Hunongahu hata jabujaju jata Jesus
22
Nownu, kâlundaayaku kata kûmburuwaaku kaakutum phermentu, kaaneyim poop Paaskuwa, di kuhuut. 2 Yahaanay yata bumaaŋenaabu bata Emitay, di bulhikitenaabu bata kûboñaku kata Emitay, mata ma kûkolim êsukay, ya kupaam maama mbi kuga ma kubuj Jesus, ma an aatuba âmir. 3 Ña Esatanaay di êjupo Judas aaneyim poop Iskariyotis, aamom ata di kumakaaku katawool, kaamom kunŋen di egaba. 4 Nakay ki kûtabulhenoorul di yahaanay yata bumaaŋenaabu bata Emitay, di yahaanay yata bupooyaabu bata Eluupay yata Emitay, mata maama mbi aga ma awuliil Jesus. 5 Ña yahaana'uyu di êririgen noon, di kujamoor di kaan mbi kuncaamool. 6 Judas naaniil aawo, ban ya apaam maama mbi aga ma awuliiwool ta bukan kuleem.Kurebooraaku kata Jesus di kubandoor be bata Paaskuwa
7 Ña hukahu di hûriiŋ hata kâlundaayaku kata kûmburuwaaku kaakutum phermentu, kaaneyim poop Paaskuwa, na êsukay yata Israyel kubujem mûgaraniinaamu. 8 Jesus naboñ Pedru koo di Joŋ, ma aaniil: “Jikay ki jicookoor ma mbi uriyaal Paaskuwa.” 9 Di kurinkool, keenool: “Ûtey nûkimmi ta mbi uriya yo?” 10 Naaniil: “Na mbi jiga jinebeje di hânkijahu, mbi jipaam di âynaaw oo ma apeenowlom elompay yata mumelamu, di jisoolhenool be di eluupay da mbi anebej. 11 Di jeen ata eluupa'uyu: Alhikitenaaw âbollolim ma urinki êwaanaatay da mbi ari Paaskuwa di kurebooraaku katawool. 12 Mbi âyisuul êwaanaatay yâamak hatiya di etaahay yâtiyaaray yaakum miñamu poomo. Di jicookoor ma mbi uriyaa'yo dô.”
13 Na kukayum kûriiŋ, di kutook wahaw peh non ma Jesus alobiim. Ña di kucookoor be huriyahu hata Paaskuwa. 14 Nagam ña tîriiŋe, Jesus di kumakaaku katawool, di kuleeho ma kuri. 15 Ña naaniil: “Nîkinaaliye mâamak ma uriyaal tanor kâlundaaya'uke kata Paaskuwa, bala îlaam. 16 Mata ma iñaaŋenuul di kaan, eetubi iriyirer joon Paskuwa'uye be na mbi kâyyaku kata Emitay kûriiŋul, ma emelhen êsukay yata yo.”
17 Jesus nasoh jikoopaaju jata êbiiñay, naan Emitay jêrejep ban naaniil: “Jiyab jîgiitoor. 18 Mata ma ilobuul di kaan, eetubi ijakenurer êbiiñaa'uye be na mbi kâyyaku kata Emitay kûriiŋul.”
19 Nasoh hûmburuwaahu, naan Emitay jêrejep, ban natii'ho awuliil, ban naaniil: “Ûde eniilay yûmbaam yawulim be batawuul, mbi ya jiga ume ma jiwolhuwom.” 20 Na kurim ban, nasoh poop jikoopaaju jata êbiiñay ban naaniil: “Ûde hûsimahu hûmbaam hâyuwim be batawuul, haamom yaŋaayay yunkulay ya Emitay ejuumemmi be batawuul. 21 Be jijam, anaw a mbi aŋarom awul kûsuumutaaku kûmbaam, oome ute ma uriyem dânor. 22 Malhegen Añool Ajamaat, mbi agayi non ma Emitay êkimmi. Be buhiiraabu bâamak bobu di anaw a mbi aŋarool awul bukanaku.”
23 Ña ya kurinkoor ay di buko a mbi âgawum mo.
A Última Ceia
Kurebooraaku kata Jesus di kuñoosoor
24 Kurebooraaku katawool, di kuñoosoor mata aahu a mbi âgawum annahaanaw. 25 Ña Jesus naaniil: “Yahaanay yata etaama'uye, ya kuga bukanaku di sembe di ûyyaw watayiil, ban ya kêenul buko yahaanay yagawem jak. 26 Be miwuul, ntuwa mo ma mbi jiga. Mbi jiga bûti, anaw agam annahaanaw di miwuul, oo mbi aga non aŋil, anaw agam âyyaw, oo mbi alaañ aga non agorooraaw. 27 Anaw abaa'jaa agorooraaw, ña di buko di agorooraaw umu ay âhaŋummi? Ntuwa umu ammi ma aleehom? Be injume ute di miwuul ma igawem non agorooraaw atawuul.
28 “Miwuul ya jilakom tanor d'înje di hûlaamahu hûmbaam. 29 Non ma ampawom Emitay egawommi âyyaw, înje poop mbi igawuul kîyyaku, 30 mbi uriyaal, nusibenaal tanor di kâyyaku kûmbaam. Ban nigawuul jileeho ma jiga batalenabu sîbajoorumasu saamom kunŋenay di sigaba sata Israyel.”
Jesus naan Pedru mbi alatool
31 Jesus nâanul: “Simoŋ, Simoŋ, jijaa, Esatanaay elhawe ma eweyuul non emaano, ma elasuwuul mante kâynenaku katawuul koku ma kûlibum. 32 Be nilhawe Emitay be batayi, ma kâynenaku katayi keetubi kubawo. Mbi ulatom, be na mbi ûlaañul be baabu d'înje, nonkunen kutiyi.”
33 Pedru naanool: “Ata Emit, ninuure etukalati. Mbi ireboor d'aw palimo ma kukulhola, palimo poop ma kubujola.” 34 Be Jesus naanool: “Pedru, ma iñaaŋeni eeni, bala kalhitaaku kulhit jaat, mbi ôonul ûmirutom be ñeemo ñâhaaji.”
Ujaasiyaaw ugabaaw
35 Ban Jesus naaniil: “Na iboñuum miwuul baakut bancaam, baakut kumboota, baakut poop sikatab saasu, jibaje hûlaam?” Di keenool: “Makeel mûlaamentoli.” 36 Naaniil: “Be maame an abaa'jaa bancaam, abaa'jaa poop humboota, naŋaa'ho âkayetum. An abajutum kajaasiya, naŋar humantaahu hatawool anoom, âbajum ko. 37 Momakiimom ma ilobuul di kaan, maama ŋiicim mûmbaam manooman mbi muga:
‘Kugawool non an âhoŋe.’
Mata maama ŋiicim mûmbaam manooman mbi muga.” 38 Di keenool: “Ata Emit, ujaasiyaaw woowe ugaba.” Naaniil: “Uyeje.”
O Ensinamento no Cenáculo
39 Jesus nâcaa'to ma akay di kurebooraaku katawool be di hurimbiliŋahu hata Oliveyra, non ma agaweenem. 40 Na kûrintom naaniil: “Jilhaw ma aatuba jilo di kabunten.” 41 Ban nâraajuluwiil kotiit, nâtiigen ma ya alhaw Emitay, 42 ma âanul: “Ampoom, ûkin jaa nûraajulenom hûlaama'uhe harem ume, be ntuwa non ma înje îkimmi, be non ma aw ûkimmi.” 43 Ña amalaakaw ata hatiya di emitay, nâkayil bi abaŋenool sembaasu. 44 Di hulhoŋoruwa'uhu, ña nahaŋ ma ya alhaw di sembe. Egeenay yatawool di elaañ ega non kusot kata hûsim, ma ya kûteyil be di etaam.
45 Na alhaalom ta ya agam kalhawaku, nakay ki atoo'to kurebooraaku katawool, âriiŋ natookiil ma kuŋotum mata ma gawiim ñânkiiteni. 46 Naaniil: “Mata wa ma jemmi ma jiŋotem? Jilhaalo, ma jilhaw Emitay, ma aatuba mbi jilo di kabunten.”
Husohahu hata Jesus
47 Be oo baroŋ nalob, kayooŋaku kata bukanaku di kûriiŋuu'to. Aahu ata di kurebooraaku katawool kaamom kunŋen di egabaay aaneyim Judas, oma ayabuliim kayooŋ, âriiŋ nakay ki âpoon Jesus. 48 Be Jesus naanool: “Judas, bâpoonera'ube bata ma ûnoomum Añool Ajamaat?”
49 Be kaaku kalakotom di Jesus na kunamulemmi wahaw wa kûkimmi kugawool, di keenool: “Ata Emit, ulhibiil ujaasiyaaw?” 50 Ña aahu ata di buko, naŋar kajaasiyaaku ma alhib agorooraaw ata annahaanaw âmakaaw ata bumaaŋenaabu bata Emitay ma atij kâjaŋayaku kûriraku. 51 Be Jesus naaniil: “Jiwaa'bo, yeje!” Ban nagorool di kâjaaŋaya'uku, di kulaañ to. 52 Ña Jesus nalob di yahaanay yata bumaaŋenaabu bata Emitay, di kata bupooyaabu bata Eluupay yata Emitay, di poop yahaanay yaayu kakaylom be husohahu hatawool, ma aaniil: “Jîŋarul ujaasiyaaw di kûgolaku be husohahu hûmbaam non an âhoŋe nigawe? 53 Inja înje ya ilakuwemmi tanor di miwuul di Eluupay yata Emitay, be jisohutom no. Be mowme tatawuul tîrimmi, ma jiga non ma Esatanaay êkimmi.”
Jesus é Traído e Preso
Pedru nalat Jesus
54 Ña di kusohool, ban di kuŋarool be di eluupay yata annahaanaw âmakaaw ata bumaaŋenaabu bata Emitay. Pedru nârangiil ma ya asoolheniil. 55 Na kuyabemmi sambunasu di tutaru di ekaakay, êsukay peh di ekay ki elako to. Pedru poop nakay ka alako to di buko. 56 Aahu ata di bugorooraabu bata eluupa'uyu najukool ta alakom kot sambunasu, najikerool jak, ban nâanul: “Ume poop ya areboor d'oo.” 57 Be Pedru nalat ma âanul: “Añakanaye, înje îmirutool.”
58 Piyowut aahu najukool, naanool: “Aw poop ata di buko.” Be Pedru naanool: “Âynaawe, înje igawut ata di buko.”
59 Piyo kotiit, aahu nâanul: “Di malhegenumaayamu ume ya areboor d'oo, mata ata Gâlileeya.” 60 Pedru naanool: “Âynaawe, îmirut miñamu ma ulobem di mo.” Be oo baroŋ nalob, kalhitaaku di kulhit. 61 Ña Jesus nâtiiwowul ma ajikerool kew. Ña Pedru nawolho non ma aloboom, aanool: “Bala kalhitaaku kulhit jaat, mbi ôonul ñeemo ñâhaaji ûmirutom.” 62 Ña nâcaalh ma ya akaaw ma alhooŋooro.
Pedro Nega a Jesus
Jesus, di kurinenool
63 Kûynaaku kalakotom ma kupooy Jesus, ya kurinenool ko ma kûnagulem d'oo, 64 di kûhipen buulabu batawool, ban ya kurinkool keenool: “Uta ma, ûrejoli anaw amabim!” 65 Ban ya kûlobikoorool wah wameeŋe, ma ya kugelool.
Jesus, di kugawool batalenabu
66 Na titijemmi, yahaanay yata êsukay, di yahaanay yata bumaaŋenaabu bata Emitay, di bulhikitenaabu bata kûboñaku kata Emitay di kujoojenoor ta kugawem batalenabu, ban kaaku di kuŋar Jesus be to. 67 Di kurinkool ma keenool: “Kama aw Kristu?” Jesus naaniil: “Êenuu'jaa înje oo, jeetubi jîynen. 68 Irinkuu'jaa poop, jeetubi jilaañenom. 69 Be ute be kayooŋ, Añool Ajamaat mbi alako di kareb kûrir kata Emitay yata Sembe.”
70 Buko poopiil di keenool: “Kama aw Añool Emitay?” Jesus naaniil: “Miwuul jiloomom.”
71 Di kêenul: “Ay mbi urinkaal joon, ban nujamaa'mo ban di butumabu batawool?”
Jesus é Humilhado e Interrogado