mâreesewuum
18 Mata înje nîmire kaan, hûlaamahu ha ûlaamalem di ho maame, heeliit hure di êriibiinaay yarem noon ya mbi ubajaal kajom. 19 Mata wahaw peh wa Emitay êwwemmi, wowu ma uhakemmi ma hukahu hûriiŋ ha mbi êyis bukanaku kagam kuñool yo. 20 Mata wahaw peh wa Emitay êwwemmi, ûnjariŋut ban makeel. Moo, ntuwa woo ûkimmom, be Emitay êkimmi ma weeno mo, 21 di kâynenaku di kaan, hukahu mbi hûriiŋ ha mbi wahaw uwu wa êwwemmi, uhikuli di humiikeelowutaahu hata makuuñaamu, ma wêemi di majaaŋaamu mata kuñool yo. 22 Mata nûmiraale kaan, wahaw peh wa Emitay êwwemmi, wowu ma ûlhiilem mata hûlaamahu non anñaakan ammi di hukahu hatawool. 23 Ntuwa wahaw uwu keb, be, be d'ulaal poop jayabaam bûtiyaar Buynumabu bata Emitay, ulaal poop mâlhiilaalem dâada d'ulaal, ma ukobaal hukahu ha mbi Emitay egawolaal kuñool yo, ma ehikul siniilasu satoolaal. 24 Mata, mata wahaw wa ukobaalem di wo, wowakiimom ma upakumaam. Mata ujukaa'jaa wahaw wa ukobaalem di wo, wahaw uwu wetukaga wahaw wakobeyim di wo. Kama an naaliye akob wahaw wa ajukem di wo? 25 Be ukobaa'jaa wahaw wa ujukorutaam, mbi ukobaa'wo di humuntenahu.
26 Moomu poop kaŋ ma Buynum Bunapaabu beenenewolaam mata ubajutaal sembe, ban ooliitaal ulhawaal Emitay jak, be boo ya bulhaw yo be batoolaal di humuntenahu haaliitum hulobi. 27 Mata Emitay yâhikulem sîsigir, êmire jak hunongoorahu hata Buynum Bunapaabu, mata boo balhawem be bata bukanaku kanapaaku non ma yoo enongum. 28 Malhegen nûmiraale kaan, di wah peh, Emitay ya ega wahaw wajakum be bata bukanaku kâkinyom, kaamom ka yoo êwoom non ma enongum. 29 Mata bukanaku ka Emitay êjotaalim, ban di êwojulaaliyiil ma keeli kunaamoor di Añool yo, ma mbi aali aga anaw âtiyaaraw di tutaru tata batiyaay bameeŋe. 30 Mata yoo êwoom bukanaku ka êwojulaalim; ban bukana'uku ka êwoom, di egawiil kuga bukanaku kacolum; bukana'uku ka egam kucol, di egawiil poop kubaj majaaŋaamu mata yo.
Emitay yoyu d'ulaal
31 Moo, di kayooŋ wahaw uwe, wa nooliyaam ulobaal? Ga jaa non Emitay yoyu d'ulaal, aymoom aalim âsuumutolaal? 32 Mata Emitay yalatutum di Añool yo anoraw, be di ewulolaawool ulaal poopolaal; moo, bu yeetubi ewulolaal wahaw peh di manor d'oo? 33 Kama ay aalim asoosen bukanaku ka Emitay ejotum? Mata yoo egawiim kuga bukanaku kacolum. 34 Ay mbi awuliil kûbajumiñ? Mata Kristu Jesus oo akeem di êkrusay, ban nâlhaalowul di kuketaaku; omu di kaŋen kûrir kata Emitay, ma alhawem di yo be batoolaal. 35 Wa mbi uwaasolaal di jâkinaju ja Kristu âkinolaam? Mante hûlaamahu? Mante mâsuumutamu? Mante jañaanuwaaju? Mante bacaarabu? Mante baakutabu bata wañ? Mante buhiiraabu? Mante kajaasiyaaku? 36 Non ma demmi ma ŋiicim kaan: “Hûrim jâkinaju ja ûkinim, ulumu di buhiiraabu hukoohuk non sîgaraniina sareesem ki siŋaali.” 37 Be di wahaw uwe peh, mbi uhaataa'wo mata anaw âkinolim. 38 Mata nîynene jak di kaan, palimo eketay, palimo eroŋay, palimo amalaak, palimo amal, palimo hukahu hata jaat, palimo hukahu hâreesewuum, palimo wahaw wata sembaasu, 39 palimo mâraagiyaamu mata hatiya, palimo mâlahamu, palimo wah wakeel wâwwenim, weeliit uwaasolaal di jâkinaju ja Emitay êkinolaam jammi di Kristu Jesus, agam Ata Emit atoolaal.