Emitay di ega kâsuumaayaku di ejamaatay
5
Moo, mata ma ugawaalim bukanaku kacolum mata kâynenaku katoolaal di Emitay, momakiimom ma ubajumaam kâsuumaayaku di yo, mata Jesus Kristu, 2 aamom agawolaam ma ubajaal kañankiitaku di yo, mata kâynenaku katoolaal. Moo, onkenaal ma usohaal kañankiita'uku, ma umaayooraal di wahaw wa ukobaalem di wo, ma mbi ôomiyaal di majaaŋaamu mata Emitay. 3 Nonkenaal poop ma umaayooraal na mbi ulakuwaal di hûlaamahu, mata nûmiraale kaan hûlaamahu, ya huga an ajuum tir, 4 jajuumaju jata tir, ya jiga poop an ahaat hûlaamahu, jahaataju jata hûlaamahu poop, ya jiga anaw akob wahaw, wâreesewuum; 5 jakobaju poop jata wahaw wâreesewuum, jîgaworiit an ma abeño, mata Buynum Bunapaabu ba Emitay ewulolaam, bobu ma bugam jâkinaju di sîsigirasu satoolaal.6 Malhegen, nownu ulaal babajutaal sembe, Kristu nakee'no be bata bukanaku kâmirutum Emitay. 7 Mata gîitiye ma baj anaw a mbi âketum mata anaw acolum. Be nakeel deeli baj anaw a mbi amunten ma âketum mata anaw âsummi. 8 Be Emitay di êyisolaal maama êkinolaam, mata ma Kristu akeem matoolaal, ulaal baroŋaal di kûbajumiñaku. 9 Moo, ma Emitay egawolaam bukanaku kacolum mata hûsimahu hata Kristu, ña mbi umellhaal poop di hubirikahu hata yo. 10 Malhegen ulaal kâtiyaar ûsuumoorutaal di Emitay, be di egawolaal ma ugawaal bapaalaayabu di yo, mata eketay yata Añool yo. Moo, ma ugawaam ban bapaalaayabu di yo, mo ma mbi upakumaal mata eroŋay yatawool. 11 Be ntuwa mata mo keb, be ûririgenaal poop di Emitay, mata Ata Emit atoolaal aamom Jesus Kristu, agawolaam ma ugawaal bapaalaayabu di yo.
Adoŋ koo di Kristu
12 Malhegen kûbajumiñaku koo kunebejulom di etaamay mata anaw anor, di kûŋarunenul eketay, momakiimom eketay di êkayil be bata ajamaat peh, mata an peh nabaje kûbajumiñ. 13 Be kûbajumiñaku kêemiyaali to bala kûboñaku kata Emitay kuwuli, momakiimom ta kûboñaku kata yo kuleem, Emitay êjikeroriit mata kûbajumiñ. 14 Malhegen kata kaŋ nata Adoŋ, be kaŋ nata Moyses, eketay di ehaat ejamaatay, be kaŋ di kaaku kagawutum kûbajumiñaku non ka Adoŋ agam, na ahuusuum Emitay. Ban Adoŋ oo agam êmanjumay yata Kristu a mbi âkayil.
15 Moo, wahaw wa Emitay ewuum, ugawut non hûbajumiñahu hata Adoŋ. Mata palimo ma bukanaku lhay kakeem mata hûbajumiñahu hata anaw umu anoraw. Be kañankiitaku kata Emitay kuhaŋe meeŋ, mata yoo ewuum kapakaku be bata bukan kameeŋe bancaamut, mata jâkinaju jata anaw umu anoraw aamom Jesus Kristu. 16 Malhegen wahaw wa Emitay ewuum, ûbutiye di hûbajumiñahu hata anaw umu anoraw, mata, mata hûbajumiña'uhu, hohakiimom ma mbi Emitay êgawum êsukay batalenabu, ma elesiil. Be palimo ma bukanaku kugam kûbajumiñaku lhay, be Emitay di eñankiitiil ma ewuliil kapakaku ma egawiil bukanaku kacolum. 17 Mata, mata kûbajumiñaku kata anaw umu anoraw, kokakiimom ma eketay êhaatummi ejamaatay peh, be di anaw anoraw poop aamom Jesus Kristu, bukanaku kûbajummi wahaw wahammi; mata bukanaku peh kayaam kañankiita'uku kâmakaaku kata Emitay, mbi kugawi bukanaku kacolum bancaamut makeel, ma mbi kêemi di eroŋay yâbaworiitaay, mata anaw umu anoraw aamom Jesus Kristu.
18 Malhegen non ma kûbajumiñaku kata Adoŋ kunebejulom di kûŋarunenul hûjimenahu be bata an peh, moomu poop kaŋ ma Jesus Kristu agam wahaw wajakum waŋarunellom kañankiitaku be bata an peh, ma ugawiil kuga bukanaku kacolum ma uwuliil eroŋay. 19 Moo, non ma anaw anoraw ahuusuum Emitay, nâŋarul kûbajumiñaku be bata bukan kameeŋe, moomu poop kaŋ ma anaw anoraw ajammi di Emitay, naga ma bukan kameeŋe mbi kugawi bukanaku kacolum.
20 Malhegen, kûboñaku kata Emitay koo kukaylom ma kuga kûbajumiñaku kuhaŋ mameeŋ di ejamaatay. Be ta kûbajumiñaku kuhammi mameeŋ di ejamaatay, kañankiitaku kata Emitay poop, ya kuhaŋ mâami to, 21 mata non ma kûbajumiñaku kugam ma eketay ehaat ejamaatay, moomu poop kaŋ ma kañankiitaku kata Emitay kuhaatuyom, ma kuga bukanaku kucol ma kubaj eroŋay yâbaworiitaay, mata Jesus Kristu aamom Ata Emit atoolaal.