Jesus nâanul Eluupay yata Emitay mbi etahi
13
Na Jesus agam oo ma âcaalhewuum di ekaakay yata Eluupay yata Emitay, aahu ata di kurebooraaku katawool naanool: “Alhikitenaawe, jijaa kuwaaliisaku, di siluupa'use ma sijaakum.” 2 Be Jesus naanool: “Nujuke bateepera'ube barem ume, bajut ewaaliis yakeel ya mbi eŋañuno ma elaken di epaa'yo, yaatumbi etahi.”
Jesus nalob mata hûlaamahu hâreesewuum
3 Na Jesus aleehom di hurimbiliŋahu haaneyim Oliveyra ma ajooŋoor di Eluupay yata Emitay, Pedru koo di Joŋ, di Tiyaagu be di Andre, di kulako diyooniil di Jesus, di kurinkool keenool: 4 “Ûrejoli, kama ûney na mbi miña'ume muga, êmanjum bu ya mbi êyis kaan tîriiŋe?”
5 Ña Jesus naaniil: “Jijaamo ma an aatuba abuntenuul. 6 Mata bukan kameeŋe mbi kûkayil di kañaaŋaku kûmbaam ma ya kêenul buko Kristu. Be mbi kubunten bukan kameeŋe. 7 Na mbi jijuk kutiikaku, di jijam mata kaaku kammi râagi, aatuba jîkoli, mata moomu kaŋ ma mbi ga, be ntuwa hukahu hûbanumahu hûrimmi. 8 Mata mbi êsuk etiik di epaa'yo êsuk, kâyyaku di kutiik di kupaa'ko. Tiŋ tameeŋe etaamay mbi egoroor, bacaarabu di busoh êsukay. Miña'umu moo mbi muga hûlaamahu hûtiyaarahu.
9 “Be miwuul mbi jijaamo, mata mbi kusohuul ma kuŋaruul be di ûyaw wata batalenabu, di kûnaguluul di siluupasu sata kâmebooraku. Hurim înje, mbi kuŋaruul be batalenabu di ûyaw wata yahaanay yata êsukay, di poop kîyyaku, ma mbi jêeliwum to jilobiil elobay yata Emitay. 10 Be na mbi miña'umu meen muga, elobay yâsuumaay mbi elobi para di âmbasuk peh. 11 Na mbi kusohuul kuwul yahaanay yata êsukay, jeetuba jinongoor maama mbi jilob. Be na mbi rîiŋ no, hunongahu ha mbi Emitay ewuluul ma jilob, di jiloo'ho, mata elobay ya mbi jilob yeetubi ega yatawuul, be mbi ega yata Buynum Bunapaabu. 12 Mata kameeŋe mbi kuwul kutiyiil bukan kaaku ma kubujiil. Kuŋil kaaku di kuga kubajayiil, ma bukan kaaku kubujiil. 13 Êsukay peh mbi kuraayuul mata ma jigam kurebooraaku kûmbaam, be anaw a mbi ajuum tir ii be hukahu hûbanumahu mbi apak.”
Hûlaamahu hâmakaahu
14 “Mbi jijuk miñamu mâgiipunenim, ban di mûkoliyeni kaga, ma mugayim tiŋatu ta metumbi mugaweeni. (An apisemmi, eloba'uye, jake ma anamulen.) Moo, bukanaku ka mbi kulako no di bantaabu bata Jûdeya, di kutey be di kurimbiliŋaku; 15 anaw a mbi alako no hatiya di etaahay, aatuba âwalowul ma anebej di eluupay âŋarul miñ makeel, be natey ma akay. 16 Anaw a mbi alako no butat, aatuba âlaañul be siluup âŋarul miñ matawool. 17 Awo, yaaraay ka mbi kuharet no, di kaaku ka mbi kuraahen no! 18 Jilhaw Emitay ma miña'umu metuba muga no di hujamahu; 19 mata kuka'uku êsukay mbi êlaam noon. Hûlaama'uhu no kaŋ no na Emitay êwwemmi etaamay, hûlaam hujukuti hare mo, hakeel poop heetubi hujukureri ha mbi hure mo. 20 Kaleteen ma Emitay eŋasum kuka'uku kata ûlaamahu, ajamaat aatubi aroŋeen. Be hurim mata bukanaku ka yo ejotum ma mbi kumellh, moo ma êŋasummi kuka'uku.
21 “Moo, an aanuu'jaa: ‘Kristu oome!’ Be mante naanuul: ‘Jijaa omma!’ Jeetuba jîynen; 22 mata bûhoolooraabu bameeŋe mbi bûcaalhul ma ya kêenul buko Kristu, di kêenul poop buko buñaaŋenaabu bata kûboñaku kata Emitay, di kuga sîmanjumasu, di kuga poop miñamu magam non mata sembaasu sata Emitay kûbuntenum êsukay, ma keeliyeen jaa, di kubunten poop bukanaku ka Emitay ejotum. 23 Moo, jijaamo mata nilobuu'mo ban.”
Añool Ajamaat mbi âkayil wûb
24 “Be na mbi hûlaama'uhu huga hubawe, jaley mbi amuucen, hulheeŋahu heetubi hujaaŋ; 25 bootabu mbi bûlowul, wahaw wata sembaasu wammi hatiya di emitay, mbi ûyikijeni. 26 Ña bukanaku mbi kujuu'no Añool Ajamaat oo ma âkayewuum di sembaasu sâamak, di poop majaaŋaamu hatiya di uwiiñaw. 27 Ña noo, mbi âboñul kumalaakaku ma kukay be di urebaw peh wata etaamay ma kûmeb bukanaku ka Emitay ejotum kammi di âmbasuk poopool.”
Kaliikumaku kata buyaajabu baaneyim phigeera
28 “Jilaso ma buyaajabu baaneyim phigeera. Mata na mbi buga bûrimenlo, di jîmir kaan hujamahu hûriiŋe. 29 Moomu poop kaŋ, na mbi jijuk miña'umu, di jîmir kaan Añool Ajamaat nahuute kâriiŋul. 30 Malhegen ma ilobuul kaan, uyaaw uwe weetubi ubawo miña'ume bâriiŋut. 31 Mata hatiya di emitay, di etaamay mbi bûyo, be elobay yûmbaam yeetubi êbuyowrer.”
Jijaamo ma aatuba jînanno
32 Ban Jesus nâanul joon: “Be mata huka'uhu di maama mbi tire, miña'umu di muga, an âmirut no, palimo kumalaakaku, palimo poop Añoolool, âmirut no, be ampawom keb âmiinom.
33 “Moo, jijaamo ma aatuba jînanno, mata jîmirut kuka'uku. 34 Mata mbi nokoor nom poop noon, an ammi akay êsuk, nawaa'to eluupay bugorooraabu batawool ma agayiil anoowan bugoroorabu batawool, ban nalob ata êtingaay mata hupooyahu. 35 Be miwuul poop jijaamo ma aatuba jînanno, mata jîmirut na mbi ata eluupay âlaañul, mante baheperabu, mante hukaru, mante urabaw; 36 ma mbi âriiŋul wûb, aatuba atookuul miwuul ma jiŋotum. 37 Miñamu ma ilobem di miwuul, neene miwuul peh: Jijaamo ma aatuba jînanno.”