Âkutuwaataaw añohum simpeesaasu
21
Jesus oo di ekaakay yata Eluupay yata Emitay, najuk busaanumuwaabu koo ma kugawem bancaamabu di ekeesay yata opherta. 2 Najuk poop âkutuwaataaw âsukateenom ma âgadom simpeesaasu sigaba sa abaam. 3 Ña naaniil: “Ma ilobuul malhegen eenuul, âkutuwaata'ume âsukateenom nahaŋe mañoh bancaam bukanaku peh. 4 Mata busaanumuwaabu kuñohe bancaamabu di ekeesay yata opherta be kukatene baabu, be âkutuwaata'ume, di hûsukatenaahu hatawool nawul baaba abaam poobo bata huriyahu hatawool.”
A Oferta da Viúva
5 Bukan kaaku ya kulob mata ma Eluupay yata Emitay ecookormim bawaalisabu bajakaabu, di poop wah waawu wawulim opherta be bata Emitay. Jesus naaniil: 6 “Waha'uwe wa jijukem di wo, hukahu mbi hûriiŋ na mbi hukal heetumbi huŋañuno, woo kaŋ peh mbi ûbuyi.”
Hûlaamahu hûtiyaarahu
7 Ña di kurink Jesus ma keenool: “Alhikitenaawe, ûney na mbi wahaw uwe uga? Wa mbi uga êmanjumay ya mbi êyis kaan waha'uwu ûriiŋe?”
8 Be naaniil: “Jijaamo ka mbi kubuntenuul, mata bukan kameeŋe mbi kûkayil di kañaaŋaku kûmbaam, ma kêenul: Înje Kristu, di kêenul poop: Hukahu huhuute, be aatuba jisolheniil. 9 Mata na mbi jijam kutiikaku kata êsuk di êsuk, di kaaku kâruŋoorum ma kutiikoor dô, aatuba jîkoli. Miña'umu mbi mujuki para, be ntuwa hukahu ha etaamay mbi êbuyo.”
10 Ban naaniil: “Sîsukasu mbi sitiik, kîyyaku poop mbi kutiik. 11 Tiŋ tameeŋe di etaamay mbi eboboken mâamak, bacaarabu mbi bêemi tiŋ tameeŋe, ûjuutaw poop di wêemi tiŋ tameeŋe, miñamu mâkoliyenim mâamak mbi mujuki, di poop sîmanjumasu sa mbi sijuki hatiya di emitay.
12 “Bala miña'umu peh muga, mbi kusohuul, mbi kûlaamenuul, mbi kugawuul di siluupasu sata kalhawaku ma kugawuul batalenabu, mbi kusohuul kukulh. Mbi kusohuul kuñoh kîyyaku di yahaanay yata êsukay hurim kañaaŋaku kûmbaam. 13 Miña'umu mbi muga ma jeeli jilobiil elobay yata Emitay. 14 Jeetuba jinongoor ma mbi kulobuul di jilaañeniil, 15 mata mbi iñohuul hurimahu di majaalhaamu ma an ata di kûsuumutaaku katawuul ayetutum ahaatumuul di hurim hakeel. 16 Simpawuul, di kutiyuul, di bukanuul, di kupaaluul, mbi kugawuul ma kusohuul. Kaaku kata di miwuul, mbi kubuji. 17 Bukanaku peh mbi kuraayuul hurim kañaaŋaku kûmbaam. 18 Be kal kanor kata di kûkuwaku katawuul keetubi kunep. 19 Jijuum jaa tir, mbi jipak.”
Jesus nâanul Jerusaleŋ mbi ekajeni
20 Jesus naaniil joon: “Na mbi jijuk esellooraay ma eŋoomemmi Jerusaleŋ, di jîmir kaan huute ma ekajeni. 21 Nownu kaaka ka mbi kulako dô Jûdeya, di kutey be di kurimbiliŋaku. Kaaka ka mbi kulako di hânkijahu di kûcaalh, kaaku ka mbi kulako butat, keetubi kunebej di hânkijahu. 22 Mata huka'uhu hata ma Emitay eles êsukay yata Israyel, ma miñamu peh maŋiicim muga. 23 Awo! Buharetaabu, di yaaraay ka mbi kuraahen no, mata mbi baj hûlaamahu hâamak di etaamay. Hûlaama'uhu mbi hûlowum êsukay hîm, mata ma Emitay ebirikum di buko. 24 Bukanaku mbi kuŋaalumi kajaasiyaaku, kaaku mbi kusohiil ma kuŋariil be bâsukabu bata di etaamay peh bata bukanaku kagawutum kata Israyel, mbi kuyokosenoor Jerusaleŋ be na mbi tatayiil tibawo.
Añool Ajamaat mbi âkayil
25 “Mbi sîmanjumasu sijuki di jaley, di hulheeŋahu, di poop bootabu. Ube di etaamay sîsukasu mbi sîguno, setubi sîmir ma mbi siga hurim hûlaamahu hata waajeelaaw wata kasamaaku. 26 Mbi ejamaatay kuliim hurim bûkolaabu, koo di hunongoorahu hata wahaw wâkayewuum be di etaamay. Mata sembaasu sata Emitay, wahaw peh wata sembaasu wammi hatiya, mbi ugogoroor. 27 Noo, Añool Ajamaat mbi ajuki oo ma âkayewuum di uwiiñaw di sembaasu sâamak di majaaŋaamu. 28 Na mbi wahaw uwe ûcuk ma uga, di jîtiken ûyegetaw watawuul mata huute ma Emitay ehikuluul.”
Kaliikumaku kata buyaajabu
29 Ban, nagawiil kaliikuma'uke ma aaniil: “Jilaso buyaajabu baaneyim phigeera di uyaaj waawu. 30 Na mbi ûcuk ma ûrimen, di jîmir kaan bûriiŋaabu buhuute. 31 Moomu poop kaŋ ma mbi jijuk wahaw uwe, di jinamulen kaan kâyyaku kata Emitay kuhuutulo.
Elobay yata Emitay yeetubi êbuyo
32 “Ma ilobuul malhegenumaayamu, bukanaku kammi ma kurommi mowme, bukaaku keetubi kuket be na mbi miña'umu ma ilobuum muga. 33 Mata wahaw peh wammi hatiya, di wammi di etaamay, mbi ûbuyo, be elobay yûmbaam yeetubi êbuyowurer.”
34 Ban naaniil joon: “Jijaamo, ma aatuba jîlaamenooro di eroŋay yajakutaay, di êkalaay, di hunongoorahu hata miñamu mata etaama'uye, ka mbi huka'uhu hûriiŋul, di hugawuul wûb 35 non ekoliŋen, mata mbi huga be bata âmbasuk peh! 36 Jiga kûkuwaku katawuul jak, ma jijaŋen di kalhawaku kata Emitay ma jibaj sembe ma mbi jeeli jimellh di wahaw uwe poowo, be na mbi Añool Ajamaat âriiŋul natookuul ma jibandoorum ban.”