Hunongoorahu hajakum
15
Moo, ulaal jaamaam ma ujuumaam jak di buruŋabu bata Emitay, jake ma oonenaal kaaku kaleem ma kujummi jak. Mata mumulet bi ya ugawaal wahaw wa mbi ugawolaal keb ûririgenaal. 2 Be jake ma anoowan aga wahaw wa mbi apaalool âririgen, ma aali aanenool ma kâynenaku katawool mbi kukooben. 3 Mata Kristu poop, agawut wahaw wa mbi ugawool keb âririgen, be naga non ma Baŋiicerabu Bâñoyyaabu buloom kaan: “Kûgelaku kata bukanaku kâgelikoorim, kulowe d'înje.” 4 Mata wahaw peh waŋiicim kâtiyaar di elobay yata Emitay, uŋiici be bata jalhikitenaju jatoolaal, ma mbi ooliyaal ûnikaal, nubajaal poop sembe ma ukobaal wahaw wâreesewuum. 5 Moo, Emitay yagawem an âtik, naali poop humunten, di êtikenuul ma egawuul jibaj ûyegetaw wanoraw ma jijamoor, ma jisoollhen bagawerabu bata Kristu. 6 Ma mbi jeeli jibom hurim hanor ma jisal Emitay yagam Ampaw Ata Emit atoolaal, aamom Jesus Kristu.Elobay yâsuumaay be bata ajamaat peh
7 Moo, jake ma aatuba jilatoor non ma Kristu alatutuum, ma mbi Emitay eeli esali. 8 Nîkine eenuul, Kristu oo alammi aga agorooraaw ata jûdewwi, ma aali âyis kaan, Emitay yoo anaw alhegenumaayaw, ma aga non ma yoo eloom simpawolaal sihaan; 9 ma mbi bukanaku kagawutum jûdew, kusal Emitay mata kañankiitaku kata yo. Ma deeli ga non ma Baŋiicerabu Bâñoyyaabu buloom di kaan:
“Momakiimom ma mbi isalummi di tutaru tata bukanaku kagawutum jûdew,
niyeeŋ poop ma isal kañaaŋaku katayi.”
10 Di bêenul poop:
“Miwuul jagam bukanaku kagawutum jûdew,
jimaayoor ma jisal Emitay,
di manor di bukanaku kata yo.”
11 Di bulancen joon ma bêenul:
“Bukanaku peh kagawutum jûdew,
kusal Ata Emit!
Bukanaku kata bâsukabu poop peh, kusalool.”
12 Isayiyas poop nâanul:
“Mbi baj anaw ata di êbajoorumay yata Jese,
a mbi aga annahaanaw ata bukanaku kagawutum jûdew,
a mbi kuga ûyegetaw watayiil d'oo.”
13 Moo, Emitay yawulem an sembaasu sata jakobaju, di emeeŋen sîsigirasu satawuul êsuumaay, di poop kâsuumaayaku mata ma jîyneyom, ma mbi jihaŋ mabaj sembe di jakobaju ja jikobem di jo, mata sembaasu sata Buynum Bunapaabu.
Pawlu nalob mata bugoroorabu batawool
14 Kutiyaay, înje nîmire kaan, miwuul bukanaku kajakum ûyeget, ban di jiga bukanaku kanamulemmi, kaalim kuwuloor hurim. 15 Momakiimom nisoken ma iŋiiculuul kayta'uke ma iwolhenuu'wo, mata kañankiitaku ka Emitay ewulommi, 16 ma egawom iga agorooraaw ata Kristu Jesus, ma iŋar elobay yatawool be bata bukanaku kagawutum jûdew, ma iñaaŋeniil elobay yâsuumaay yata Emitay, ma mbi keeli kuyabi non opherta ya Buynum Bunapaabu bugam ma enap. 17 Moo, neeliye igawooro mata kasohooraku kûmbaam di Kristu, mata bugoroorabu ba awulommi iga. 18 Mata etukasoken ma ilob makeel, be mbi ilob maama Kristu agam mata bugoroorabu bûmbaam, ma eenen bukanaku kagawutum jûdew ma kujam di Emitay, mata elobay ya iñaaŋemmi, di bugoroorabu, 19 di sembaasu sata sîmanjumasu, di poop miñamu mata sembaasu sata Emitay sa igam, mata Buynum Bunapaabu, ma bukanaku kagawutum jûdew, mbi keeli kujam di Emitay. Be nîcukumul Jerusaleŋ jañaaŋenaju jata elobay yâsuumaay yata Kristu, di poop bâsuk baabu bakotuyom, be kaŋ di êsukay yata Iliiriku. 20 Ban niga di sembe ma ilob elobay yâsuumaay tiŋatu ta loborutim mata Kristu. Be iga mo, ma aatuba mbi iteep di hutandahu hata an aahu, 21 non ma demmi ma eŋiicim kaan:
“Bukanaku kaloborutim matawool, mbi kujukool;
bukaaku kajamorutum matawool, mbi kunamulen matawool.”
Pawlu nâkin akay âyuugenul bukanaku kata Rooma
22 Malhegen kukaku lhay ya îkin ma îkayil ki iyuugeluul, be iwuluti buruŋ; 23 be mowme, bajut ban wah wakeel wa mbi ugenkom ube, non ma îkinemmi îkayeenul ki iyuugeluul di ujaañaw wahulhum ban. 24 Moo, na mbi een ikay be Espaaña, mbi îkayil bi iyuugenuul. Be na mbi îriiŋuu'bo, mbi ilako to kuk, ma mbi jeenenom ma eeli ikay be bo. 25 Be mbi ikay para be Jerusaleŋ ma nki êenenul bûynenaabu bata bo, 26 mata grîsiya yata ube Masedoniya, di yata Akaya, keene mbi kuwul opherta be bata bûsukateenaabu kagam bûynenaabu kata Jerusaleŋ. 27 Mata kujuke kaan jake ma kuga mo, mata jûdewwi kûgiitoor jaa di buko wahaw wagam wata Emitay, jake poop ma buko kûgiitoor di buko wahaw wa kubaam wagam wajukeyim. 28 Moo, na mbi ikay di kûboñaku katayiil be bo, ban nkit nîkayil be baabu di miwuul, ban nihul be Espaaña. 29 Ban poop nîmire kaan, na mbi îkayil ki iyuugeluul, mbi îkayil înje ma emmi huc hûpiiraahu hata Kristu.
30 Moo, kutiyaay, înje malhawem di miwuul di kañaaŋaku kata Ata Emit, aamom Jesus Kristu, di poop mata jâkinooraju ja Buynum Bunapaabu buwulolaam, ma jibom d'înje ma jilhaw Emitay be baabu d'înje. 31 Di jilhaw yo be baabu d'înje, ma mbi eeli imelh di bûynentaabu bata Jûdeya, di poop ma mbi bûynenaabu bata Jerusaleŋ kuyab jak opherta ya mbi iŋar be bo. 32 Moo, nîkine sûum jaa di Emit, mbi îkayil bi iyuugenuul înje ma emmi huc êsuumaay, ma mbi eeli îbajum to sembe di miwuul. 33 Emitay yawulewolaam kâsuumaayaku, di elako di miwuul peh. Amiin.