Abrawoŋ anaw âynemmi
4
Moo, bu nooliyaam ulobaal, mata ampawolaal ahaan Abrawoŋ? Bu Emitay ejukoom dêeni? 2 Ga jaa non Abrawoŋ, mata wahaw wa agawem wo wa ajukumim non anaw acolum, naali asalooro, be kayooŋ di Emitay, aaliit asalooro. 3 Kama Baŋiicerabu Bâñoyyaabu bu buloom? Beene: “Abrawoŋ oo âynemmi Emitay, momakiimom ma Emitay esohumoom non anaw acolum.” 4 Mata anaw agoroorum, bancaamabu ba mbi ancaami, betuubi bi buga non wahaw wa anaw awuloom kawulwul, be mbi buga bata bugoroorabu ba agoroorum. 5 Anaw agawutum wah, ban nâynen Emitay yagawem anaw âlhapitaaw ma acol, kâynenaku katawool mbi kugawool ma esohool non anaw acolum. 6 Moomu poop kaŋ ma David aloom, na añaaŋemmi kaan anaw a Emitay esoom non anaw acolum, yoo bajikerut di wahaw wa agam, anaw umu nabaje hûpiira. Na aloom umu nâanul:7 “Bukanaku ka majakutaamu matayiil muñankiitim, kûbajumiñaku katayiil poop di kupasi, kubaje hûpiira.
8 Anaw a Ata Emit awulutum batila mata kûbajumiñaku katawool, nabaje hûpiira.”
9 Kama hûpiiraahu hûkayumul keb be bata bukanaku kagawim huhaanaahu hata yîinaay? Be mante poop be di bukanaku kagawutihom? Ulaal oonaam, Abrawoŋ oo âynemmi Emitay, mo ma esohumoom non anaw acolum. 10 Kama ûney na kâynenaku katawool kugam ma Emitay esohool non anaw acolum? Kama oo ma agawim ban huhaanaahu hata yîinaay, be mante oo bagaworuti ho? Ntuwa oo ma agawihom ban, be oo bagaworuti ho. 11 Malhegen Abrawoŋ oo agawim huhaanaa'uhu hata yîinaay, ma huga êmanjumay yâyisum kaan oo anaw acolum, mata kâynenaku ka âynemmi oo bagaworuti ho, ma mbi aali aga ampaw bukanaku peh kâynemmi kagawutim huhaanaahu hata yîinaay, ma mbi buko poop kusohi non bukanaku kacolum. 12 Naga poop ampaw bukanaku kagawutim huhaanaa'uhu hata yîinaay, ma mbi keeli kusoollhen kâynenaku ka oo ampawolaal Abrawoŋ abaanom oo bagaworuti huhaanaa'uhu hata yîinaay.
13 Mata na Emitay eloom Abrawoŋ kaan, etaamay mbi ega yatawool, koo di êbajoorumay yatawool, elobutoo'mo mata ma asoom kûboñaku kata yo, be mata ma esohoom non anaw acolum, mata ma âynemmi. 14 Moo, ga jaa non bukanaku kasoom kûboñaku kata Emitay, buko mbi kuŋar etaamay, ña kama kâynen abajut makeel, wahaw poop wa yoo emmi mbi ewul, ûnjariŋut makeel. 15 Mata kûboñaku kata yo, ya kuga yo ma ebirik di bukanaku, be ta kûboñaku kata yo kuleem, jahuusuu'ko poop jilet.
16 Momakiimom ma wahaw wa Emitay yemmi mbi ewul, mbi uyabi bancaamut makeel mata kâynenaku, ma êbajoorumay peh yata Abrawoŋ, mbi kêemi di wo. Moo, wahaw uwu, ntuwa be bata bukanaku kasoom kûboñaku kata Emitay keb, be be bata poop bukanaku kâynemmi non Abrawoŋ, mata oo agam ampaw êsukay peh. 17 Mata Baŋiicerabu bâñoyyaabu moo buloom kaan: “Înje mbi igawi ampaw bâsukabu lhay.” Malhegen Emitay yagawem bukanaku kakeem ma kuroŋ, di ega poop wahaw wabajutum ma ubaj, esoosoom Abrawoŋ non Ampaw êsukay peh mata ma âynemmi. 18 Abrawoŋ oo âynemmi maama Emitay eloboom kaan mbi egawool ampaw bâsukabu lhay, ban palimo ma gîitiyoom ma âynen mata wo, be nâynen. 19 Ban kâynenaku katawool kuŋasowut, palimo ma âmiim kaan eniilay yatawool yoyu ma ehallemmi, ban poop oo baakut ban sembe, mata oo ma ahuutum ban ujaañaw êteemeer, (100) ajikerut poop maama Saara ahallemmi. 20 Be palimo magam umu, Abrawoŋ âlandeelut, be nahaŋ mâynen mata wahaw wa Emitay eloboom mata wo. Ban ya asal yo, 21 mata nâmire jak di malhegen kaan, wahaw wa Emitay eloboom mata wo, ebaje sembe ma ega wo. 22 Momakiimom poop ma Emitay esohumoom non anaw acolum mata ma âynemmi.
23 Moo, ntuwa mata Abrowoŋ keb muŋiicim kaan oo anaw acolum, 24 be, be d'ulaal poop ja Emitay esoom non bukanaku kacolum, mata ma ûynenaam Emitay yalhaalellom Jesus di kuketaaku, agam Ata Emit atoolaal. 25 Aamom awulim ma aket hurim kûbajumiñaku katoolaal, ban nalhaalelli di kuketaaku ma agawolaal bukanaku kacolum.