Phestu naga Pawlu batalenabu
25
Na Phestu agam naleehuwe di kâyya'uku kata bantaabu bata Sesareya, ban kukaku kûhaaji kuga kubawe, nâcaalhumuu'bo ma akay be Jerusaleŋ. 2 Ña yahaanay yata bumaaŋenaabu bata Emitay, di yahaanay kata jûdewwi, di kukay baabu Phestu ki kukeeso Pawlu. 3 Ban di kulhawool ma keenool añankiit aboñ ma kuŋallool be Jerusaleŋ. Be buko batabulhenoore ban ma mbi kûhupuwool di buruŋabu ma kubujool. 4 Be Phestu naaniil: “Pawlu omu Sesareya ma akullhim, ban înje malaañem be bo maame maame. 5 Moo jake ma yahaan yaayu yatawuul kureboor d'înje be bo; ma ga jaa noon wahaw nagam wajakutum, di kulob.”6 Ban Phestu nalako bo kuk kârimmi hutok di kûhaaji, be mante kunŋen, ña nalaañ be Sesareya. Âriiŋ hata kajom, nakay ki aleeho di kâyyaku kata batalenabu, ban naboñ ma kûŋarul Pawlu. 7 Na Pawlu ârillom, ña jûdewwi kâcaalhumulom Jerusaleŋ di kuŋoomenool ma ya kulob wah wameeŋe wajakutum wa kemmi wa agam, ban kusohut hârirahu hata wo. 8 Be Pawlu naaniil: “Înje igawut makeel mâkojiye ma kûboñaku kata jûdewwi kuloom kaan mujakut. Îgawikoorut di Eluupay yata Emitay, ban poop îlobikoorut âyyaw âmakaaw ata Rooma.”
9 Be mata ma Phestu âkimmi aga jûdewwi kûririgen, ña narink Pawlu aanool: “Aw ûkint ukay be Jerusaleŋ, ma nki igawi bo batalenabu mata eloba'uye?” 10 Be Pawlu naanool: “Înje ume ûde di kâyyaku kata batalenabu kata âyyaw âmakaaw, moo ûde neelim igawi batalenabu; mata aw nûmire jak kaan igawut jûdewwi miñ makojuwe. 11 Be ga jaa non înje igam wahaw wajakutum waalim ugawom îketum, etukalat ma kubujom. Be ga jaa poop non igawut wah, be koo kusoosenem d'înje, an asokent aŋarom awuliil. Moo, nilhawi ma uŋarom be baabu âyyaw âmakaaw.”
12 Ña Phestu di kulob di bukanaku kaanenewoom di elob, ban naanool: “Ma uloom umu mbi ukay be baabu âyyaw âmakaaw.”
Phestu nañaaŋen Agripa mata Pawlu
13 Ban nagam kunak, âyyaw aaneyim Agripa koo di âliinool Berenisi di kukay be Sesareya ma nki kûsaapul Phestu. 14 Be mata ma kugabom kunak, ña Phestu nañaaŋen âyyaw umu mata Pawlu ma aanool: “Âynaaw omu ûde a Phelis awaam di ekullhay. 15 Be na ikayum be Jerusaleŋ, yahaanay yata bumaaŋenaabu bata Emitay, di yahaanay yata jûdewwi, di kulobom wahaw wa âynaaw umu agam, ban di keenom mbi ibujool. 16 Be neeniil see. Mata bukanaku kata Rooma kûgaworiit an akeeso apaalool, di kusohool kubuj buko baleehowut ma kutallen, ma mbi anaw umu akeesuwim alob maama kuloom ma agam; 17 momakiimom na ûrillom, ikobut ma piyo. Ûriiŋ hata kajom keb, nikay ki ilheeho di kâyyaku kata batalenabu ban niboñ ma kûŋarul âynaaw umu. 18 Be na bukanaku kakeesuwoom ya kuloom, înje neeneene mbi kûlobul miñ makojuwe ma agam, be na kuloom kuban, ijukut makeel makojuwe ma agam. 19 Ma kulob keb mata buruŋabu batayiil, di poop mata âynaaw akeem ban a keenem Jesus, a Pawlu aaniim di malhegenumaayamu omu ma arommi. 20 Ña înje ibajut maama mbi ilobiil, momakiimom nirink Pawlu mante piya nâkine akay be Jerusaleŋ ma nki agawi bo batalenabu mata wahaw wa kulobem di wo. 21 Be nalhawom aanom non moo jaa, niŋarool ma nki âyyaw âmakaaw ata Rooma agawool batalenabu. Ban naanom poop iwalhool di ekullhay be na mbi âyyaw umu âmakaaw alob mata eloba'uyu. Ña nilaañenool dô ma mbi iboñool be bo.” 22 Ña Agripa naan Phestu: “Înje nîkine poop ijamool.” Be Phestu naanool: “Mbi ujamool kajom.”
23 Na kûrimmi hata kajom, Agripa koo di Berenisi di kukay be di kâyyaku kata batalenabu, ña yahaanay yata esellooraay, di poop bukanaku kagam bukan kâamak kata di êsuka'uyu, di kûkiibelliil ma kûbinkeliil be dô. Phestu naboñ ma kûŋarul Pawlu. 24 Ban Phestu naan Agripa: “Ây, di miwuul êsukay peh jammi ute, jijuke âynaaw ume! Âynaaw ume, oo ma jûdewwi peh kata Jerusaleŋ, di poop kaaku kammi ûde, ukaylom ma ya kûŋaaŋulo ma kêenul mumulet bi alako to babujuti. 25 Be înje ijukut makeel makojuwe ma agam ma mbi âketum. Be mata ma aanommi iboñool be baabu âyyaw âmakaaw ma nki agawi bo batalenabu, momakiimom ma mbi iboñumool be bo. 26 Be, be jaat isohut wahaw ûriraw wa eelim iŋiic ma iñaaŋen âyyaw âmakaaw. Momakiimom niŋarmulool be ute, be nihaŋ maŋarmulool matayi, ma mbi urinkawool ban, mante neeli ibaj wahaw ûriraw wa mbi iŋiic. 27 Mata nîmire kaan jakut ma uboñ an akullhim be baabu an, aw basohut jak maama kuloom majakutum ma agam.”