KAYTAKU KA PAWLU AŊIICUM BE BATA GRÎSIYA YATA
ROOMA
Pawlu nasaap grîsiya yata Rooma
1
Înje Pawlu jagam agorooraaw ata Jesus Kristu,a jâwoolim ma iga amakaaw atawool, jâwojulim be jañaaŋenaju jata elobay yâsuumaayb yata Emitay, 2 yaamom ya yoo êlobaalim di Baŋiicerabu Bâñoyyaabu bata buñaaŋenaabu bata kûboñaku kata yo di kaan mbi ewul. 3 Eloba'uyu yâsuumaay yaloom mata Añool yo aamom Jesus Kristu, agam Ata Emit atoolaal, abajim non ajamaat di êbajoorumay yata David. 4 Be mata ma alhaalowulom di kuketaaku, hurim Buynumabu banapenem, di yîs di sembe di kaan, oo Añool Emit. 5 Mata, matawool, mo ma Emitay eñankiitumommi ma egawom âmakaaw ata Jesus Kristu, mata jâkinaju jatawool, ma mbi iga bukanaku peh kata bâsukabu kûynenool, di kujam poop d'oo. 6 Non ma miwuul poop jata Rooma jîwoolim di manor di buko, ma mbi jiga bukanaku kata Jesus Kristu. 7 Momakiimom ma iŋiicumuluum kayta'uke be bata miwuul peh jammi Rooma, jaamom ja Emitay eboolaatum, ma êwooluul ma jiga bukanaku kanapaaku. Moo, kañankiitaku, di kâsuumaayaku kata Emitay, yagam Ampawolaal, di Ata Emit aamom Jesus Kristu, kulako di miwuul.Pawlu nâkin ajuk bûynenaabu bata Rooma
8 Moo, bala een enken ma ilob, nisal Emitay mata Jesus Kristu matawuul peh, mata âmbasuk peh ya kulob mata kâynenaku katawuul. 9 Mata Emitay yûmbaam yoo egam ajuumaaw ûmbaam, yaamom ya înje igam bûyegetabu bûmbaam peh di bugoroorabu bata yo, ma ya iñaaŋen elobay yâsuumaay yata Añool yo. Yoo êmire kaan nanoonan ya iwollhowuul 10 di kalhawaku ka ilhaweyom. Ya ilhaw yo ma iga non ma yoo êkimmi, ma huk hakeel di ewulom buruŋ ma îkayil bi ijukuul. 11 Mata nîkine noon ijukuul, ma mbi eeli ibaŋenuul wahaw wakeel wa Buynum Bunapaabu buwulem, ma mbi jeeli jihaŋ mâlhiŋ. 12 Malhegen wahaw wa îkimmi, ma mbi ulaal peh ûnikenooraal, ma miwuul jînik mata kâynenaku kûmbaam, înje poop nînik mata katawuul.
13 Kutiyaay, nîkine ma jîmir kaan kukaku kameeŋe ka inongum ma îkayil bi iyuugenuul, be ibajut buruŋ. Mata nîkine poop ma bugoroorabu ba igoroorum tutaru tatawuul, bubaj sembe non ma ba igam tutaru tata bukanaku kagawutum jûdew bugam. 14 Mata înje, bugoroorabu bûmbaam, bata ma iñaaŋen elobay yata Emitay be bata ejamaatay peh, kammi di prasaay, di kaaku kammi di bujalabu, di kakayum elekooray, di poop kaaku kakayutuyom. 15 Momakiimom ma îkinummi poop noon iñaaŋenuul elobay yâsuumaay miwuul jammi Rooma. 16 Mata îpuñuworiit kalob elobay yâsuumaay yata Kristu, mata yoo egam sembaasu sata japakenaju jata bukanaku kâyneyom, cûkumul di jûdewwi, ban kaaku kagawutum jûdewwi. 17 Malhegen elobay yâsuumaay êyiisem maama Emitay egawem an aga anaw acol di yo. Mata di kâynenaku keb egawem an acol, non ma demmi ma ŋiicim kaan: “Anaw acolum, ya aroŋ mata kâynenaku.”
Kûbajumiñaku kata ejamaatay
18 Mata ûdu hatiya di emitay, Emitay êyisuyisum hubirikahu hata yo ha ebirikum di ejamaatay mata wahaw peh wacolutum wa kunongem, di poop waawu wa kugawem, ma kulat malhegenumaayamu. 19 Mata wahaw wa bukanaku keelim kûmir mata Emitay, buko kûmii'wo mata yoo êyisiiwom. 20 Mata kata kaŋ na êwwemmi etaamay, hunoonahu, di haanaahu hata yo hâjukoriitim, di poop sembaasu sata yo santom be nanoonan sîmiri. Moo, wahaw uwu peh wa êwwemmi ugawe ma êmiri kaan yoo Emitay. Momakiimom bukana'uku kalatuyom, mumulet bi kumelhoor kûbajumiñaku. 21 Mata kûmire Emitay jak, be kûsohoriit yo non Emit, ban poop kûbinkenoriit yo. Mata kunongooraku katayiil koku ma kûguulhoorum; sîsigirasu satayiil poop di simuucen. 22 Be ya kêenul buko bukanaku kajaalhom, ban koku ma kûnuutom. 23 Mata mbi ya kusaleen Emitay yâketoriitum, be di kutiinoor kasalaku kata yo, ma kusal ûkiinaw wacookoorim unaamoor di ajamaat aketem, di basuwaabu, di uncaamaw, di poop bânunkureŋabu bâhuuloorem.
24 Momakiimom, ma Emitay êwalhumiibom ma ya kûgawikoor ma ya kuga non ma siniilasu satayiil sîkimmi, ma ya kugawooro epuñaay. 25 Mata ya kutiinoor malhegenumaayamu mata Emitay di mûcalamu, ma ya kûbinken, di kusal poop wahaw wâwwenim ma kuwaa'bo Âwwenaaw a mbi asali be nanoonan. Amiin.
26 Mata ma kugawem wahaw uwu, momakiimom Emitay di ewalhii'bo di kâgawikoora'uku ka siniilasu satayiil sîkinem. Mata palimo yaaraay yatayiil, di kutiinoor bagawerabu bata kâmooraaku non ma ajamaat agawem, ma kuga baabu ba ajamaat âgaworiitum. 27 Yîinaay poop, di kuwaa'bo bagawerabu ba ajamaat agawem di anñaakan, ma siniilasu satayiil sigawiil ya kûgawikoor, ma ya kuga ânniinaaw di kukumen di apaalool ânniine. Momakiimom ma Emitay mbi elesumiil mata kâgawikoora'uku.
28 Ban poop ma kûkinoriitum kûmir mata Emitay, momakiimom ma êwalhumiibom di kânongikoora'uku ma ya kuga wahaw wajakutaaw. 29 Mata ûyegetaw watayiil wowu ma wemmi huc wâhikooraw peh wajakutaaw, kâmooraaku, di kâgawikooraku, di jangooŋutenaju, di malesamu, di jâsiibuwikooraju, di jabuj bukan, di bacecabu, di macalamu, di êwulaataay; 30 di kuga bukanaku kasoosenem bukan, katemem bukan, kâkintum Emitay, kâjamaatim bukan, kagawooruwem, kahiikubiim, kâcukem silob, kâjamoriitum di kubajayiil; 31 di kûnuuto, di kuga bukanaku kâynendiitim, kâkineriitum bukan, ban poop kûñankiitoriit bukan. 32 Mata bukana'uku kûmire jak kûboñaku kata Emitay kaloom kaan, bukanaku kagawem wahaw uwe joone ma kuket, ban poop ntuwa mata ma kugawewom, be ya sûumiil ma bukan kaaku kuga wo.