Kaliikumaku kata bûyababu
22
Ña Jesus nagawiil kaliikum kaaku joon ma aaniil: 2 “Kâyyaku kata hatiya di emitay, koo kugam poop noon epeetay yata bûyababu ya âyyaw agam añoolool. 3 Ña âyya'umu, naboñ bugorooraabu batawool ma nki kûwoolul bukanaku ka âwoom be bûyababu; be bukana'uku di kulat. 4 Ña naboñ joon bugorooraabu baabu ma nki keen bukanaku ka âwoom, nabandoore ban peh wahaw wata huriyahu; mata kûmuunaaku di uncaam waawu watawool wâlagaaw, uŋaali ban. Moo, kûkayil be bûyababu mata wahaw peh ubandoori ban. 5 Be buko poop gawutii'poop korolh, ma kaaku kukay be butonda, kaaku di kukay be hulanñoorahu. 6 Kaaku di kusoh bugorooraa'ubu ma kûgaykooriil be kaŋ na kubujiim. 7 Na âyyaw ajammom, nabirik noon, ña naboñ esellooraay ma kubuj bûlhapitaa'ubu, ban di kubol siluupasu sata êsuka'uyu. 8 Ña naan bugorooraabu batawool: Malhegen nibandoore ban peh epeetay yata bûyababu, be bukanaku kâwoollim ma kulatum, kujoonut ma kûwollelli. 9 Ña jikay be di kûluulaku ta uruŋaw upammi ma nki jîwoolul bukanaku peh ka mbi jitoo'bo. 10 Ña bugorooraa'ubu di kûcaalh be di kûluulaku, kûriiŋ di kûmeb bukanaku peh ka kutoobom, bûlhapitaabu, di kaaku kagawem jak, ña eluupay di yeen huc êsukay.11 “Be na âyyaw umu aleeŋom ma nki ajuk bukanaku kâwoollim, nâtoo'dô âynaaw aahu âjupowutum bûjupaabu bata bûyababu. 12 Ña narinkool aanool: ‘Apaalom, kama bu nugawe ma ûleeŋowul ûde baakut bûjupaabu bata bûyababu?’ Be âynaaw umu napato kaŋ gib. 13 Ña âyyaw naan bugorooraabu: Jisowool ma jigenk uŋenaw di ûkandumaw, ban di jiraacool tîyaŋ di emuucenay ma nki ya akaaw bo, narum bo kubil. 14 Mata bukan kameeŋe kâwoollim, be kinŋet kajotim.”
Bukanaku di kurink mata buyuupabu
15 Ña phârisewwi di kukay ki kûmeboor ma kutabulhenoor maama mbi kuga ma kusoh Jesus di elob yakeel. 16 Ña di kuboñ kurebooraaku katayiil, di poop bukan kaaku kata kaasaaku kata Erodis,a kûriiŋ di keenool: “Alhikitenaawe, ûli nûmire kaan, aw anaw alhegenumaayaw, mata ya ulhikiten bukanaku buruŋabu bata Emitay jak di malhegenumaayamu, ban ûkinoriit ma an aniiwi di hunongoorahu hatawool, ûgaworiit poop ejuu'di buul. 17 Moo, ûñaaŋenoli aw bu nunongum, soŋo jake pîya ma uyuupaal âyyaw âmakaaw ata Rooma, be mante jakut?” 18 Be ma Jesus âmiim jak kânongikooraku katayiil, ña naaniil: “Bûhoolooraabe! Mata wa ma jîhopumem d'înje? 19 Jîyisom ma empeesaay yata buyuupabu.” Ña di kuwulool empeesaay yanor. 20 Ña narinkiil aaniil: “Buula'ube, di kañaaŋa'uke, kata ay?” 21 Di keenool: “Kata âyyaw âmakaaw.” Ña naaniil: “Jiwul âyyaw âmakaaw wahaw watawool, di jiwuu'poop Emitay wahaw wata yo.” 22 Na kujammi ma alaañeniim umu, di kujaahali, ña di kuwalhoo'to ma keet.
Sadusewwi di kurink mata jalhaalaaju jata di kuketaaku
23 Ban di huka'uhu, bukan kaaku kata di kaasaaku kata sadusewwi kaanem ukee'jaa, ban ootunki ulhaalowul joon di kuketaaku, di kûkayil be ta Jesus ammi, ma kurinkool keenool: 24 “Alhikitenaawe, Moyses âanolim ânniinaaw ayab jaa anñaakanaw ban naket koo babajut aŋil, ña atiyool natun anñaakanaw umu, ma mbi aali abaj atiyool aŋil. 25 Moo ute d'ûli, bajeene batiyaayabu hutok di egaba. Âtiyaaraw nayab, ban naket babajut aŋil, ña atiyool natun apañoorool. 26 Ban agabutaw poop naga mo, âhaajutaw poop naga mo, ii be na buko hutok di egabaay peh kutunoom, ban di kuket. 27 Ña na batiyaaya'ubu bubawom eketay, ban añakanaw umu poop naket. 28 Ña na mbi kûlhaalowul di kuketaaku, aymoom ata di batiyaaya'ubu a mbi ayabumool, ma buko peh kuyabeenoom?” 29 Be Jesus naaniil: “Miwuul jîpuule, mata jîmirut Baŋiicerabu Bâñoyyaabu, jîmirut poop sembaasu sata Emitay. 30 Mata na mbi bukanaku kûlhaalowul di kuketaaku, keetubi kuyaboor, mata mbi keeno non kumalaakaku kammi hatiya di emitay. 31 Kama jipisent non ma Emitay elobuum mata jalhaalaaju jata di kuketaaku, ma yêenul: 32 Înje Emitay yata Abrawoŋ, di Isaki, di Jako? Mata Emitay egawut Emitay yata bukanaku kakeem, be yata bukanaku karommi.” 33 Ña na buyooŋa'ubu bata bukanaku kujammi ma aloom umu, ña di kujaahali mata balhikitenerabu batawool.
Kûboñaku kahammi kûboñ peh
34 Na phârisewwi kujuum ma Jesus agam sadusewwi ma kubajut kulaañenool, 35 ña aahu ata di buko agam alhikitenaaw ata kûboñaku kata Emitay, nâhopool ma aanool: 36 “Alhikitenaawe, kuboña ûkey kahammi kuboñ peh.” 37 Ña Jesus naanool: “Mbi ûkin Ata Emit atayi di êsigiray yatayi pooyo, di yâarooray yatayi pooyo, di poop bûyegetabu batayi poobo. 38 Kûboña'uke koo kugam kûtiyaaraku, koo kuhammi kûboñ peh. 39 Kaaku kugabutaku kanaamoorum di ko keene: ‘Mbi ûkin an peh a jîhugoorum non ma aw ûkinoorom.’ 40 Moo, di kûboña'uke kugabaaku dô da kûboñaku kata Emitay, di kata buñaaŋenaabu bata kûboñaku kata Emitay kukagoorum.”
Kristu añool David
41 Be ma phârisewwi kûmeboorutom, ña Jesus narinkiil aaniil: 42 “Miwuul, bu jinongem mata Kristu? Oo añool aymoom?” Di keenool: “Oo añool David.” 43 Ña Jesus naaniil: “Kama mata wa ma David âwoolumoom Ata Emit di sembaasu sata Buynum Bunapaabu? Mata oo ammi:
44 ‘Ata Emit ammi Ata Emit ûmbaam:
Uleeho di kaŋenaku
kûmbaam kûriraku,
be na mbi igawi ma uyokosen bûsuumutaabu batayi.’