Agripa naga Pawlu ma âgamul
26
Ban âyyaw Agripa naan Pawlu: “Ña nooliye ulob.” Ña Pawlu nâwiit kaŋenaku êsukay ban nalob ma âanul: 2 “Ây, înje sûumom noon memmi jaat ute ta ommi, ma ilob wahaw peh wa jûdewwi kusoosenommi. 3 Mata aw nûmire jak mûndeemaanamu mata jûdewwi, di poop wahaw wagaweyiim bûñoosoorabu. Momakiimom nilhawi ma uñankiit ma utallhenom.4 “Malhegen bukanaku peh kagam jûdewwi, kûmire mûmbaam kata kaŋ niŋanu înje di âpur di êsukay yûmbaam, di poop Jerusaleŋ; 5 moo keeliye kulob malhegen, mata kata kaŋ niŋanu înje anaw ata di kaasaaku kaaneyim phârisew kahammi masoh nîk buruŋabu bâtooli. 6 Moo, înje ume jaat ute ma jigawem d'înje batalenabu mata ma îynemmi kaan wahaw wa Emitay eloom simpawolaal sihaan, mbi ega wo. 7 Ban poop bukanaku peh kata sîbajoorumasu sata Israyel saamom kunŋen di sigaba, koku poop ma kukobem di wahaw uwu. Momakiimom ma kulhawumem di Emitay bûjom, busonna babeñowut. Moo ây, mata ma îynemmi wahaw uwu, momakiimom ma jûdewwi kukeesowumommi. 8 Kama mata wa ma miwuul jûdewwi jîynentummi kaan Emitay yeeliye êlhaalenul bukanaku kakeem? 9 Malhegen înje poop nownu ninongeene kaan mbi iga di sembe ma îbuy kañaaŋaku kata Jesus ata Nasare; 10 ban moo nigam. Momakiimom na ilakom Jerusaleŋ, yahaanay yata bumaaŋenaabu bata Emitay di kuwulom buruŋ ma ya îsohul bûynenaabu bameeŋe bata Jesus ki ikulh, ban poop na kemmi kubujiil, neesemmi aawo. 11 Ban poop kuk kameeŋe, ya ikay di siluupasu sata kâmebooraku kata jûdewwi ki ilesiil, ma igawiil di sembe ma kûcaalh di buruŋabu bata Jesus. Mata ma ibirikum di buko meeŋ, ña ya isoolheniil be di sîsuk saasu ki ilesii'bo.
12 “Di hunonga'uhu, hohakiimom nîkayum be di êsukay yata Damaasku, ma yahaanay yata bumaaŋenaabu bata Emitay, kuwulom buruŋ be bo. 13 Be na igam înje mareesem di buruŋabu be bo, jaley poop ma ajummi sap, ña nijuk sambunasu sayawumulom hatiya di emitay pay, sahammi majaaŋ jaley, ma sihikitellom, di poop kûynaaku ka ureboorum. 14 Ña nulo to kaŋ hîp; ña nijam hurimahu hata anaw alobulom d'înje di elobay yata jûdewwi ma aanom: ‘Sâwlu, Sâwlu! Mata wa ma ûlaamenumem d'înje? Mbi ûlaam lhînŋa aw bahiguloorer d'înje!’ 15 Ña nirinkool eenool: ‘Kama aw aymoom?’ Be Ata Emit naanom: ‘Înje Jesus a ûlaamenem d'oo!’ 16 Ban naanom: Ulhaalo ma ujuum, mata înje îcalhim ma mbi igawi agorooraaw ûmbaam, ma mbi uñaaŋen bukanaku wahaw wa ujuum jaat, di waawa mbi îyisi. 17 Mbi iboñi be di bukanaku kagam jûdewwi, di poop kaaku kagawutum jûdewwi, be mbi ipooyi; 18 ma mbi ugawiil kujuk ma kûcaalhul di emuucenay ma kûkayil be di majaaŋaamu, di kûcaalhul poop di kaŋenaku kata Esatanaay ma kûkayil be di kata Emitay. Ma mbi kûynenom, kûbajumiñaku katayiil di kupasi, ban di kubomi di bukanaku ka Emitay ejotum ban.
19 “Âyyaw Agripa, momakiimom ma îlatutummi kaga wahaw wa Emitay elobommi na êbaahulommi. 20 Ña nîcukumul ma iñaaŋen elobay yata Emitay di êsukay yata Damaasku, ban nikay be Jerusaleŋ, ban nikay be di bantaabu peh bata Jûdeya, ban nkit nikay be di bukanaku kagawutum jûdewwi. Ma eeniil kuwatatenooro mata kûbajumiñaku katayiil ma kûynen Emitay, ban mbi kuga ma bagawerabu batayiil bûyis kaan malhegen kuwatatenooruwe. 21 Wahaw we wowakiimom ma jûdewwi kusohumommi di Eluupay yata Emitay ma kûkin kubujom; 22 be Emitay di eñankiitom ma ya emelhenom, momakiimom ma êemummi ute ma irommi be jaat, ma iñaaŋen elobay yata Emitay bukanaku kagam kâamak di êsukay, di poop kaaku kagam kinŋet. Ma ya iñaaŋeniil wahaw wanoraw wa buñaaŋenaabu bata kûboñaku kata Emitay, di poop Moyses kuloom kaan mbi uga; 23 wa kemmi Mesiyas mbi âlaam, ban oo mbi aga anaw âtiyaaraw a mbi âlhaalowul di kuketaaku, ma mbi âyis bukanaku kagam jûdewwi, di poop kaaku kagawutum jûdewwi ehikitenumay yata japakaju.”
24 Na Pawlu aloom eloba'uyu, ña Phestu nâŋaaŋulo ma aanool: “Pawlu aw ma uwuutom! Nulekoore lhînŋa poopii, Hûkowahu hatayi di huga limalim!” 25 Be Pawlu naanool: “Ây, înje ilee'ma iwuutom, înje umu to jak, mata malhegen nilobem di mo. 26 Mata wahaw wa ilobem di wo peh, aw nûmii'wo; mata ntuwa tiŋ tâñooruwe ugawim. Momakiimom ma ilobumem di ume ute ta ommi bâkoliit.” 27 Ban Pawlu narink Agripa ma aanool: “Ây inja nûynene elobay ya buñaaŋenaabu bata kûboñaku kata Emitay kuloom? Înje nîmire kaan nûynen yo!” 28 Ña Agripa naanool: “Âynaawe, ulobeena deh, nugawom iga akristoŋaw!”
29 Be Pawlu naanool: “Palimo dô piyowut, be mante dô piyuwe, mbi ilhaw Emitay matayi, di poop buke peh kammi ûde ma kutallhenem d'înje, ma jîynen Jesus non înje, be bajenkuti baseel noon ube.”
30 Na Pawlu aloom umu, ña Agripa, di Phestu, di Berenisi, di poop êsukay peh kâlakodom, di kulhaalo 31 ma kûcaalh, ban ya kulob ma kêenul: “Âynaaw ume agawut wah wakojuwe wa mbi ugawool abuji, palimo poop ma akullhi!” 32 Ña Agripa naan Phestu: “Âynaaw ume kaleteen ma alhawum ma nki agawi batalenabu di kaŋenaku kata âyyaw âmakaaw ata Rooma, naaliye awalheneeni.”