Romanus 7

Kaliikumaku kata bûyababu

Moo, kutiyaay ma iloo'di miwuul jâmiim kûboñaku kata Emitay. Malhegen kûboñaku kata Emitay ya kubaj sembe di anaw oo baroŋ ma arommi. 2 Moomu poop kaŋ ma anñaakanaw asoñom kemmi ma kusohoorum di anaw ayaboom mata kûboñaku kata Emitay, ânniinaaw umu atawool oo baroŋ ma arommi. Be ânniinaaw umu atawool akee'jaa, ña anñaakanaw umu kûboñaku kata Emitay kata bûyababu, ketukasohool. 3 Momakiimom anñaakanaw umu akay jaa ki asoño di ânniinaaw aahu, ban apañoorool omu to ma arommi, ña anñaakanaw umu mbi aani kâmooraaku nakayum. Be ga jaa non apañoorool akeem, ña anñaakanaw umu, kûboñaku kata Emitay kaloom mata bûyababu, ketukasohool; palimo oo asoñuwe di ânniinaaw aahu, aatubi aani kâmooraaku nakayum. 4 Moo, kutiyaay, moomu poop kaŋ ma miwuul jemmi ma jikeem di kûboñaku kata Emitay, mata ma jigam bukanaku kata eniilay yata Kristu. Mata jigawe ban bukanaku ka an aahu akiim, aamom alhaalellim di kuketaaku, ma mbi jeeli jiga wahaw wajakum be bata Emitay. 5 Malhegen, kâtiyaar na ya ugawaam non ma siniilasu satoolaal sîkimmi, ma ya ugawaal kûbajumiñaku ka kûboñaku kata Emitay kulhaalellom di siniilasu satoolaal, kagawewolaam ma ugawaal wahaw waŋarem an be eketay. 6 Be jaat nuhikulaali ban di kaŋenaku kata kûboñaku kata Emitay kapiyaaku kagenkeenolaam, mata nuketaale ban be bata ko, ma mbi ugorooraal be bata eroŋay yunkulay yata Buynumabu bata Emitay, ma uwalenaal kûboñaku kata Emitay ka usoheenaam kaŋiicim, kaŋiicŋiic.

Kûboñaku kapiyaaku, di kûbajumiñaku

7 Moo, bu mbi ulobaal? Soŋo kama kûboñaku kata Emitay, koo kûbajumiñaku? Mumulet! Mata kûboñaku kata Emitay kukiimom nîmirum kûbajumiñaku. Mata malhegen kaleteem mata ko, eetubi îmireen kâsiibowikoor wah wata an, koo baanutom: “Aatuba ûsiibuwikoor wah wata an.” 8 Be kûbajumiñaku di kusohum'to di kûboña'uku kapiyaaku, ma kûlhaalenul kânongikoor peh di eniilay yûmbaam. Mata ta kûboñaku kata Emitay kuleem, kûbajumiñaku poop di kuga non wahaw wakete. 9 Mata kâtiyaar na îmirutum kûboñaku kata Emitay, niroŋunoroŋunom, be na kûboña'uku kûrillom, ña kûbajumiñaku di kûroŋul, ma înje iket. 10 Malhegen kûboñaku kata Emitay ka mbi kuŋarellom eroŋay, be di kuŋallom eketay. 11 Mata kûbajumiñaku koo kûbajuntom di kûboñaku ma kubuntenom, ma kuŋar kûboña'uku kubujumom.

12 Malhegen kûboñaku kata Emitay koku ma kunapum, kûboñaku poop koku ma kunapum, di kucol, ban di kujak. 13 Moo, wahaw wajakaaw, di ulaañ uŋallom eketay? Mumulet! Mata kûbajumiñaku ma keeli kumanji, di kuŋar wahaw wajakaaw kubujumom, ma kûboñaku mbi keeli kugawolaal ma ûmiraal kaan kûbajumiñaku wahaw wâkoliyenim noon.

14 Moo, nûmiraale kaan kûboñaku kata Emitay wahaw wata Emitay, be înje ajamaataw nigam, anoomim ma aga amiikeelaw ata kûbajumiñaku. 15 Momakiimom ma înamulentummi wahaw wa mbi iga, mata wahaw wa îkimmi iga, îgaworiit wo, be waawu wa îkintum iga, wo wa igawem. 16 Moo, iga jaa wahaw wa îkintum iga, ña kama ilatut kaan, kûboñaku kata Emitay kujake. 17 Ban na mbi iga wo, non ntuwa înje igawom, be kûbajumiñaku kammi d'înje kokagawommi iga wo. 18 Malhegen înje nîmire kaan wah wakeel wajake ulet d'înje di hunoonahu hûmbaam. Mata di malhegen, ya îkin iga jak, be êeliyoriit iga mo, 19 majakaamu ma îkinem iga, be îgaworiit mo, ma ya iga keb majakutaamu ma îkintum. 20 Moo, iga jaa wahaw wa îkintum, nûmir kaan ntuwa înje igawem di wo, be kûbajumiñaku kammi d'înje koo kagawem di wo.

21 Malhegen înje nîmire wahaw wammi d'înje, mata ya îkin iga wahaw wajakaaw be êeliyoriit iga wo, mata majakutaamu momu d'înje. 22 Mata dâada d'înje, nîmire kaan nîkine kûboñaku kata Emitay, 23 be nijuke di humuumahu hûmbaam kûboñ kaaku kâpicoorem di kûboñaku kammi ban di bûyegetabu bûmbaam. Ban ya kuŋarom be di humiikeelowutaahu hata kûboñaku kata kûbajumiñaku kammi di humuumahu hûmbaam.

24 Înje nîñankiiteniye, ma igam ajamaataw! Aymoom a mbi ahikulom di eniila'uye yûmbaam, yaŋarem d'înje be di eketay? 25 Be Emitay jêrejep mata Jesus Kristu, agam Ata Emit atoolaal!

Mata di bûyegetabu bûmbaam, ya isoolhen kûboñaku kata Emitay, be hunoonahu hata eniilay hûmbaam, ya isoolhen kûboñaku kata kûbajumiñaku.