Jesus nâlhus phârisewwi di bulhikitenaabu bata kûboñaku kata Emitay
23
Ban Jesus naan buyooŋa'ubu bata bukanaku di kurebooraaku katawool: 2 “Bulhikitenaabu bata kûboñaku kata Emitay, di phârisewwi, koku ma kuleehom di hûtenkahu hata Moyses. 3 Be mbi ya jijam di buko ma ya jiga wahaw peh wa kulobewuum, be aatuba jiga non ma kugawem, mata kûgaworiit non ma kulobem. 4 Mata ya kuga kûboñaku kânaatum noon, ban di kûgiiti, kupeenen êsukay; ban buko kûkinoriit kuga miñ minŋet mata kûboña'uku. 5 Ban wahaw peh wa kugawem, ya kuga wo ma mbi êsukay kujukiil. Momakiimom ma kuŋiicumem elobay yata Emitay kuga di wahaw, ban di kukok yo di kûriiŋaku katayiil. Ban poop ya kupuuy di wañaw watayiil wa kûjupuwem wata ubeyaw wabalhaaw. 6 Ban ya kûkin kuleeho tiŋatu tahammi majak tata bata sipeetasu, di kûkin poop kuleeho di kûtenkaku kayaam kayooŋ kata di siluupasu satayiil sata kâmebooraku; 7 ya kûkin poop ma bukanaku ya kusaapiil ma kûbinkeniil di kankaku, di kûkin poop ma mbi ya keeniil: ‘Bulhikitenaabu.’8 “Be miwuul, aatuba jîkin ma mbi ya keenuul: ‘Bulhikitenaabe’, mata Alhikitenaaw atawuul naamo anor keb; moo miwuul peh batiyaayabu. 9 Aatuba jîwool an akeel ube di etaamay ma jeenool ‘Ampawuul, mata ampawaayaw anor keb jibaam ammi hatiya di emitay. 10 Aatuba jîkin poop ma bukanaku kûwoolul yahaanay’, mata Annahaanaw anor keb jibaam aamom Kristu. 11 Be anaw ahaŋuum, oo mbi aga agorooraaw atawuul. 12 Mata anaw asookenoorom, mbi arembeeli, be anaw arembeeloorom, mbi asookeni.”
Jesus nalob mata bûhoolooraabu
13 “Awo bûhoolooruwaabe, jaamom bulhikitenaabu bata kûboñaku kata Emitay, di phârisewwi! Mata ya jibab êtingaay yata kâyyaku kata hatiya di emitay, miwuul jînebejoriit, ban jîwalhoriit poop ma bukanaku kâkimmi kunebej, ma kunebej.
14 “Awo bûhoolooruwaabe, jaamom bulhikitenaabu bata kûboñaku kata Emitay, di phârisewwi! Mata ya jitenk siluupasu sata bûkutuwaataabu, ban ya jîhooloor ma jiga non bukan kajake, ma ya jilhaw Emitay balh. Momakiimom hûlaamahu hatawuul mbi hûhahikoor.
15 “Awo, miwuul bûhoolooruwaabe, jaamom bulhikitenaabu bata kûboñaku kata Emitay, di phârisewwi! Mata ya jîtip kulhuwaku ma jireesoor sîsukasu kapaamaku kata bukanaku ma jigawiil kunebej di buruŋabu. Be na mbi kunebej di buruŋabu, ban di jigawiil joon kulaañ kuhaŋuul ma ga kuñool hûjimenahu hata Emitay.
16 “Awo, miwuul bureesunenaabu bata bûpuumaabu. Mata ya jêenul: Anaw anuur jaa aya di Eluupay yata Emitay, ûdu ebajut makeel, be anuur jaa aya di ûuru yândom, non manooman mbi aga non ma aloom. 17 Miwuul bûpuumaabu bânuutuwaabu! Kama wa uhammi? Eluupay yata Emitay yagaweyom ma enap, be mante ûuru yândom? 18 Ban ya jêenul poop, anaw anuur jaa aya di Altar ûdu ebajut makeel, be anuur jaa aya di opherta yândom, non manooman mbi aga non ma aloom. 19 Bûpuumaabe! Kama wa uhammi? Altar yagawem opherta ma enap be mante opherta? 20 Mata anaw anuur jaa aya di Altar, nanuure be bata yo, di poop wahaw peh wândom. 21 Anaw anuur jaa aya di Eluupay yata Emitay, nanuure be bata yo, di poop anaw akiiyom. 22 Anaw poop anuur jaa aya hatiya di emitay, nanuure ban be bata hulhikahu hata Emitay, di poop yoo yândom ma aleehom.
23 “Awo bûhoolooruwaabe, jaamom bulhikitenaabu bata kûboñaku kata Emitay, di phârisewwi! Mata ya jiwul dîisimu yata wahaw peh, di poop wata di sitoolasu waamom balhebaabu, di kukanjaaku, di bângacabu, ma jiwaa'bo kûboñaku kahammi mabaj sembe, kaamom: jagawaju jata non ma Emitay êkimmi, di kañankiit an, di poop jaga an alhegenumaayaw. Moo, wahaw uwu mbi ya jiga wo, be jeetukawaa'bo poop waawu. 24 Bureesunenaabu bâpuumaabu! Kama mata wa ma jilhinumem bawolhabu, ma ya jimer kameelu?
25 “Awo bûhoolooruwaabe, jaamom bulhikitenaabu bata kûboñaku kata Emitay, di phârisewwi! Kama mata wa ma jikulhenumem tîyaŋ yata sikoopaasu, di uraataaw, ban dâada data wo dôdu ma demmi huc êkuutay, di jâsiibuwikooraju? 26 Phârisewwi kâpuumaaku! Jijaa, jikulhen para dâada di sikoopaasu, tîyaŋ yata so poop di set.
27 “Awo bûhoolooruwaabe, jaamom bulhikitenaabu bata kûboñaku kata Emitay, di phârisewwi! Miwuul ma jigam noon êluŋ yâpuujenim ube tîyaŋ ma ejak, be dâada dôdu ma demmi huc woolaw, di wahaw wameeŋe wajakutaaw. 28 Malhegen miwuul anaw ajuu'jaa haanaahu hatawuul, nâanul miwuul bukanaku kalhegenumaayaku, be dâada di ûyegetaw watawuul dôdu ma demmi huc jâhoolooraju, di poop wah waawu wajakutaaw.
29 “Awo bûhoolooruwaabe, jaamom bulhikitenaabu bata kûboñaku kata Emitay, di phârisewwi! Mata ya jiteep jak sîluŋasu sata buñaaŋenaabu bata kûboñaku kata Emitay, ban poop ya jîsangen sîluŋasu sata bukanaku kacolaaku ka ya kagam non ma Emitay êkimmi. 30 Ban ya jêenul: ‘Gaween jaa non ûli too nulakuwemmi nata sîmpawoli, aatubi ôomiyeen di buko ma ubujeen buñaaŋenaa'ubu bata kûboñaku kata Emitay.’ 31 Malhegen miwuul jisallhene jak kaan, miwuul jigam kuñool bukana'uku kabuum buñaaŋenaa'ubu bata kûboñaku kata Emitay. 32 Moo, jenken ma jihabel bugoroorabu ba simpawuul kûcukum.
33 “Silunase! Êbajoorumay yata Siñanakasu! Bu mbi jimellh di hûjimenahu hata Emitay hâreesewuum? 34 Momakiimom mbi ibolluul buñaaŋenaabu bata kûboñaku kata Emitay, di bukanaku kajaalhuwaaku, di bulhikitenaabu. Be miwuul mbi jibuj bukanaku, di jîriiŋ bukaaku di sîkrusasu, bukaaku di jînaguliil di siluupasu satawuul sata kâmebooraku, ban di jicah di buko di êsuk yaayu be yaayu. 35 Moo, Emitay mbi elesuul mata hûsimahu hata bukanaku kalhegenumaayaku ha jîyum di etaam, cûkum hata Abel, be kaŋ hata Jakariyas aamom añool Barakiyas a jibuum tutaru tata tiŋatu tâñoyyaatu di Altar. 36 Moo, ma iñaaŋenuul malhegen eenuul, wahaw uwu peh wa jigam, mbi ûlowum bukanaku kata jaat.”
Jesus nakaawoor mata Jerusaleŋ
37 Ban nâanul: “Jerusaleŋ, Jerusaleŋ, aw jabujem buñaaŋenaabu bata kûboñaku kata Emitay, ban ya umab kuwaaliisaku bukanaku ka Emitay eboñewuum, kuk kameeŋe na îkimmi îmeb kuñooli non ma êkereŋ êmebem bakiiwabu bata yo, ma egaayeniil, be di jilat. 38 Moo, eluupay yatawuul mbi elako to hâa. 39 Ma iñaaŋenuul eenuul jeetunki jijukom joon be kaŋ na mbi hukahu hûriiŋ na mbi jêenul: ‘Usalaal anaw akaymulom di kañaaŋaku kata Ata Emit.’ ”