Aatuba jiwul kûbajumiñ kutiyuul
14
Moo, mbi ya jisoh jak bukaaku ka kâynenaku katayiil kankutum, aatuba mbi ya jiga bûñoosoor di buko mata wahaw wa kunongum. 2 Mata an aahu, nâynen kaan naaliye ari wah peh, be aahu a kâynenaku katawool kankutum, nâanul mbi ari keb wahaw wapaaseneyim di siwoortaasu. 3 Moo, anaw ariyem wah peh, aatuba abes aahu âriyoriitum wah peh; aahu poop ammi mbi ya ari keb wahaw wapaasenim di siwoortaasu, aatuba awataten aahu ariyem wah peh, mata Emitay esohool non Añool yo. 4 Kama aw aymoom ja mbi uwataten agorooraaw ata an aahu? Mata ajuum jaa, be mante na alo, omu di kaŋenaku kata anaw akiloom. Be mbi ajuum, mata Ata Emit nabaje sembe ma ajuumenool.5 Mata an aahu, nâanul kukaku peh kanoraku, be aahu nâanul huk haahu, huhaŋe haahu. Moo, ânoowan jake ma âynen hunongahu hammi di bûyegetabu batawool. 6 Mata anaw aanem huk haahu huhaŋe haahu, ya aga mo be bata Ata Emit; anaw ariyem wah peh, di poop aahu ammi mbi ya ari keb wahaw wapaasenim di siwoortaasu, ya kuga mo be bata Ata Emit, mata buko peh ya kusal Emitay. 7 Mata an akeel ata d'ulaal, âroŋoriit be batawool, an akeel poop âketoriit be batawool. 8 Mata uroŋaal jaa, nuroŋaal be bata Ata Emit; uketaal jaa poop, nuketaal be bata Ata Emit. Moo, palimo uroŋaal, be mante nuketaal, ulaal peh jata Ata Emit. 9 Momakiimom ma Kristu âketummi, ban nâroŋul joon, ma aali aga Ata Emit ata bukanaku kakeem, di poop kaaku karommi. 10 Moo, mata wa ma mbi uwulum kûbajumiñ atiyi? Aw poop mata wa ma mbi ûrembeelum atiyi? Mata ulaal peh, mbi ujuumaal di kâyyaku kata batalenabu bata Emitay, ma egawolaal batalenabu. 11 Non ma ŋiicim kaan:
“Înje Ata Emit ninuure di kañaaŋaku kûmbaam di kaan, an peh mbi âtiigen kayooŋ d'înje,
an poop peh, mbi arej kaan,
înje igam Emitay.”
12 Mata anoowan ata d'ulaal mbi alob matawool kayooŋ di Emitay.
Aatuba uga an ma alo di kûbajumiñ
13 Moo, aatuba mbi uwulaal joon an akeel kûbajumiñ. Be mbi ujaamuwaal ma aatuba mbi ugawaal kutiyolaal kugolimbenoor ma kulo di kûbajumiñaku. 14 Mata, mata kasohooraku kûmbaam di Ata Emit, aamom Jesus, înje nîmire jak kaan, wah ulet wata huri wa Emitay êkintum ma uriyi. Be anaw anong jaa di kaan, wah wakeel ujakut kariyi, ña d'oo ujakutum. 15 Moo, uga jaa atiyi ma aga ñânkiiteni mata wahaw wa urim, non ulee nuga non ma jâkinaju jiloom. Mata mumulet bi uga atiyi a Kristu akeem matawool, ma anep mata wahaw wata huriyahu. 16 Moo, aatuba jiwaa'bo ma bukanaku kûlobikoor mata wahaw wajakum be batawuul. 17 Mata kâyyaku kata Emitay, ntuwa wah wata huri, ntuwa poop wah wata basiben, be ma anaw abaj eroŋay yacolum, di kâsuumaayaku, di poop hûririgenahu hata Buynum Bunapaabu. 18 Mata anaw agoroorem umu be bata Kristu, Emitay ya êririgen d'oo, êsukay poop ya êkinool.
19 Moo, jake ma ya upaamaal wahaw waŋarewulolaam kâsuumaayaku, di ugawolaal poop ma ya onkunenooraal di kâynenaku. 20 Moo, aatuba jikajen bugoroorabu bata Emitay mata wahaw wata huriyahu. Malhegen wah peh wata huri, weeliye uriyi, be jakut ma uri wahaw waalim uga anaw alo di kûbajumiñaku. 21 Momakiimom, haŋ majak ma aatuba utokoñ eluw, aatuba ujaken bunuk, aatuba uga poop makeel maalim muga atiyi alo di kûbajumiñaku. 22 Moo, kâynenaku ka ookum, mbi kulako be batayi, miwuul di Emitay. Be anaw âwulooruweriitum kûbajumiñ mata wahaw wa ajuum kaan ujake, nabaje hûpiira. 23 Be poop anaw âlandeelum, ariyi jaa wah waawu, mbi awuli kûbajumiñaku, mata ariit wo di kâynenaku. Mata wah peh wakaymulootum di kâynenaku, wahaw uwu kûbajumiñaku.