23
Ña Pawlu najiker yahaanay yata di Hulhana'uhu kew ban naaniil: “Kutiyaay, înje Pawlu, kata kaŋ niŋanu be kaŋ jaat, înje mareesem di bûyeget bajake di Emitay.” 2 Be Ânaniyas agam annahaanaw ata bumaaŋenaabu bata Emitay, naan kûynaaku kalakotom di Pawlu kumabool di butumabu. 3 Ña Pawlu naanool: “Âhoolooruwaawe, aw Emitay mbi elesi! Înje gawom noon, aw ukaylom bi ugawom batalenabu non ma kûboñaku katoolaal kuloom? Moo mata wa, nuhuusuu'ko ma umabom di karaabaku?”4 Ña kûynaaku kaaku kalakotom ta ammi, di kurinkool keenool: “Ugel annahaanaw ata bumaaŋenaabu bata Emitay, agam agorooraaw ata Emitay?” 5 Pawlu naaniil: “Kutiyaay, înje îmirut kaan oo annahaanaw ata bumaaŋenaabu bata Emitay; mata dôdu ma ŋiicim di elobay yâñoyyaay kaan aatuba ûlobikoor an agam annahaanaw ata êsukay.” 6 Ña na Pawlu âmiim kaan di Hulhana'uhu Hâmakaahu hata jûdewwi, waasaaw wowu dô ugaba, kata phârisewwi, di kaaku kata sadusewwi, ña nâŋaaŋulo lhînŋa ma âanul: “Kutiyaay, înje Pawlu phârisew nigam, simpawom poop phârisewwi kugam, moo înje oome jaat ma igaweyim d'oo batalenabu hurim ma îynemmi kaan bukanaku kakeem mbi kûlhaalowul di kuketaaku!”
7 Ña na aloom umu, Hulhanahu di hûgiitoor mata ma phârisewwi, koo di sadusewwi kûgadom bûñoosoorabu. 8 Mata sadusewwi kûynent kaan bukanaku kakeem mbi kûlhaalowul di kuketaaku, kûynent poop kaan amalaak, di amal, nabaje. Be phârisewwi kûynene kaan wahaw uwu ubaje. 9 Ña êsukay di ehaŋ to mâŋaaŋulo mata bûñoosora'ubu. Ña yahaan yaayu kata di bulhikitenaabu bata kûboñaku kata Moyses, kata di kaasaaku kata phârisewwi, di kulhaalo ma kêenul: “Ûli ujukut makeel majakut di âynaaw ume; nakeel mante amalaak nawulool hurim!”
10 Ña baceca'ubu di bûhaah kaŋ cûm, poopii annahaanaw ata esellooraay nâkoli ka mbi êsukay kutijer Pawlu, ña nâwoolul apooyaaw ma âwalowul ma akay d'oo be di êkorteelay. 11 Kûriiŋ busonnaaru, Ata Emit nâcallhool ma aanool: “Pawlu sâkoli! Ma uloom êsukay mûmbaam ûde Jerusaleŋ, moomu poop kaŋ ma nki ulob di êsukay yata Rooma.”
Jûdewwi di kutabulhenoor mata jabujaju jata Pawlu
12 Nagam titijene, jûdewwi kaaku di kûmeboor ma kunuur ma kêenul, mumulet bi kuri, di kusiben buko basohut Pawlu kubuj. 13 Yîinaay kajamoorum ma kunuur umu, kugawe bukan kahammi kîyyaku kugaba (40). 14 Ña ban di kukay ki kulob di yahaanay yata bumaaŋenaabu bata Emitay, di poop yahaanay yata êsukay ma keeniil: “Ûli nunuure ban, mante pîya uket. Be mumulet bi uri, nujaken ûli babujut Pawlu! 15 Moo, mbi jiboñ be baabu annahaanaw ata esellooraay di êkorteelay ma jeenool âgawul Pawlu ma âkayil be ute, mata jîkine ma jîmir jak mata elobay yatawool. Ma ûli mbi ûhupuwool, bala aan âriiŋul ute, nubujool.”
16 Be ajaajuwaw agam añool âliin Pawlu, najam maama kûynaa'uku kutabulhenoorum mata jabujaju jatawool, ña nakay be di êkorteelay ki añaaŋen mo Pawlu. 17 Ña Pawlu nâwoolul annahaanaw aahu ata di esellooraay ban naanool: “Ukay di ajaajuwaw ume be baabu di annahaanaw âmakaaw ata esellooraay ma nki alobool wah winŋet.” 18 Ña annahaanaw umu ata esellooraay nakay d'oo be bo, âriiŋ naanool: “Âynaaw ammi ûnda di ekullhay aamom Pawlu, âwollommi ma aanom iñakiitool iŋalli ajaajuwaw ume mata nabaje hurim ha mbi alobi.” 19 Ña annahaanaw umu âmakaaw ata esellooraay, nasohool di kaŋen ma kuteeŋo deh, ban narinkool aanool: “Wa nûkimmi ulobom?” 20 Ña naanool: “Jûdewwi kutabulhenoore ban ma mbi kûboñul ma kulhawi ma mbi ukay di Pawlu kajom be Hulhanahu Hâmakaahu hata jûdewwi, ma nki kurinkool joon mata elobay yatawool. 21 Be aatuba ûynen, mata bukanaku kahammi kîyyaku kugaba (40) koku ma kûhupuwoom, mata kunuure ban di kaan mumulet bi kuri, di kusiben, buko babujutool. Moo, kubandoore ban, aw kukobem d'aw!” 22 Ña annahaanaw umu âmakaaw ata esellooraay naanool: “Ootuba uloo'mo an akeel kaan mo ma ûcuukaam.”
Pawlu di kuboñool be baabu âyyaw aaneyim Phelis
23 Ban annahaanaw umu âmakaaw ata esellooraay, nâwoolul yahaan yaayu egaba kata di esellooraay kamakoom ma aaniil: “Jikay ki jibandoor esellooraay kârimmi sîteemeer sigaba (200), di kata sipilinjasu kârimmi bukanaku êhaaji di kunŋen (70), di poop kata sijanasu kârimmi sîteemeer sigaba (200), ma mbi tijon, ewooraay yagasom hutok di sibakiir êriiŋ, di jikay di buko be Sesareya. 24 Ban di jibandoor poop epilinjay ya mbi Pawlu ageelo ma jikay, ban di jipooyool jak ki jiwul âyyaw aamom Phelis.” 25 Ban annahaanaw umu âmakaaw ata esellooraay, naŋiic kaytaku be baabu âyyaw umu ma aanool:
26 “Âyyaw Phelis, înje Klawdiw Liisiyas nisaapi.
27 “Jijaa, âynaaw ume jûdewwi kusohoom, be jinŋet kubujeenool, be na ijammi kaan oo anaw ata Rooma nikay di esellooraay yûmbaam îriiŋ niyabool di buko. 28 Be mata ma îkimmi îmir wahaw wa êsukay kuloom wa agam, momakiimom nikay d'oo be di Hulhanahu Hâmakaahu hata jûdewwi. 29 Boo ba îmirummi kaan âynaaw ume agawut wah wâkojiye wa mbi uwuu'mo nâketum, be mante nakullhi. Mata elobay yakiimom di kugawumool umu, mata kûboñaku katayiil. 30 Be niga ban di kuñaaŋenom kaan jûdewwi kutabulhenoore ban ma mbi kubujool, momakiimom ma iboñumuliwoom. Ban neen jûdewwi kammi oo agam kôji, mbi kûkayil be baabu d'aw ma nki ujamiil poop.”
31 Ña esellooraay di kuga non ma annahaanaw atayiil alobiim, ma kukay di Pawlu busonnaaru be Antipaatris. 32 Kûriiŋ hata kajom, esellooraay yaayu di kûlaañul ma kata sipilinjasu kûhul d'oo. 33 Ña na kugam kûriiŋe Sesareya, di kuwul âyyaw kayta'uku, ban di kuwulool Pawlu. 34 Ña âyyaw umu napisen kayta'uku, ban narinkool ba awoom. Be na Pawlu aanoom oo di bantaabu bata Siliisiya nawoom, 35 ña naanool: “Na mbi bukanaku kammi wahaw nugam kûriiŋul, di jitallhen.” Ban naboñ ma kuŋarool ki kukulh di kâyyaku kata Erodis.