Jesus naboñ kurebooraaku katawool
10
Ban, Jesus najot kurebooraaku katawool kaaku keemo bukanaku êhaaji di kunŋen. Ma aboñiil egabagaba ma kuyabool kayooŋ be sîsukasu di tiŋatu pooto ta mbi akayeen. 2 Naaniil: “Bukanaku kameeŋe kâkimmi kûkayil be di Emitay, kagam poo'non emaanaay ya yemmi, ban bujalaabu di butor. Momakiimom mbi jilhaw Emitay, yo egam ata ejalay ma ebollolaal joon bujalaabu. 3 Utawaal jikay! Be jijaa, înje îboñul poop non êgaraniina be ta siŋiiriŋasu semmi. 4 Aatuba jiŋar wah wakeel joon, non bancaam, embaag, di humboota, di sikatab, aatuba jipiyo poop di kajalhen bukan di buruŋ.
5 “Di eluupooluup da mbi jinebej, wahaw ûtiyaaraw, di jeeniil: ‘Kâsuumaay kulako di eluupa'uye.’ 6 Kuyaañowuu jaa di kâsuumaayaku, kâsuumaaya'uku di kulako di eluupa'uyu. Kuyañowutuu jaa di kâsuumaayaku, kâsuumaaya'uku di kûlaañul be baabu di miwuul. 7 Di eluupa'uyu da mbi jiwalen, dô mbi jiri, dô mbi jihen wahaw peh wa mbi kuwuluul, mata agoroora najoone ma ancaami. Aatuba jilhoj be tiŋ taatu.
8 “Na mbi jinebej di hânkijahu, kucookooruu jaa, di jiri wahaw peh wa kuwuluum. 9 Di jibuunen bûjuutaabu batayiil di jeeniil: Emitay êkine ma jiga bukanaku kata di kâyyaku kata yo. 10 Be kucookorutuu jaa di hânkijahu da mbi jinebej, di jirees di uruŋaw watayiil, ma jeeniil: 11 ‘Ña nupeye uŋenaw wâtooli di miwuul, palimo poop kaporaku kata hânkijahu hatawuul kammi di ûkandumaw wâtooli, mbi uhanku ko poop. Ume ma ugam ma jîmir di kaan, jilate ma Emitay egawuul bukanaku kata di kâyyaku kata yo.’ 12 Be ma iñaaŋenuul: ‘Emitay na mbi ega batalenabu, mbi êlesikoor êsuka'uyu ehaŋen sîkusumasu sata hânkijahu hata Sodooma.’ ”
Bukanaku kalatum Emitay
13 “Miwuul jata Korasiŋ, be di Betsayda, jîgunuwe, mata miñamu mata sembaasu sata Emitay ma înje igam di sîsukasu satawuul mugaweenim poop di bâsuk baabu bata Tiiru be di Sidoŋ, kâmirutum Emitay, buko ma kuwatatenooruwemmi ban, kûjupo kusaakaaku ma kuhoonoor non ñikul kubaje. 14 Momakiimom Emitay na mbi ega batalenabu mbi ehaŋ malesuul non ma mbi egaween Tiiru be di Sidoŋ. 15 Miwuul jata Kâpharnawuŋ, jîkine jigawooro be hatiya di emitay? Be mbi jiwaleni kaŋ be di husunahu hâlahaahu da kuketaaku kemmi.”
Jesus nawul kurebooraaku katawool sembe
16 Jesus nâtiiwo ma alob keb di kurebooraaku katawool, ma aaniil: “Anaw atallhenuum, înje natallhemmi. Aahu alatuum, înje nalatum. Aahu alatommi, anaw aboñulommi nalatum.”
17 Kureborawool ka abommi na kulallom di kûririgen ban di keen Jesus: “Ata Emit, na mbi ûwool kañaaŋaku katayi, ûkiinaw poop di ûkoliyoli!”
18 Be Jesus naaniil: “Înje nijuke kaŋ Esatanaay na elolom hatiya di emitay di jaaŋ non kararanjuun. 19 Jijaa! Niwuluul sembaasu ma jiyokos silunasu be di silhankuurasu, ma jihaat sembe peh sata Esatanaay be di ûkiinaw. Wah wakeel weetukagawuul makeel majakut kaŋ kuur! 20 Be aatuba jîririgen keb mata ma ûkiinaw ûkoliyuum, be mbi jîririgen mata uñaaŋaw watawuul wowu ma uŋiicim di hatiya di emitay.”
Jesus nâririgen di Emitay
21 No Buynum Bunapaabu di buga Jesus âririgen, nâanul: “Ampoom, nisali aw Ata Emit ahammi wahaw peh wammi hatiya di etaam, mata ma ûñoorum wahaw wa ugam kaaku kanongem kaan kujaalhuwe di poop kaaku kanongem kaan kubaje hunamulenahu, be nûyis'wo kaaku kiŋetaaku. Mata moomu kaŋ ma ampoom ûkimmi iga ma mbi ûririgen.
22 “Ampawom nawulom wahaw peh, mata ampawaayaw oo âmiim keb mata aŋilaw. Aŋilaw poop oo âmiim keb mata ampawaayaw, be di bukaaku aŋilaw âkimmi kûmir ampawool.” 23 Jesus nalaañ joon alob keb di kurebooraaku katawool, ma aaniil: “Bukanaku kajuum maama miwuul jijuum, di maama jijammi, kubaje hûpiira. 24 Ma iñaaŋenuul eenuul buñaaŋenaabu bata kûboñaku kata Emitay, di kîyyaku kameeŋe kûkineene kujuk maama jijukem di mo, be kujukut mo. Kûkineene kujam maama jijamem di mo, be kujamut mo.”
Bu neelim îkin anaw âhugommi?
25 Haahu, na alhikitenaaw ata kûboñaku kata Emitay nâkin ma âhop Jesus. Narinkool: “Alhikitenaawe, bu mbi iga ma ibaj eroŋay yâbaworiitaay?”
26 Jesus naanool: “Aw bu nujuum non ma kaytaku kata Emitay kuloom? Bu nupisenekom, nunamulen ko?” 27 Naanool: “Keene, uga Ata Emit yatayi di êsigiray yatayi kaŋ peh, di buynumabu batayi kaŋ peh, di sembaasu satayi kaŋ peh, di kanamulenaku katayi kaŋ peh. Ûkin poop anaw a jîhugoorum non ma ûkinoorom.”
28 Jesus naanool: “Nulobe jak, ki ya uga mo mbi ubaj eroŋ.” 29 Be âynaaw umu nâkin ma akooŋenooro, narink Jesus: “Aymoom agam anaw oo ûhugoorum?”
30 Jesus naanool: “Âynaaw âcaalhumulom Jerusaleŋ, ma ariiŋen be di hânkijahu hata Jeriko. Arees poopii, bûkuutaabu di kûcaalhool ma kûnagulool be na asiinum, di kuyab miñamu matawool, ban di kuwalho to, ma kukay. 31 Di baj amaaŋenaaw ata Emitay ayabulom di buruŋa'ubu, âriiŋ to najuk âynaaw umu, nakekelhenool ma ahulh. 32 Di baj poop âynaaw ata êbajoorumay yata Levi, ayaatom âriiŋ najukool, oo poop nakekelhenool ma ahulh. 33 Be âynaaw ata bantaabu baaneyim Samariya ayaatom poop, âriiŋ najukool, nañankiit. 34 Nakay ka âhugool, ban naŋar mîitamu, di bunukabu, ma abuunenool kucokaaku, ban nabantenoo'ko, ban nâjupool di embaamay yatawool, ma akay d'oo be di eluupay yata humasorowtaahu, ban nacookoorool jak jak. 35 Âriiŋ hata kajom, nâcaalhen bancaamabu ma awu'bo ata eluupa'uyu, ban naanool: Ma ikay, ucookoorool, be ûcaalhen jaa ba bahammi, mbi îlaañul nigati bo.” 36 Ban, Jesus narinkool: “Di hunongoorahu hatayi, bukana'uku êhaajiyaay, aymoom âgawummi anaw oo kûhugoorum di âynaaw a bûkuutaabu bunaguum?”
37 Naanool: “Aahu añankiitoom ma aŋarool ka abuunen.” Jesus naanool: “Ukay, ki ya uga mo.”
A Parábola do Bom Samaritano
Waywoom wahammi majoon?
38 Jesus koo di kurebooraaku katawool di kurees poopii, kûriiŋ di jîsukaju, nakay kawalen di eluupay yata añakanaw aaneyim Marta. 39 Atiyool aaneyim Mariya, nakay ki ya âhug Jesus ma ya atallhen maama alhikitenem di mo. 40 Be Marta doo ma agawoom gewgew mata bugoroorabu. Nakay atoo'to Jesus ma aanool: “Ata Emit, kama laañutibo poop ma atiyom awalhombom ma igoroor diyoonom? Oonool âkayil ma aanenom!”
41 Jesus naanool: “Marta, Marta, gawi ban gewgew mata bugoroorabu di wah wameeŋe. 42 Be wah wanor keb wajoonum. Woowu wa Mariya ajotum wahammi majak. Mo an alhetubi abot wo d'oo.”