Pawlu di kukay d'oo be Rooma
27
Ban nagam kujamoore ma mbi ûjupo di ebaarukay ma ukay be Itaaliya, ña di kuŋar Pawlu, di poop bukan kaaku kakulhim poop kuwul annahaanaw aaneyim Juuliw ata kaasaaku kaaku kata esellooraay kata âyyaw âmakaaw ata Rooma. 2 Ña nûjupo di ebaarukay yata êsukay yata Adramitiyu yakayem ki eya di kuyaaku kata di bantaabu bata Aasiya, ma ureboor di Aristarku ata êsukay yata Tesaloonika ata di bantaabu bata Masedoniya. 3 Ûriiŋ hata kajom, nuya di huyaahu hata êsukay yata Sidoŋ. Be Juuliw naga Pawlu jak ma awalhool ma akay ki âyuugenul kupaalool kata êsuka'uyu, mante di kubaj wah di kuwulool. 4 Na ugam nuhare Sidoŋ, ehentelaay di êlaamenoli ma ya êtekul ejooŋoor d'ûli, ña nukekelhen aŋoomenooruwaaw ata êsukay yata Sipri. 5 Nuga ban nûtip kasamaaku kata Siliisiya, di kata Panphiiliya ma ukay ki uya di êsukay yata Miira yata di bantaabu bata Liisiya. 6 Be annahaanaw ata esellooraay nâjuu'do ebaarukay yata êsukay yata Alesandriya yakayem be Itaaliya, ña nûjupo dô. 7 Be mata ma ebaarukay eteyutum hûlh, ña nûlaam noon ma uga kuk kayeje di kasamaaku bala ure di êsukay yata Knidu. Be ehentelaay di êhaatoli, ña nunajen be karebaku kaaku ma ukekelhen aŋoomenooruwaaw ata Kreeta ma uyab ñata di êsukay yata Salmona. 8 Ña nukekelhen ma ujaŋen be na ûrimmi tiŋatu taaneyim Kuyaaku Kajakaaku takotum êsukay yata Laseya di hûlaamahu dilo.
9 Be ma ereesay yâtooli êlindim poopii kûwaagenaku di kuhuut kâriiŋ, ña buruŋabu bâtooli di kasamaaku di buhaŋ makojo. Ña Pawlu nalob di êsukay 10 ma aaniil: “Kutiyaay înje nijuke kaan onkenaal jaa, ereesay yatoolaal mbi ehaŋ makojo, ma ebaarukay, di poop wañaw ukaaño, ban poop ulaal nooliyaale uketaal.” 11 Be annahaanaw umu ata esellooraay yata Rooma, nabes hurimahu hata Pawlu, ma ahaŋ mâynen alamaaw ata ebaarukay, di poop annahaanaw ata yo. 12 Be mata ma huyaa'uhu hugawutum huya hajake ta oolim ulako be na mbi hûyookahu hubawo, ña bukan kameeŋe di kêenul jake ma uhulh mante nooli ûriiŋ Phenisi, tagam huyaahu hata di êsukay yata Kreeta, hajooŋoorum bi ehentelaay yata karebaku kata Aphrika, di poop Koru êtekumewuum, ma ooli ulako to.
Buhentelaabu di bûtekul di kasamaaku
13 Ña ehentelaay di êgawul hepepep ma êcaalhumuloli kujeeŋanda, ña di kêenul mbi jak ma kuga non ma kunongum. Momakiimom di kûcaalhenul hulankarahu ma kukekelhen aŋoomenooruwaaw ata Kreeta ma kukay. 14 Be to kaŋ cab, buhentelaabu baaneyim Ewrowakiloŋ, di bûtekumul karebaku kata aŋoomenooruwaaw umu 15 ma bukay di ebaarukay. Be ma uyetoortum di bo, ña nuwaa'bo bo ma bukay d'ûli. 16 Ña nukay ma ukekelhen jiŋoomenoruwaaju jaaneyim Kawda, ba ûrimmi nûlaam noon jâjupaju jata jisaanaaju di ebaarukay. 17 Be na kugam kûjup jo, ban di kuga sembe ma kuŋar uneewaw ma kukokoor ebaarukay ma kugenk yo. Be poop ma kûkolim ka mbi ebaarukay etiih di simpiihasu sammi ñata Sirti, ña di kûwalenul kubeelaaku kata ebaarukay ma ehentelaay ekay di yo. 18 Be mata ma buhentelaabu benkemmi ma ya bûtekul, nûriiŋ hata kajom kubajut kuga, ña di kuŋar wañaw kubet di kasamaaku. 19 Ûriiŋ hukahu hûhaajutahu, di kuŋar wañaw waawu wata ebaarukay kubet poop di kasamaaku. 20 Be Kuka'uku pooko, buhentelaabu di buhaŋ manken, poopii an aaliit ajuk jaley, palimo poop yoot, ña ûli peh an awuloorowut eroŋ.
21 Be ûli ma ugam ban kuk kameeŋe an bariit, ña Pawlu nalhaalo ma alob di êsukay aaniil: “Kutiyaay jake ma jiyabeen hurimahu hûmbaam, ma aatuba uharellaal di êsukay yata Kreeta, ma wañaw wetuba ukaañuween, wetuba unepeen poop. 22 Be aatuba jîkoli, ma iñaaŋenuul kaan an aatuba aket, be ebaarukay mbi ekaaño. 23 Mata hukare, amalaakaw ata Emitay yûmbaam ya înje ilhawem, akaylom 24 ka aanom: ‘Pawlu ootuba ûkoli, mata mbi ûriiŋ baabu di âyyaw âmakaaw ata Rooma, moo hurim ma Emitay eñankiitim, mbi ega ma bukanaku peh kammi di ebaarukay kumellh.’ 25 Moo, kutiyaay aatuba jîkoli, mata înje nîynene kaan Emitay mbi ega non ma elobommi. 26 Be buhentelaabu mbi bukay d'ulaal ki buya di aŋoomenooruwaaw aahu.”
27 Ña nuga kukaku kunŋen di kubakiir, ûli baroŋ ma buhentelaabu buyuuŋoorem d'ûli di kasamaaku kata Adriyaatiku. Be nagam hukahu hurewe, ña bugorooraabu bata ebaarukay di kunamulen kaan nuhuute ban tîyaŋ. 28 Ña di kuŋar muhaañaayamu makokim kaneewaku kuwalen di kasamaaku ma kuliik mâlahaamu, di kujuk kaan mâlahaamu mûriiŋe simeeterasu anabawo di kunŋen di hutok di sigaba (37). Ban nurees deh, di kuliik joon, di mûriiŋ simeeterasu anabawo di hutok di sigaba (27). 29 Be mata ma kûkolim ka mbi ebaarukay êpingo di kuwaaliisaku, ña di kuwalen kulankaraku kubakiir ube kujeeŋanda di hulamahu, ban ya kulhaw Emitay ma titijen cab.
30 Be ban di kûkin kutey ma kumellh, ña di kuwalen jisaanaaju jâjupidom ma kûhooloor ma kuga non buko kûkimmi kuwalen kulankaraku kammi di kasuulaaku kata yo. 31 Be Pawlu naan annahaanaw ata esellooraay, di poop esellooraay yatawool: “Bugorooraa'ubu kata ebaarukay kûcaalh jaa ûde keb, non miwuul jeetubi jimellh!” 32 Ña esellooraay di kutij uneewaw wata jisaanaaju ma kuwaa'jo ma jikay.
33 Be nagam urabaw urabe, Pawlu nalob di êsukay mata huriyahu ma aaniil: “Kutiyaay gawe ban jaat kukaku kunŋen di kubakiir, miwuul ma jikobem bariit makeel. 34 Moo jiñankiit ma jiŋar wah jiri, ma mbi jeeli jîtik. Mata an aatuba aket, palimo poop kal kata an keetubi kunep.” 35 Na Pawlu aloom umu, ban nasoh hûmburuwaahu too di êsukay ma aan Emitay jêrejep, ban natii'ho atokoñ. 36 Ña êsukay peh di kûnik ma kuri. 37 Di ebaaruka'uyu ûli jâlakodom, noomo sîteemeerasu sigaba, di kîyyaku kûhaaji, di kunŋen di hutok di an anor (276). 38 Na kugam kuriye kupooñ, ña di kuŋar trîigu kubet di kasamaaku ma ebaarukay eeli eyiili.
Busaanaabu di bûyuwo
39 Ban nagam titijene, kata ebaarukay kumanjut tiŋatu ta kemmi, be di kuŋanden hubeereeraahu hata aŋoomenooruwaaw, ña di kûkin kuga sembe ma nki kuya to. 40 Ña di kutij uneewaw wata kulankaraku ma kubee'ko di kasamaaku, ban di kuhelh siweenasu sata jalhebenaju jata ebaarukay. Ban poop di kuralh hubeelaahu hata di kasuulaaku ma yeeli ecunken be di hubeereeraahu. 41 Be ebaarukay di êriiŋ tiŋatu ta kuwundooraku kata mumelamu kupamem, di elo di empiihay kasuulaaku kata yo di kûribo di empiiha'uyu, ña waajeelaaw ya umab yo di hulamahu poopii di hucaculo.
42 Ña esellooraay di kujamoor ma mbi kubuj bukanaku peh kândom kakulhim, ka mbi kugogoy ma kumellh. 43 Be annahaanaw ata esellooraay mata ma âkintum ma Pawlu abuji, naaniil see. Ña naga bukanaku peh kaalim kagogoyaku ma kusing kulo dô ma kugogoy be di hubeereeraahu. 44 Ban naan kaaku kusoh utaaguwaaw, di poop wata ebaaruka'uyu ma kugogoy. Ña bukanaku peh di kûcaalh tîyaŋ di kâsuumaayaku.