Kristu ahikulolaam di kañankiitaku
6
Moo, bu nooliyaam ulobaal? Soŋo mbi onkenaal ma ya ugawaal kûbajumiñaku, ma mbi kañankiitaku kata Emitay kuhaŋ to? 2 Mumulet! Ma ulaal uketaam ban di kajimaku kata kûbajumiñaku, bu nooliyaam joon onkenaal ma ugawaa'ko? 3 Kama jîmirut kaan ulaal peh jâbatisoraalim di Jesus Kristu, ulaa'ma ûbatiisoraalim poop di eketay yatawool? 4 Mata na ûbatiisuwaam, nohokooraali poop di eketay yatawool, ma mbi ooliyaal ureesaal di eroŋay yunkulay d'oo, non ma sembaasu sata majaaŋaamu mata Ampawool silhaalelloom di kuketaaku.5 Mata ubomooraal jaa di haanaahu hata eketay yatawool, moomu poop kaŋ ma mbi ubomooraal d'oo di haanaahu hata jalhaalaaju jatawool di kuketaaku. 6 Mata nûmiraale kaan haanaahu hapiyaahu hata kûbajumiñaku, huriiŋoori ban di manor di Kristu di êkrusay, ma mbi siniilasu satoolaal sata kûbajumiñaku siket, ma aatuba mbi ugawaal joon emiikeelay yata kûbajumiñaku. 7 Mata anaw akeem, aaliit ban aga kûbajumiñ. 8 Moo, ga jaa non nuketooraale ban di manor di Kristu, ûynenaal poop kaan, mbi uroŋooraal poop di manor d'oo. 9 Mata nûmiraale kaan, Kristu nalhaalowulo ban di kuketaaku, moo atunki aket joon, mata eketay ebajut ban sembe d'oo. 10 Mata na akeem, naket di hanor mata kûbajumiñaku. Moo, ma arommi, omu ma arommi be bata Emitay. 11 Moo, miwuul poop mo ma mbi jiga non bukanaku kakeem be bata kûbajumiñaku, be karommi be bata Emitay mata Kristu Jesus.
12 Momakiimom, mumulet bi nki jiwaa'bo ma kûbajumiñaku kuhaat siniilasu satawuul saketem, ma ya jiga joon wahaw wajakutaaw wa siniilasu sîkinem. 13 Ban poop, aatuba bi nki jiŋar kajim kakeel kata siniilasu satawuul, jiwalen di kûbajumiñaku, ma silaañ siga wahaw wa mbi ugoroorumi di majakutaamu. Be mowme ma jîcaalhellim ban di eketay be di eroŋay, mbi jiŋar ujimaw wata siniilasu satawuul jiwalen di uŋenaw wata Emitay, ma ya jiga wahaw wajakaaw. 14 Mata mumulet bi kûbajumiñaku kuhaatuul, mata jilee'ban di uŋenaw wata kûboñaku kata Emitay kapiyaaku, be miwumu di kañankiitaku kata Emitay.
15 Moo, mowme mbi oonaa'buu? Mbi onkenaal di kûbajumiñaku, mata ma uletaa'ban di uŋenaw wata kûboñaku kata Emitay, ma oomaal di kañankiitaku? Mumulet! 16 Kama jîmirut kaan, na mbi jiwalen siniilasu satawuul di uŋenaw wata anaw ma jiga bugorooraabu batawool, miwuul emiikeelay yata anaw umu mata ma jijamem d'oo? Moo, mbi jiga emiikeelay yata kûbajumiñaku kagawem an aket, be mante emiikeelay yata Emitay kajamem di yo, ma mbi jiga bukanaku kacolum? 17 Be oonaal Emitay jêrejep, mata miwuul noo emiikeelay yata kûbajumiñaku, be jaat jisohe ban jak di ûyegetaw watawuul elobay ya kulhikitenuum. 18 Moo, ma Emitay ehikuluum ban di kûbajumiñaku, jaat miwuul emiikeelay yata yo, ma mbi ya jiga wahaw wajakaaw. 19 Înje malobem di miwuul elobay ya jeelim jinamulen, mata jibajorut kanamulen ma mbi jinamulen wahaw peh. Mata noo, jiwalewaleneemmi siniilasu satawuul ma siga emiikeelay yata jâgawikooraju, di poop majakutaamu. Moo, mowme poop mbi jiwalen siniilasu satawuul ma siga emiikeelay yata Emitay, ma ya jiga wahaw wajakaaw, ma mbi jeeli jiga bukanaku kanapaaku.
20 Mata noo na jigawemmi emiikeelay yata kûbajumiñaku, an âwuloriituul batila miwuul bagawut wah wajake. 21 Ña wa jibaanom na ya jigam wahaw uwu wagawem an aket, wa jipuñuwem jaat kaga? 22 Be jaat Emitay ehikuluu'ban di kûbajumiñaku, moo, mowme jilaañe ban jiga emiikeelay yata yo. Moo, hunoonahu ha jibaam mowme, mbi hugawuul ma jiga bukanaku kanapum, ban mbi jibaj poop eroŋay yâbaworiitaay. 23 Mata bugalabu bata kûbajumiñaku, eketay, be wahaw wa Emitay ewulem wâncaamoriitim, eroŋay yâbaworiitaay, mata Kristu Jesus aamom Ata Emit atoolaal.