Pawlu nâriiŋ di êsukay yata Malta
28
Ban na ugam ûli omu ban tiyaŋ, ña nûmir kaan aŋoomenooruwaaw umu yaani Malta. 2 Ña bukanaku kata êsuka'uyu di kûcookooroli jak ma kuyaben sambunasu sâamak ma êsukay êlhumbo, mata ma Emitay ya eluunom, ban di jôobi. 3 Ña Pawlu nâleelul ban naraac wo di sambunasu, be elunay di êcaalhumul di uyaajaw uwu ma êteyil mata hâañaahu, di erumool di kaŋenaku. 4 Be na bukanaku kata êsuka'uyu kujuum ma elunay erendoorum di kaŋenaku kata Pawlu, ña ya kulob ma kêenul: “Malhegen âynaaw ume anaw âlhapitaaw. Mata palimo ma amellhulom di kasamaaku, be emitay yagawem batalenabu yeetubi ewallhool ma aroŋ.” 5 Be Pawlu nâliis yo di sambunasu, ban makeel mugawutool. 6 Ña êsukay di gawiil non mbi alaaw, be mante naket wûb. Be ma kukoom poopii kujukut makeel mugawool, ña di kêenul Pawlu bâkiinabu.7 Ñata tiŋa'utu, hankahu di hulako to hata âynaaw aaneyim Puubliw agam annahaanaw ata aŋoomenooruwaaw umu. Ña nakay d'ûli ki uwalen yanŋool ma âcookooroli jak kukaku kûhaaji.
8 Be ampaw âynaaw umu oo too ma akumemmi di ekaamaay ma âjuutum ban harahu ya hutey. Ña Pawlu nakay ki ajukulool, âriiŋ nalhaw Emitay ban naga kaŋenaku katawool d'oo, ña nâju. 9 Na agam umu, ña bukanaku peh kâjuutum kândom di aŋoomenooruwaaw umu, di kûkayil baabu d'oo, ña di kûju. 10 Ña bukanaku kata bo di kûboorooroli noon. Ban na ugam ma ûjupo di busaanaabu ma ukay, di kûwuloli wahaw lhay wa mbi ukay di wo.
Pawlu nâcaalh Miletu be Rooma
11 Be nuga di aŋoomenooruwaaw umu kulheeŋaku kûhaaji, ban nûjupo ma ukay di busaanaabu bata êsukay yata Alesandriya bâlakodom hûyookahu dâ kugam êmanjumay yata simitasu satayiil sagam magabaamu saaneyim Kaastor di Pooluks. 12 Na ûrimmi di êsukay yata Sirakusa, nulako dô kukaku kûhaaji. 13 Ban nuhulh be di êsukay yata Reejiw. Ûriiŋ hata kajom, ehentelaay di êtekumuloli kujeeŋanda, ña nuga kukaku kugaba, nkit nûriiŋ di êsukay yata Puteewoli. 14 Di êsuka'uyu, nûtoo'dô bûynenaabu baabu bata Jesus kâanolim uñankiit ma ûlako dô kukaku hutok di kugaba, ban nujaŋen be Rooma. 15 Ña bûynenaabu bata Rooma di kujam kaan ûli ma akayem be bo, ña di kûkayil ki kûyaañuwoli tiŋatu taaneyim Apiw, di poop tiŋ taatu taaneyim Sîpitik Sîhaaji. Ña na Pawlu ajukiim, ña nânik, ban naan Emitay jêrejep.
Pawlu nâriiŋ Rooma
16 Be na ugam nûriiŋe Rooma, di keen Pawlu apaamen eluup da âkimmi alako, ta mbi asellooraaw apooyool.
17 Ga kukaku kûhaaji, Pawlu nâwoolul yahaanay yata jûdewwi kândom Rooma. Na kugam kuleehuwe, naaniil: “Kutiyaay înje Pawlu igawut makeel makojuwe bukanolaal, ihuusulut poop kûboñaku kata simpawolaal sihaan; be di kusohom di hankahu hata Jerusaleŋ ban di kukay d'înje ki kuwul bukanaku kagam romanuyi. 18 Be buko di kurinkom ban di kûkin kuwalhenom mata ma kujukutum makeel makojuwe ma mbi kubujumom. 19 Be bukanolaal jûdewwi di kulat, momakiimom neeniil kama moo jaa, nîkayil ki igawi ube batalenabu di kaŋenaku kata âyyaw âmakaaw ata Rooma. Be inongut kaan ikeesuwiil. 20 Momakiimom ma îwoolumuluum ma ujukooraal ma ulobaal, mata wahaw wa Israyel kukobem di wo, wowakiimom jaat nigenkumi ume baseelabu.”
21 Ña yahaana'uyu di keenool: “Ûli uyabut kayit kakeel kâcaalhumulo Jûdeya kaloom matayi, palimo poop di kutiyolaal, an aŋarloot bo kûboñ ki âloboli makeel matayi makojuwe. 22 Be ûli nûkine ujam di butumabu batayi maama aw unongum, mata buruŋa'ubu da ommi. Mata ûli nûmire kaan, tiŋ kaŋ peh êsukay yoyu ma elobem kôji mata bo.” 23 Ña di kupin hukahu ha mbi kûlobum. Na huka'uhu hûrimmi, bukanaku lhay di kûkayil ki kutookool di eluupay ta ammi, ña di kulob bûjomaru be kaŋ baheperabu ma ya añaaŋeniil mata kâyyaku kata Emitay, ma ya anamuleniil uytaw wata kûboñaku kata Emitay, di poop wata buñaaŋenaabu bata kûboñaku kata Emitay, ma âkin agawiil kûynen Jesus. 24 Ña bukan kaaku di kûynen hurimahu hatawool, be kaaku di kulat; 25 ña ma kujamoorutum, di kuwaasoor. Ña Pawlu naaniil: “Buynum Bunapaabu bukooŋe non ma bugam añaaŋenaaw ata kûboñaku kata Emitay aaneyim Isayiyas ma alob simpawuul aaniil:
26 ‘Ukay ki utoo'bo êsuka'uyu ma ooniil:
Miwuul mbi ya jijam, ban jeetukanamulen;
di jijuk, ban jeetukamanj poop.
27 Mata bukana'uke kukale ban,
ma kulhook ûjaŋayaw watayiil,
ban di kumoosen.
Mata gawent mo, mbi kujukeen,
di kujameen, di kunamulen
ma kûlaañul be baabu d'înje,
niñankiitiil ma ibuneniil.’
28 “Moo, nîkine ma jîmir kaan elobay yata Emitay yata japakaju eboñuli ban be di bukan kaaku kagawutum jûdewwi; buko mbi kujam yo.”
29 [Na alobiim umu, ña jûdewwi di kuwaasoor ma ya kuñoosoor lhînŋa.]