Joŋ Batista naboñ kurebooraaku katawool egaba be baabu Jesus
11
Na Jesus agam nabane jalhikitenaju jata kurebooraaku katawool kaamom kunŋen di egabaay, ban nâcaalh to ma akay be di bâsuk baabu bata dô ma ya alhikiten bukanaku, nañaaŋenii poop elobay yata Emitay. 2 Be Joŋ Batista oo di ekullhay, na ajammi mata bugoroorabu bata Kristu aamom Jesus, ña naboñ kurebooraaku katawool ma nki kurinkool. 3 Na kûrimmi di kurinkool ma keenool: “Kama aw anaw akobeyim d'oo? Be mante anaw umu narombo?” 4 Be Jesus naaniil: “Jilaañ ki jiñaaŋen Joŋ wahaw wa jijammi, di waawu wa jijuum. 5 Mata bukanaku kâpuumum ko kajukem, kata uyakasaw kokareesem jak, kaaku kâjuutum êtoogoonay kûjuwe, bukaaku kakeem, di kûlhaalowul ma kuroŋ, bûsukateenaabu kokañaaŋeneyim di buko elobay yâsuumaay. 6 Moo, bukanaku kâynenommi bâlandeelut, kubaje hûpiira.”7 Na kurebooraa'uku kata Joŋ na kugam kulaañe, Jesus narink buyooŋabu bata bukanaku kalakotom mata Joŋ ma aaniil: “Kama wa jikayum ki jîjukul di ekinkay? Soŋo pîya hunjaamahu ha ehentelaay ya eweenemmi? 8 Kama wa jikayum ki jîjukul? Âynaaw alhiimuewem jak? Jijaa, bukanaku kalhiimuwem jak di ûyyaw kulakuwem. 9 Kama wa jikayum ki jîjukul? Añaaŋenaaw ata kûboñaku kata Emitay? Malhegen, ma iñaaŋenuul eenuul, nahaŋe añaaŋena ata kûboñaku kata Emitay. 10 Mata, matawool ŋiicim kaan:
‘Mbi iboñ añaaŋenaaw ûmbaam ma ayabi kayooŋ,
ma abandoori buruŋabu.’
11 “Ma isalhenuul eenuul, an alet âkuloorim ahammi Joŋ Batista. Be anaw ahammi mâtiiti di kâyyaku kata hatiya di emitay, oo ahaŋoom. 12 Mata kata kaŋ nata Joŋ Batista be jaat, kâyyaku kata hatiya di emitay, koku ma kuŋareyim di ko di sembe; moo, bukanaku ka mbi kuga di sembe, koo mbi kuŋaa'ko. 13 Mata buñaaŋenaabu kaŋ peh bata kûboñaku kata Emitay, di poop kûboñaku kata Emitay, kulooloom mata kâyyaku kata hatiya di emitay ii be nata Joŋ. 14 Moo, jîynen jaa, malhegen Joŋ oo agam Êliyas aamom a mbi âkayil. 15 Anaw abaam ûjaŋayaw wata jatallhen, najam.
16 “Kama wa pîya neelim iliikum di bukanaku kata jaat? Mata bukanaku kata jaat, buko non bala kaleehom di êluulay, ban ya kûŋaaŋuluwoor ma ya kêenul:
17 ‘Ûli, ûli ulhiituum elhiitay, be di jilat kamag,
nuyeeŋ uñaaŋaw wata buhiiraabu, be jigawut ñânkiiteni.’
18 “Moo, na Joŋ Batista ya agam bawoorabu ma ariit, asibent, di kêenul amalaw âjupuwoom. 19 Be Añool Ajamaat nâkayil nari, najaken, di kêenul: ‘Ume ya ari noon, najaken noon, ban napaalaay di buyabaabu bata buyuupabu, di poop kaaku kagawem kûbajumiñaku.’ Be majaalhaamu mata Emitay, ya mumanjumi mata wahaw wa anaw agawem.”
Sîsukasu sâynentum Jesus
20 Ban Jesus nawataten sîsukasu saamom ba ahammi ma ga miñamu mata sembaasu sata Emitay, mata ma bukanaku kata bo kuwatatenoorowutum ma aaniil: 21 “Awo êsukay yata Korasiŋ! Awo êsukay yata Betsayda! Mata miñamu mata sembaasu sata Emitay magawim di sîsukasu satawuul, mugaweenim di êsukay yata Tiiru, di yata Sidoŋ, buko ma kuwatatenooruwemmi ban ma kukoko kusaakaaku, ban di kuga kâgumpaku di kûkuwaku katayiil. 22 Be ma iñaaŋenuul eenuul, di hukahu hata batalenabu, êsukay yata Tiiru, di yata Sidoŋ, mbi sihaŋ mañakiiti yata Korasiŋ, di yata Betsayda. 23 Moo, aw êsukay yata Kâpharnawuŋ, nûkine uŋool be hatiya di emitay? Be mbi etahi be di hûjimenahu hata yo. Mata miñamu mata sembaasu sata Emitay, magawim dâadu d'aw, mugaweenim di êsukay yata Sodooma, mbi elakuween to be jaat. 24 Moo, ma isalhenuul eenuul, di hukahu hata batalenabu êsukay yata Kâpharnawuŋ mbi ehaŋ malesi yata Sodooma.”
Jesus awulem kahepulen
25 Nownu Jesus nâanul joon: “Ampoom, Ata Emit akiim hatiya di emitay, di etaamay, nisali mata ma ûñoorum wahaw uwe bukanaku kajaalhuwaaku, di kâseeliyaaku, ma ûyis wo bukanaku kinŋetaaku. 26 Malhegen mo ma ûkimmi uga. 27 Mata Ampoom, înje nawuum wahaw peh, an alet âmiim Ampawom, be Añoolool keb âmiroom, di poop anaw a Añoolool âkimmi âyisoowool. 28 Moo, miwuul peh jagayum ma jipeenom nâat, jîkayil be baabu d'înje, ma ihepulenuul. 29 Jigalaŋo hugendahua hûmbaam, ma jilhikiten d'înje, mata înje anaw ahepum buynum, ban îgawooruworiit; ma mbi sâaroorasu satawuul seeli sibaj kahepulen. 30 Mata hugendahu hûmbaam hûsunsuum bûpeeno, ban bûpeenaabu bûmbaam di buyiili.”