Pawlu di kugawool batalenabu di kaŋenaku kata Phelis
24
Ban na kukaku hutok kugam kubawe, annahaanaw âmakaaw ata bumaaŋenaabu bata Emitay aaneyim Ânaniyas, di yahaanay yaayu yata êsukay, di poop akooŋenaaw aaneyim Tertulu, di kuŋar elobay yatayiil di Pawlu be baabu âyyaw aaneyim Phelis. 2 Be na agam nâwollo Pawlu, ña Tertulu nâlobul ma âanul: “Annahaanaw Phelis, malhegen kaleehaaku katayi di kâyyaku kugawe êsukay kubaj kâsuumaayaku ujaañaw uwe. Majaalhaamu matayi poop mugawe ma miñ mameeŋe majakum munkulamu, mugawi di êsuka'uye. 3 Nusali mata hukoohuk, tiŋ peh, êsukay ejuke miñamu ma ugam. 4 Be ma etuba îlindiyen elobay, nîkine ilhawi ma uñankiit di mâsuumamu matayi ma ûtalhenoli kotiit.5 “Ûli nujuke di malhegen kaan âynaaw ume ntuwa an ajake. Mata nâguulhe ban bukanaku kagam jûdewwi kammi di âmbasuk poopool, ban oo agam annahaanaw ata kaasaaku kata nasareewwi. 6 Ban poop nâkineene asik Eluupay yata Emitay. Momakiimom ma usohumoom, ma mbi ugaweenool batalenabu non ma kûboñaku kâtooli kuloom. 7 Be annahaanaw ata esellooraay aaneyim Liisiyas, nâkayil ba abotool di uŋenaw wâtooli di sembe, 8 ma âanul bukanaku kammi âynaaw ume nabaje kûbajumiñ, kûkayil be baabu d'aw. Be urinkool jaa, mbi usoh hârirahu hata miña'umu peh ma ûli ulobem di mo.”
9 Ña bukanaku kagam jûdewwi poop, di keenool ma aloom umu malhegen.
10 Be na annahaanaw ata kâyyaku âwiitum kaŋenaku ma Pawlu âlobul, ña nâanul: “Înje sûumom meeŋ ma emmi ute ma îgamul, mata nîmire kaan gawe ban simit sameeŋe na ommi ute ma ugawem di êsukay batalenabu. 11 Malhegen gawe ban kukaku kunŋen di kugaba, naamom na înje îcaalhumulom Jerusaleŋ kalhawaku kata Emitay. Be urink jaa, mbi ûmir kaan malhegen. 12 Mata kutookutom di Eluupay yata Emitay ma uñoosoorem di an akeel, igawut poop bûñakoor di siluupasu sata kâmebooraku kata jûdewwi. Kutookutom poop tiŋ takeel ma îmebum êsukay. 13 Ban miña'ume peh ma kulobem di mo kuya d'înje, an akeel ata di buko ammi ute, aaliit âanul malhegen. 14 Be miñamu ma mbi ilobi, malhegen înje omu di buruŋabu ba keenem ‘bugawut buruŋ bajake.’ Be di buruŋa'ubu nîgawumem miñamu ma Emitay yata sîmpawoli eloom. Mata nîynene miñamu peh maŋiicim di kaytaku kata kûboñaku kata Emitay, di poop maamu mammi di uytaw wata buñaaŋenaabu bata kûboñaku kata Emitay. 15 Ban ûli pôopoli di buko, nûynene kaan bukanaku kagawem non ma Emitay êkimmi, di kaaku kagawutum non ma Emitay êkimmi kakeem ban, mbi kûlhaalowul di kuketaaku. 16 Momakiimom ma îgawumem sembe ma iga buynumabu bûmbaam jak di Emitay, di poop bukanaku.
17 “Mata nigawe simit na ileem ûde Jerusaleŋ, mo ma ikaymulom ma îŋarul esarahay ki iwul bukanom, di poop opherta yata Emitay. 18 Be na ya igam miña'umu, no na jûdewwi kata Aasiya kutookommi di Eluupay yata Emitay înje ma îbuyoorum ban di yo. Kutookutom înje ma îmebum bukan, kutookutom poop di bûñakoor. 19 Momakiimom jake ma buko kulakuween ute ma kûlobul miñamu ma kemmi ma igam. 20 Be poop buke kammi ute keeliye kûlobul mante na ulakom di Hulhanahu Hâmakaahu, kujame, mata hûbajumiñ ha igam? 21 Be înje hurim hanor keb niloom ma îŋaaŋulo êenul: Mata jalhaalaaju jata bukanaku di kuketaaku, jojakiimom jaat nigawumi batalenabu.”
22 Be mata ma Phelis âmiim jak mata Buruŋa'ubu, ña nawaas batalenabu ma aaniil: “Na mbi Liisiyas aamom annahaanaw ata esellooraay âriiŋul, nilob mata elobay yatayi.” 23 Ña ban naan annahaanaw ata kaasaaku kata esellooraay kârimmi êteemeer, akay di Pawlu ki akullh, ban aatuba agawool âlaam, ban poop aatuba alat ma kupaalool kukay be dô ki keenenool.
Phelis koo di Drusila, di kuga Pawlu batalenabu
24 Ban nagam kunak, Phelis koo di apañoorool Drusila agam jûdew, di kûriiŋul. Ña nâwoolul Pawlu ma ajamool mata kâynenaku kata di Jesus Kristu. 25 Be na Pawlu ya aloom mata jagawaju jata jak, di mata jaga bûyeget jak, di poop mata hukahu ha mbi Emitay ega batalenabu an peh, ña Phelis nâkoli ma aanool: “Ña yeje! Ukay ma mbi îriito, nîwoolli joon.” 26 Be omu ma akobeenem poop ma mbi Pawlu awulool bancaam. Momakiimom ma ya âwooloorumoom ma kulob.
27 Be nagam ujaañaw ugaba ubawe, Phelis nâcaalh di Kâyyaku, ma Poorsiw Phestu alako dô. Be mata ma Phelis âkimmi ma jûdewwi kêemiyoorool, ña nâwaa'dô Pawlu di ekullhay.