Kaliikumaku kata buwañaabu balesaabu
12
Ban Jesus nalhikitenumiil uliikumaw, ma aaniil: “Âynaaw agam kalhaakaku kata muriyaayamu maaneyim ûuba ban nûwul ko pooko, ban nacookoor dô tiŋatu tata jaguncenaju jata yo, naga poop buyenkabu bata epooyay, ban awul ko kûynaaku kaaku kusohool ma akay êsuk. 2 Nagam tîriiŋe ma muriyaaya'umu muhali, ata ko naboñuliil agorooraaw atawool ma nki kuwulool bûgiitool. 3 Be kûynaa'uku di kusoh agorooraaw umu kûnagul ban di kulaañenoowool tîikoorool. 4 Ata kalhaakaku naboñiil joon agorooraaw aahu, na ârintom kûynaa'uku di kukeberool ban di kugelool ma kupuñunenool. 5 Ata kalhaakaku naboñuliil joon agorooraaw aahu, di kubujool. Bukan kameeŋe aboñuliim di kusohiil kûnagul, kaaku di kubujiil. 6 Ña ata kalhaaka'uku naŋañen añoolool anoraw silh a aboolaatum noon. Ña di hûbanumahu, naboñuliil añoolool ma âanul: ‘Magam añoolom, manooman mbi kujam d'oo.’ 7 Be na kuŋandelloom di kutabulhenoor ma ya kêenul: ‘Inja añoolool omu a mbi alako di kalhaakaku, ubujaalool ma mbi uŋara'ko.’ 8 Ña di kusohool kubuj, ban di kuŋar ehuluŋaayay kubet tîyaŋ.”9 Ban, Jesus narinkiil aaniil: “Ña ata kalhaaka'uku, bu mbi aga kûynaa'uku? Mbi âkayil abuj kûynaa'uku ban nawul kalhaakaku bukan kaaku.” 10 Ban naaniil joon: “Kama jipisenorut maama elobay yata Emitay eloom?
‘Huwaaliisahu ha buteepaabu bulatum,
hohalammi huga kâjajaku kasoom eluupay.
11 Ûdu, wahaw wa Ata Emit agam,
nujukaa'wo nujaahaliyaal.’ ”
12 Ña yahaanay yata jûdewwi di kûkin kusoh Jesus, mata ma kunamulemmi di kaan kaliikuma'uku di buko kuyam, be ma kûkolim êsukay, ña di kuwalhoo'bo ma akay.
Yahaanay di kûhop Jesus mata buyuupabu
13 Ban huk haahu, yahaanay yata bumaaŋenaabu bata Emitay di kuboñ phârisewwi di bukan kaaku kata di kaasaaku kata Erodis, ma kukay ki kûhop Jesus ma mbi keeli kûsohumoo'to di hurim hakeel. 14 Na kûrimmi di keenool: “Alhikitenaawe, ûli nûmire kaan aw anaw alhegenumaayaw, ukooŋendiit an bakooŋut mata ûgaworiit ejuu'di buul, be ya ulhikiten bukanaku malhegenumaayamu mata Emitay. Moo ûysoli, mante jake pîya di bagawerabu batoolaal, ma uyuup âyyaw âmakaaw be mante jakut?”
15 Be Jesus ma anamulemmi maama kûhooloorem narinkiil aaniil: “Kama mata wa ma jipaamumem ta mbi jisohumom? Jiŋallom ma empeesa ijuk.” 16 Ña di kuŋalloo'yo, narinkiil aaniil: “Kama di empeesa'uye, buulabu bata ay di kañaaŋaku kata ay kemmi ûde?” Di keenool: “Âyyaw âmakaaw ata Rooma.” 17 Ña Jesus naaniil: “Jiwul âyyaw âmakaaw wahaw wagam watawool, di jiwul Emitay wahaw wagam wata yo.” Ña bukanaku peh di kujaahali.
Sadusewwi di kurink Jesus mata jalhaalaaju jata di kuketaaku
18 Ban kûynaaku kaaku kata di kaasaaku kaaneyim sadusewwi kalobem di kaan, jalhaalaaju jata di kuketaaku jibajut, di kukay ki kutoo'to Jesus ma kurinkool keenool: 19 “Alhikitenaawe, Moyses moo ma âŋiicolim kûboñaku di kaan: Ânniinaaw ayab jaa anñaakanaw ban kubajut aŋil naket, atiyool natunool ma kubaj kuŋil ka mbi kuga kata atiyool akeem. 20 Moma kûynaaku hutok di egaba kugam. Aahu ahammi nayab, ban kubajut aŋil naket. 21 Atiyool agabutaw natunool, ban kubajut aŋil poop naket. Âhaajutaw natunool poop, moo manoramu. 22 Moomu kaŋ ma batiyaaya'ubu hutok di egabaay kuyaboom, ban di kuket babajut aŋil d'oo. Ban nkit añakanaw umu naket. 23 Ña, na mbi kûlhaalowul di kuketaaku, aymoom a mbi âŋarum anñaakanaw umu? Mata buko peh kuyabeyabeenoom.”
24 Jesus naaniil: “Miwuul jîpuule, mata jîmirut kûboñaku kata Emitay, di poop sembaasu sata yo. 25 Mata na mbi bukanaku kakeem kûlhaalowul di kuketaaku, bûyaboor alet, mata mbi kuga non kumalaakaku hatiya di emitay. 26 Kama jipisent di kaytaku kata Moyses ta kuloom mata jalhaalaaju jata di kuketaaku, na Emitay eloom d'oo di hûñoobahu ha ya hâlum sambunasu, ma yeenool: ‘Înje Emitay yata Abrawoŋ, di Isaki di Jako.’ 27 Mata, yoo ntuwa Emit yata kuketaaku, be yoo Emitay yata bukanaku karommi. Moo, miwuul jîpuulikoore.”
Kûboñaku kata Emitay kahammi
28 Aŋiicaaw aahu ata kûboñaku kata Emitay najam maama Jesus ya kuloom di sadusewwi, najuk kaan Jesus nalaañeniil jak, ña nakay arinkool aanool: “Kama di kûboñaku pooko kata Emitay, ûkey kahankom pooko?” 29 Jesus naanool: “Ka kahankom pooko koo keemom uke: Israyel, jitallhen! Ata Emit oo aamom Emitay yatoolaal, yo keb egam Ata Emit. 30 Ûkin Ata Emit aamom Emitay yatayi di êsigiray yatayi peh, di yâarooray yatayi peh, di kanamulenaku katayi peh, di poop sembaasu satayi peh. 31 Kugabutaku koo keemom uke: Ûkin apaali ajamaat non ma ûkinoorom. Bajut kûboñ kakeel kata Emitay kahankom.”
32 Aŋiicaaw umu ata kûboñaku kata Emitay naanool: “Alhikitenaawe, nulobe jak! Malhegenumaayamu na uloom di kaan: Yo kaŋ keb egam Emitay, bajut Emit ya sirewe. 33 Ma ûkinaa'yo di sîsigirasu satoolaal peh, di kanamulenaku katoolaal peh, di sembaasu satoolaal peh, nûkinaal poop kupaalolaal ejamaat non ma ûkinooruwaam, moo haŋ majak di maama mbi uŋar uncaamaw ubuj ban nuyaben wo ma uga heenaayahu yata Emitay.”
34 Na Jesus ajuum kaan nalobe jak di majaalhaamu matawool, ña naanool: “Aw ulet ma jîrangiyoorum di kâyyaku kata Emitay.”
Ban an akeel arument arinkool joon wah wakeel.
Kristu oo añool David
35 Ban, na Jesus ya alhikitemmi êsukay di Eluupay yata Emitay narinkiil aaniil: “Kama mata wa ma bulhikitenaabu bata kûboñaku kata Emitay kêenumem, Kristu oo añool David? 36 Hurim Buynum Bunapaabu, nalob âanul:
‘Ata Emit, nâanul Ata Emit ûmbaam:
Uleeho di kaŋenom kûrir,
be na mbi iga kûsuumutaaku katayi ma uyokoseniil.’
37 Kama David âwool jaa Kristu Ata Emit, bu Kristu aalim aga joon añool David?” Buyooŋabu bata bukanaku kalakotom, di sûumiil ma ya kutallhenool.
Jesus nalob mata buŋiicaabu bata kûboñaku kata Moyses
38 Na Jesus ya alhikitemmi êsukay, naaniil: “Mbi ya jîjaamuwoorum buŋiicaabu bata kûboñaku kata Emitay, mata ya kûkin kûjupo kûsabadooraaku ban di kuyuuŋoor di kânkijaaku kata sîsukasu, ma êsukay ya kusaapiil ma kûbinkeniil. 39 Di kûkin poop ma ya kuleeho di kûtenkaku kammi kayooŋ di siluupasu sata kalhawaku kata Emitay, di poop bata ûneŋaw. 40 Ban ya kutenk bûkutuwaataabu, di kubot siluupasu satayiil ban ya kûhooloor ma kuga kalhawaku kata Emitay piyo. Moo, buko hûjimenahu yatayiil, Emitay mbi ehaŋ malesiil.”
Âkutuwaataaw agam simpeesaasu di ekeesay yata opherta
41 Haahu, Jesus oo dô di eluupay yata kalhawaku kata Emitay, naleeho ñata ta ekeesay yata opherta yemmi ma ya ajiker êsukay maama ya kûgadom bancaamabu. Ña kusaanumaku ya kuga dô bancaamabu lhay. 42 Be anñaakan aahu âkutom, ban nâsukateeno nâkayil aga dô simpeesaasu sigaba sâriiŋutum makeel. 43 Ña Jesus nâwool kurebooraaku katawool ma aaniil: “Ma ilobuul malhegen di kaan, âkutuwaata'ume âsukateenom, nahaŋe ma aga bancaamabu di ekeesay yata opherta. 44 Mata êsukay egawe di ekeesay yata opherta bancaamabu ba kukatemmi, be añakanaw ume, di hûsukateenahu hatawool naga dô simpeesaasu peh sa abaam saamom sa mbi aŋareen ânoomum miñ ari.”