Jesus nalob kaan Eluupay yata Emitay mbi ewapi
24
Ban na Jesus agam ômacaalhem di Eluupay yata Emitay ma akay, kurebooraaku katawool di kukay ki kûhugool ma ya kûyisool bateeperabu bata yo. 2 Be Jesus naaniil: “Inja jijuke wahaw uwe peh? Malhegen ma eenuul leetubi ŋañuno ute ewaaliis ya mbi elakenoor di epaa'yo yaatumbi ewapi.”
Hûlaamahu hâreesewuum
3 Ban Jesus nakay ki aleeho di hurimbiliŋahu haaneyim Oliveyra. Ña kurebooraaku katawool di kukay ki kûhugool ma kurinkool keenool: “Ûrejoli hukahu na mbi wahaw uwu uga. Nûñaaŋenoli poop êmanjumay ya mbi êyis kaan tîriiŋe ma ûlaañul ma etaama'uye êbuyi.”
4 Be Jesus naaniil: “Mbi jijaamo ma an aatuba mbi abuntenuul. 5 Mata bukan kameeŋe mbi kûhooloor ma ya kuŋar kañaaŋaku kûmbaam ma kêenul buko Kristu, be mbi kubunten bukan kameeŋe. 6 Mbi jijam kutiikaku, di jijam poop mata kaaku râagi, be aatuba jîkoli, mata wahaw uwu peh mbi uga, be ûdu ntuwa hûbanumahu hata etaamay. 7 Mata bâsuk baabu mbi bulhaalo ma butiik di bâsuk baabu; êsuk yaayu poop di elhaalo ma etiik di yaayu; bacaarabu mbi bûlowum bukanaku di sîsuk sameeŋe, etaamay poop mbi egogoroor tiŋ tameeŋe. 8 Be wahaw uwu peh, woo mbi uga hûcukumahu hata hûlaamahu.”
9 “Ban mbi kusohuul kuwul bukanaku ma kulesuul, ban di kubujuul. Êsukay peh mbi kubirik di miwuul mata kañaaŋaku kûmbaam. 10 Be nownu, bukan kameeŋe mbi kulaañ kujeeŋanda ma kulatool, kaaku di kuŋoon kupaaliil, kaaku di kuraay kupaaliil. 11 Buñaaŋenaabu bata kûboñaku kata Emitay kagawutum kalhegenumaayaku kameeŋe, mbi kûlhaalowul ma kubunten bukan kameeŋe. 12 Be mata ma malesamu mbi muhah di êsukay, bukan kameeŋe jâkin an, mbi jiŋaso di buko; 13 be anaw a mbi ajuum tir ii be di hukahu hûbanumahu, mbi apak. 14 Be eloba'uye yâsuumaay yata mata kâyyaku kata Emitay, mbi elobi di âmbasuk peh ma bukanaku kujam yo, ban nkit hûbanumahu di hûriiŋ.”
Hâlaamahu hâmakaahu
15 (Anaw a mbi apisen, nanongoor jak ma mbi aali anamulen.) “Mata na mbi jijuk wahaw wâgiipunenim, ban di ûkoliyeni kaga tiŋatu tanapaatu, wa añaaŋenaaw ata elobay yata Emitay aaneyim Daniyel aloom mata wo, 16 ña bukanaku ka mbi kulako no di bantaabu bata Jûdeya, di kutey be di kurimbiliŋaku. 17 An a mbi alako no hatiya di bûniigenabu bata eluupay, aatuba âwalowul bi aŋar wah wakeel di eluupay. 18 Anaw a mbi alako no poop butat, aatuba âlaañul be siluup bi aŋar humantaahu hatawool. 19 Yaaraay ka mbi kulee'no tîikooriil, di poop kaaku ka mbi kuraahen no, mbi kûñankiiteni no noon. 20 Moo, jilhaw Emitay ma huka'uhu hetuba mbi huga di hûyookahu, heetukaga poop di hîyyaayahu hatawuul. 21 Mata huka'uhu, mbi baano hûlaamahu harem noon, ha ûmiim kaan noo kaŋ noo na etaamay êwwenim, huk hakeel hubajorut haano mo, ban poop hakeel heetubi hubajurer ha mbi heeno mo. 22 Be kaleteen ma Emitay eŋasum kuka'uku kata hûlaamahu, an akeel aatubi upakeen, be mata ma eñankiitum bukanaku ka ejotum, mo ma mbi êŋasum ko.
23 “Momakiimom na mbi anaw aanuul: ‘Kristu oome!’ be mante: ‘Omma!’ aatuba jîynen. 24 Mata bukanaku mbi kûcaalhul ma kûhooloor ma kêenul buko Kristu, di kêenul poop buko buñaaŋenaabu bata kûboñaku kata Emitay. Ban mbi kuga sîmanjum sameeŋe, di poop miñamu mata sembaasu sata Esatanaay, ma kubunten bukanaku, ma mbi keeliyeen jaa, di kubunteneen poop bukanaku ka Emitay ejotum. 25 Be mowme înje nilobuu'mo ban. 26 Moo, an aanuu'jaa: ‘Kristu omma di ekinkay’, aatuba jîcaalhul. Aanuu'jaa poop: ‘Omma di eluupay’, aatuba jîynen. 27 Mata non ma kararanjuun ahikitenem hatiya di emitay, di jâaŋumul ba jaley âcaalhumewuum ii be ba alowumem, moomu poop kaŋ ma mbi ga na mbi Añool Ajamaat âkayil. 28 Mata tiŋootiŋ ta wahaw wakeem wemmi, to ta kuringaaku kûmeboorem.”
Añool Ajamaat mbi âlaañul
29 Ban Jesus naaniil joon: “Na mbi kuka'uku kata hûlaamahu kuga kubawe, jaleyaw mbi amuucen, hulheeŋahu heetubi hûjeel, bootabu poop mbi bûlowumul ûdu hatiya, mata wahaw wata sembaasu wammi hatiya di emitay, mbi ûsayseni. 30 Ña êmanjumay yata Añool Ajamaat, di ejuki hatiya di emitay, bukanaku kata sîsukasu peh sammi di etaamay, mbi kukaaw, mata mbi kujuk Añool Ajamaat ma âwaluwewuum di uwiiñaw di sembaasu, di poop majaaŋaamu mâamak. 31 Ña na mbi kârimaku kâmakaaku kulhok, nownu mbi aboñ kumalaakaku katawool be ujimaw ubakiiraw poowo wata etaamay, ma nki kûmeb bukanaku katawool kajotim kammi tiŋatu peh tata etaamay.”
Êmanjumay yata buyaajabu baaneyim phigeera
32 Ban Jesus naaniil joon: “Jake ma jipisen mata kaliikumaku kata buyaajabu baaneyim phigeera. Mata na mbi saanasu sata bo sîluuñenul ma utojaw wata bo ûleepul, di jîmir kaan bûriiŋaabu bûriiŋe. 33 Moomu poop kaŋ na mbi jijuk wahaw uwu, di jîmir kaan Añool Ajamaat nare ban kâriiŋul. 34 Moo, ma ilobuul malhegen eenuul, wahaw uwu mbi uga, bala bukanaku kammi jaat ma kurommi kuket. 35 Mata hatiya di emitay, di poop etaamay, mbi bûyo, be elobay yûmbaam yeetubi êbuyowrer.”
Hukahu ha mbi etaamay êbuyi
36 Ban Jesus naaniil joon: “Be hukahu di poop ewooraay ya mbi wahaw uwu uga, an âmirut ho; palimo kumalaakaku kammi hatiya di emitay, palimo poop Añool Emitay, âmirut ho. Be Ampawom keb, âmiihom.
37 “Mata non magam nata Nowe,a moomu poop kaŋ ma mbi ga na mbi Añool Ajamaat âkayil. 38 Mata nownu, bala Emitay êbuy ejamaatay di mumelamu, bukanaku ya kuri no, di kujaken no, di kuga no poop ûyabaw ii be na hukahu hûrimmi na Nowe anebeem di ebaarukay. 39 Be êsukay enamulent no maame di maame, be na mumelamu mûrillom di mûbuyiil peh. Moomu poop kaŋ ma mbi ga na mbi Añool Ajamaat âkayil. 40 Di kuka'uku yîinaay egaba mbi kulako tiŋ tanor ma kugoroor di kalhaakaku, be aahu mbi aŋari, ma aahu awalhi to; 41 yaaraay egaba poop mbi kulako tiŋ tanor ma kutamp, be aahu mbi aŋari, ma aahu awalhi to.
42 “Moo, aatuba jînanno, mata jîmirut hukahu na mbi Ata Emit atawuul âkayil. 43 Be jinongoor, nokoor jaa non ata eluupay ya âmireen hukahu ha mbi âkuutaaw âkayil be dô, mbi apooyeen yo ma aatuba mbi âkuutaaw umu âpanguu'yo ma ânebee'dô. 44 Moomu poop kaŋ ma miwuul jeetuba mbi jînannowum, mata Añool Ajamaat mbi âriiŋul di hukahu ha miwuul jîmirutum.”
Agorooraaw âynenaayaw, di poop aahu âynentaayaw
45 Ban Jesus naaniil joon: “Agorooraaw âynenaayaw, ban najaalho, oo agam anaw a mbi annahaanaw atawool awulool bugoroorabu bata jawulaju jata huriyahu kupaalool, naga bo na aloboom di no. 46 Malhegen agorooraaw umu, mbi abaj hûpiira, annahaanaw atawool oo bâriiŋerul, natookool oo ma agam non ma aloboom. 47 Moo ma ilobuul malhegen eenuul, annahaanaw atawool, mbi agawool ma aga annahaanaw akiim mata wahaw peh watawool. 48 Be nokoor jaa non agorooraaw umu anaw âlhapitaaw, ma âanul: ‘Annahaanaw ûmbaam aatubi âlaañul maame.’ 49 Ña nasoh kupaalool ma ya ânaguliil; ban nalako ma ya kuri, di kujaken di bûkaliyaabu. 50 Na mbi annahaanaw atawool âlaañul hukahu ha anamulentum kaan hoo ha mbi âlaañumul, 51 mbi alesool, ban naŋarool abet dânor dâ bûhoolooraabu bemmi; ma mbi alako dô ma ya akaaw, narum kubil.”