Pawlu nasaapiil
16
Moo, nîkine eenuul, âliinolaal Phebe agoroorem di grîsiya yata Senkreya, oo anaw ajakum bûyeget. 2 Mbi jisohool jak di kañaaŋaku kata Ata Emit, non ma bûynenaabu busohem apaaliil. Di jeenenool di wahaw peh wa asoholom, mata oo naanene bukan kameeŋe; înje poop jata di bukanaku ka aanemmi.3 Di jeenom Prisila, koo di Akila, kagam kutiyom kata di bugoroorabu bata Kristu Jesus, nisaapiil. 4 Mata buko kugawe eroŋay yatayiil di buhiiraabu mata înje. Moo, ntuwa înje keb mbi eeniil jêrejep, be poop be di sîgrisiyaasu peh sata bukanaku kagawutum jûdewwi. 5 Di jijaalhen grîsiya yâmeboorem di siluupasu satayiil. Di jijaalhen poop Epeenetu a iboolaatum noon, agam âynenaaw âtiyaaraw ata Kristu di bantaabu bata Aasiya.
6 Di jijaalhenom poop Mariya, agoroorum noon be batawuul. 7 Di jijaalhen poop Androoniku, di Juuniya, kagam bukanom, di poop kupaalom kata di ekullhay, kasingommi kûynen Kristu, ban di kûmiri jak di tutaru tata kumakaaku kata Jesus.
8 Di jijaalhen poop Ampliyatu, agam apaalom ata di Ata Emit, a iboolaatum noon. 9 Di jijaalhen Urbanu, a ûli uwoogum bugoroorabu bata Kristu, di poop apaalom Estaakis. 10 Di jijaalhen Apilis, a Kristu âririgemmi noon d'oo, di jijaalhen poop kata di eluupay yata Aristoobulu. 11 Di jijaalhen Erodiyoŋ, agam anaw ûmbaam. Di jijaalhen poop bûynenaabu bata Ata Emit, kata di eluupay yata Narsiisu. 12 Di jijaalhen Triphena, koo di Triphosa, kâgoroorum be bata Ata Emit, di jijaalhen poop apaalom Peersida agoroorum noon, a iboolaatum. 13 Di jijaalhen poop Ruuphu, a Ata Emit ajotum be batawool, di poop iñaawool agam poop iñaawom. 14 Di jijaalhen Asinkritu, di Phlegonti, di Ermas, di Paatrobas, di Ermis, di poop kutiyolaal kaaku ka kentom. 15 Di jijaalhen poop Philoologu, di Juuliya, di Nerew, di âliinool, di Olimpiya, di poop bûynenaabu peh kantom di buko.
16 Di jijaalhenoor ma jiyaakoor di bayaakoorerabu bunapaabu non batiyaay. Sîgrisiyaasu peh sata Kristu sijaalhenuul.
Kûcecenaku kûbanumaku
17 Moo, kutiyaay, nîkine ma ilhawuul eenuul, jijaamo bukanaku kawaasem bukan, ban ya kûguulh kâynenaku kata bukanaku, ma ya kulhikiten êsukay wahaw wâbutim di waawu wa jilhikitenim; jîrangiil. 18 Mata bukanaku kagawem umu, kûgoroororiit be bata Kristu aamom Ata Emit atoolaal, be ya kugoroor be bata karaku katayiil, ban di bâsuumerabu bata utumaw watayiil, ya kubunten bukanaku kaleem di majakutaamu matayiil. 19 Mata bukanaku peh kûmire kaan, miwuul ya jijam di Emitay, momakiimom ma îririgenumem noon matawuul. Moo, nîkine ma jijaalho be bata wahaw wajakaaw, be jêetukaami poop di wahaw wajakutaaw. 20 Moo, Emitay yata kâsuumaayaku, mbi epuncul Esatanaay di etaam di ûkandumaw watawuul. Kañankiitaku kata Ata Emit, aamom Jesus, di kulako di miwuul.
21 Timootiw agam apaalom a ugoroorem, najaalheluul, di Lusiw, di Jason, di poop Sosipaatru, kagam bukanom.
22 Înje Tersiw jaŋiicum kayta'uke Pawlu, nijaalheluul di kañaaŋaku kata Ata Emit.
23 Gaayu akiim eluupay dâ iwalenem, dâ grîsiya poop êmeboorem, najaalheluul. Erastu, asohem bancaamabu bata êsukay, di atiyolaal Kuwartu, kujaalhelluul poop.
24 Moo, Ata Emit, aamom Jesus Kristu, nalako di miwuul peh. Amiin!
Kasalaku kata Emitay
25 Moo, usalaal Emitay, yakiim sembaasu, yajuumenuum non ma elobay yâsuumaay yata Jesus Kristu ya iñaaŋenem eloom, yagam elobay yalhegenumaayay yâbaahulutim kata kaŋ niŋanu. 26 Be non ma Emitay yantom be nanoonan eloom, mowme eloba'uyu êbaahuli ban ma êmiri, hurim baŋiicerabu bata buñaaŋenaabu bata kûboñaku kata yo, ma âmbasuk peh mbi keeli kûynen yo, di kujam poop di yo. 27 Moo, Emitay yanoray yajaalhom, esali be nanoonan, mata Jesus Kristu. Amiin!