Hûpiiraahu hata jûdewwi
3
Moo, kama wah bu wento, an bagawer jûdew?Kama huhaanaahu hata yîinaay, wa hubaje? 2 Malhegen, wah wameeŋe wowu to. Be wahaw ûtiyaaraw, mata ma Emitay ewuliim elobay yata yo. 3 Moo, bukan kaaku kûynent jaa Emitay, mo ma mbi mukiimo ma yoo etukaga anaw âynenaayaw? 4 Mumulet! Mata Emitay yoo anaw alhegenumaayaw; be ejamaatay peh ya kucal. Momakiimom di ŋiici kaan:
Mbi ugawi anaw acolum mata baloberabu batayi,
di kugawi poop batalenabu nukooŋ.
5 Be ga jaa non mata wahaw wajakutaaw wa ugawaalem, mbi uga ma mâsuumamu mata Emitay muhaŋ majuki, ña mbi oonaal bu? Be ebirik jaa d'ulaal ma elesolaal, mbi oonaal pîya egawut jak? (Ilob ume di balober ajamaat.) 6 Be mumulet! Mata ga jaa umu, bu mbi Emitay ega batalenabu êsukay?
7 Be ga jaa non macalamu mûmbaam mugawem ma malhegenumaayamu mata Emitay muhaŋ majuki, ma kañaaŋaku kata yo mbi kuhaŋ masali, moo mata wa di esohumom non an ata kûbajumiñ? 8 Kama mata wa ma otumbi oonumaal: “Ugawaal kôji ma mbi mâsuumaamu muhaŋ majuki?” Malhegen bukan kaaku mo ma kusoosenewolaam ma kêenul mo ma ulobaalem. Be bukana'uku mbi kûjimeni non ma kujoonum.
An peh nabaje kûbajumiñ
9 Moo, bu nooliyaam ulobaal? Soŋo ulaal jagawaam jûdewwi, nuhaŋaale ma ga bukan, bukan kaaku kagawutum jûdewwi? Iyiy, ntuwa moo! Ûli nûyiise ban kaan, bukanaku kagam jûdew, di kaaku kagawutum jûdew, buko peh kûbajumiñaku koku ma kulhopeniim, 10 non ma demmi ma ŋiicim kaan:
“Bajut an aakut kûbajumiñ, bajut kaŋ kuur.
11 Bajut an akeel anamulemmi,
bajut poop an akeel apaamem Emitay.
12 Mata bukanaku peh, koku ma kûcaam di buruŋabu bata Emitay,
bajut an agawem jak,
bajut an kaŋ kuur.
13 Di utumaw watayiil, ya kulob put non êluŋ yâbaahuli.
Ya kulob keb mûcalamu,
mata busikabu bata silunasu bobu di utumaw watayiil.
14 Ban ya kûlobikoor kurimaku kajakutaaku, kâsuumutum kajam, kagawem an âbirikikoor.
15 Ban di kuga bukanaku kahilem kabuj bukan.
16 Tiŋootiŋ ta mbi kukay, ya kukajen keb, ma ya kuga bukanaku hûlaamahu.
17 Kûmirut buruŋ bata kâsuumaay.
18 Ban kûkoliyoriit poop Emitay.”
19 Moo, nûmiraale kaan wahaw wa kûboñaku kata Emitay kuloom, kuloo'wo be bata bukanaku kagawem kûbajumiñaku, ma mbi an peh apato, ma ejamaatay peh kammi di etaamay, mbi kugawi batalenabu kayooŋ di Emitay. 20 Momakiimom an aatuba ajuki non an acole di Emitay mata ma asoom kûboñaku kata kapiyaaku, mata koo ya kûyisolaal keb kûbajumiñaku.
Maama Emitay egawem an aga anaw acolum
21 Be, mowme Emitay êyiise ban maama egawem ma an acol, ntuwa mata kûboñaku kata Emitay. Mata kûboñaku kata yo, di poop buñaaŋenaabu bata kûboñaku kata yo, moo kuloom. 22 Mata Emitay ya ega bukanaku kâynemmi Jesus Kristu, ma kuga bukanaku kacolum; mata êgaworiit ejuu'di bûul, be ya ega mo be bata an poopool âynenyom. 23 Mata bukanaku peh kubaje kûbajumiñ, moo an aaliit abaj hunoonahu hata majaaŋaamu mata Emitay. 24 Be di egawiil bukanaku kacolum bancaamut makeel mata kañankiitaku kata yo, hurim mata Jesus Kristu apakeniim. 25 Mata Jesus Kristu oma Emitay ewulolaam ma abuji, ma bukanaku mbi kûynenool, kûbajumiñaku katayiil di kupasi, mata hûsimahu hatawool. Mata di hûsimahu hatawool, Emitay êyiisummi maama egam anaw acolum. Momakiimom mata bâhakendiitabu bata yo, mo ma êlesutunom bukanaku mata kûbajumiñaku ka kuganom. 26 Be jaat êyiise macolamu mata yo, mata ma egam anaw acolum, ban poop ya ega bukanaku kâynemmi Jesus, ma kuga bukanaku kacolum.
27 Moo, mata wa ma bukanaku kugawoorowumem? Kagawooro alet ute! Kugawooro mata wa? Soŋo pîya mata ma kusoom kûboñaku kata Emitay? Iyiy! Be mata kâynenaku. 28 Moo, nunamulenaale kaan, di malhegen an ya agawi ma aga anaw acolum, mata kâynenaku, be ntuwa mata jagawaju jata non ma kûboñaku kata Emitay kuloom.
29 Kama Emitay, yoo yata bukanaku kagam jûdew keb? Kama egawut poop Emitay yata bukanaku kagawutum jûdew? Malhegen, yoo poop kaŋ yata bukanaku kagawutum jûdew. 30 Mata Emitay yeemo yanor, yagawem bukanaku kagam jûdew ma kucol mata kâynenaku, di ega poop bukanaku kagawutum jûdew ma kucol, mata kâynenaku. 31 Moo, kama ulaal unepenaalem di kûboñaku kata Emitay, mata kâynenaku? Mumulet! Be mbi ga ma kuhaŋ mabaj sembe.