Kûbajumiñaku kata jûdewwi
2
Moo, aw jagam ajamaataw jawulem bukan kûbajumiñ, uga non ma ugawe, mumulet bi ubajut batila. Mata nutahooruwe di kûbajumiñaku; mata ya uwul bukanaku kûbajumiñaku, ban ya uga non ma buko kugawem. 2 Malhegen nûmiraale kaan, Emitay ekooŋe na mbi ewul kûbajumiñaku bukanaku kagawem wahaw uwu. 3 Moo, aw jagam ajamaataw jawulem kûbajumiñ bukanaku kagawem wahaw uwu, ban aw ya uga non buko, soŋo pîya noone mbi umelh di batalenabu bata Emitay? 4 Be pîya aw umu ma ukaalemmi mâsuumamu mâmakaamu mata Emitay, di poop ma emuntenem d'ulaal? Ûmirut kaan mata mâsuumamu mata yo, mo ma êkinummi ma mbi uwatatenooro? 5 Be mata ma bûyegetabu batayi bankum, ban poop nûgiiti kûlob, momakiimom ma mbi ûgawum Emitay ma ehaŋ mabrik d'aw nata hukahu ha mbi êwalenul hubirikahu hata yo di êsukay, ma ega bukanaku batalenabu bata yo bacolaabu. 6 Mata Emitay mbi encaam anoowan wahaw wa agam. 7 Ban poop mbi ewul eroŋay yâbaworiitaay bukanaku kankenem ma ya kuga jak, ma kupaam majaaŋaamu, di kasalaku, di poop eroŋay yâbaworiitaay. 8 Be bukaaku kagawem wahaw wa kûkimmi, kâkintum kusoollhen malhegenumaayamu, ma kûkin keb majakutaamu, Emitay mbi êwalenul hubirikahu hata yo di buko, ma elesiil. 9 Mata hûlaamahu, di hûsonjaahu, mbi hûlowum bukanaku peh kâgawikoorem, cûkum di jûdewwi, ban kaaku kagawutum jûdew. 10 Be bukanaku kagawem jak, mbi kubaj êriibiinaay, di kasalaku, di poop kâsuumaayaku, cûkum di jûdewwi, ban kaaku kagawutum jûdew. 11 Mata Emitay êgaworiit ejuu'di buul.12 Mata bukanaku peh kalom di kûbajumiñaku bâmirut kûboñaku kata Emitay, mbi kûjimeni di bâmirutabu bata ko. Be bukanaku poop peh kâmiim kûboñaku kata yo, ban di kulo di kûbajumiñaku, mbi kugawi poop batalenabu di kûboña'uku kata yo. 13 Mata ntuwa jajamaju keb jata kûboñaku kata Emitay, jigawem bukanaku ma kucol di yo, be jagawaju jata non ma kûboñaku kata yo kuloom, jojagawem bukanaku ma kucol di yo. 14 Malhegen bukanaku kagawutum jûdew, kûmirut kûboñaku kata Emitay. Be di banongerabu batayiil, kuga jaa non ma kûboñaku kata Emitay kuloom, palimo ma kûmirutukom, buko kumuumiil kugam kûboña'uku be batayiil. 15 Moo, yîse kaan wahaw wa kûboñaku kata Emitay kuloom wowu ma uŋiicim di sîsigirasu satayiil. Mata ûyegetaw watayiil ya ûyisiil kaan, wahaw uwu malhegen, momakiimom naanu ûyegetaw watayiil ya uwuliil kûbajumiñ, naanu di ukooŋeniil. 16 Moomu poop kaŋ ma mbi ga na mbi Emitay êboñul Jesus Kristu, bi aga batalenabu ejamaatay wahaw wa kugam wâñoorim, non ma elobay yâsuumaay ya iñaaŋenem eloom.
Huhaanaahu hata yîinaay halhegenumaayahu
17 Moo, aw jaanem aw jûdew, jâynemmi kûboñaku kata Emitay, jagawooruwem mata yo; 18 jalhikitenim jak kûboñaku kata Emitay, ma ûmir wahaw wajakaaw wa yoo êkimmi. 19 Ban nûynene di kaan, aw ya ureesunen bûpuumaabu, nuga poop noon ehikitenumay yata bukanaku kammi di emuucenay; 20 nuga alhikitenaaw ata bukanaku kânuutuwaaku, di bulhikitenaabu bata balaabu, mata, mata kûboñaku kata Emitay, mo ma ûnamulenummi wahaw peh, nûmir poop malhegenumaayamu. 21 Moo, aw jalhikitenem bukanaku, mata wa ma ôoliitummi ulhikitenooro? Aw jalhikitenem bukanaku ma aatuba kûkuut, ban aw ya ûkuut? 22 Aw jaanem bukanaku keetuba kukay kâmoori, mata ñônñoy, ban aw nukay ko? Aw jalatum ban ûkiinaw, ban ya ûkuut wahaw wata dô? 23 Aw jasalooruwem mata kûboñaku kata Emitay, ban ya uhuusuu'ko ma urembeel yo? 24 Non ma ŋiicim kaan: “Bukanaku kagawutum jûdew, mbi kûlobikoor Emitay matawuul.”
25 Mata anaw asoo'jaa kûboñaku kata Emitay, huhaanaahu hata yîinaay, mbi hûnjariŋ d'oo, be anaw ahuusulekom, huhaanaahu hata yîinaay hûnjarinŋut d'oo makeel. 26 Moo, anaw agawutim huhaanaahu hata yîinaay, ban nasoh kûboñaku kata Emitay, anaw umu aanowut non anaw agawim huhaanaahu hata yîinaay? 27 Momakiimom anaw agawutim huhaanaahu hata yîinaay di eniilay yatawool, ban nasoh kûboñaku kata Emitay, mbi awuli kûbajumiñ aw jagawim huhaanaahu hata yîinaay di eniilay yatayi, ban ya uhuusul kûboñaku kata Emitay kammi ma kuŋiicim di êsigiray yatayi. 28 Mata jûdew, ntuwa anaw agawoom keb di hûmuumuum, ntuwa poop mata ma agawim huhaanaahu hata yîinaay hagaweyim tîyaŋ di eniilay. 29 Be jûdew, anaw agawoom dâada di êsigiray, aamom agawim huhaanaahu hata yîinaay di êsigiray yatawool, hurim wahaw wa Buynum Bunapaabu bugawem, be ntuwa mata kûboñboñ kaŋiicim. Mata anaw umu, ntuwa ajamaat asalewoom, be Emitay esalewoom.