Jesus oo akiim hîyyaayahu hata jûdewwi
12
Ban di kuka'uku di hîyyaayahu hata jûdewwi, Jesus koo di kurebooraaku katawool, di kuyab di kalhaakaku kata trîigu. Be ma bacaarabu busoom kurebooraaku katawool, ña di kûnebee'dô ma ya kûbajuu'yo kupoopoy kutokoñ. 2 Ña na phârisewwi kujukiim, di keen Jesus: “Ujikee'ma kurebooraaku katayi ma kugawem di mo wahaw waanim ûñonñoyi kaga di hukahu hata hîyyaayahu hatoolaal?” 3 Be Jesus naaniil: “Kama jipisent ma jîmir maama âyyaw David, koo di kupaalool kugam na bacaarabu busohiim? 4 Inja di eluupay yata Emitay nanebeem ma âŋarul kûmburuwaaku kâñoyyim ki kutokoñ di kupaalool ka keeliitum kutokoñeen; ka bumaaŋenaabu bata Emitay keb keelim kutokoñ. 5 Kama jipisent poop kûboñaku kata Emitay, ma jîmir non ma bumaaŋenaabu bata Emitay kugawem kuhuusuu'jaa hukahu hata hîyyaayahu hatoolool di Eluupay yata Emitay, ketukabaj hûbajumiñ? 6 Moo neenuul, anaw oome ahammi Eluupay yata Emitay. 7 Malhegen jinamulenemmi jak kaan, Emitay moo eloom yêenul, yoo ntuwa heenaayahu hata uncaamaw êkimmi, be jañankiit an êkimmi, jeetubi jeeneen anaw âmirutum makeel, nabaje hûbajumiñ. 8 Mata Añool Ajamaat, oo agam annahaanaw ata hîyyaayahu hata jûdewwi.”Jesus nabuunen âynaaw a kaŋenaku kukeem
9 Ban Jesus nâcaa'to ma akay be di eluupay yatayiil yata kâmebooraku. 10 Di rewoor no âynaaw dôo a kaŋenaku katawool kukeem. Be bukanaku dôo, kâkimmi ma mbi kusoh Jesus di wah wakeel, ma mbi kêenul nabaje hûbajumiñ. Ña di kurinkool keenool: “Kama ñôyyiit jabuunen an di hîyyaayahu hatoolaal?” 11 Be Jesus naaniil: “Kama an akeel ata di miwuul, êgaraniinaay yatawool elo jaa di husunahu di hîyyaayahu hatoolool, aatubi âcaalhenuu'yo? 12 Kama ajamaataw, di encaamay, wa uhaŋe? Moo, kûboñaku katoolaal keene uga jak di hukahu hata hîyyaayahu hatoolool.” 13 Ban naan âynaaw umu: “Uwaraken kaŋenaku!” Ña na awarakenkom di kûju ma keeno non kaaku. 14 Ña phârisewwi ma kubirikum d'oo, ña di kûcaalh ma ya kupaam maama mbi kuga ma kubujool.
15 Be na Jesus âmiim kaan mo ma phârisewwi kunongum, ña nâcaa'to ma akay; be bukanaku lhay di kusoolhenool, ña nabuunen bukanaku peh kâjuutum, 16 ban naaniil keetubi kuñaaŋen êsukay matawool. 17 Ma ga non ma añaaŋenaaw ata kûboñaku kata Emitay aaneyim Isayiyas aloom âanul:
18 “Agorooraaw ûmbaam oome a ijotum, oo anaw a iboolaatum, ban ya agawom îririgen noon.
Moo, mbi iga Buynumabu bûmbaam d'oo,
ma mbi añaaŋen bukanaku kagawutum jûdewwi mata batalenabu
ba Emitay mbi ega an peh.
19 Ootubi ujamool di bûñoosoor di an, ootubi ujamool nâŋaaŋulo;
ootubi ujamool poop nalhok palabab tîyaŋ.
20 Aatuba atij hunjaam hâkupuwe,
aatuba ahok poop ehikitenum yâluwe hototot.
Mo ma mbi aga, be na mbi aga malhegenumaayamu mata Emitay mujuki tiŋ peh.
21 Ban êsukay peh kagawutum jûdewwi, mbi kûynenool.”
Jesus koo di Bêlsebu
22 Ña di kuŋallool âynaaw a amalaw âjupom âpuumum, ban âloboriit; be na Jesus abuunenoom, ña nalob, najuk. 23 Buyooŋabu bata bukanaku kalakotom, na kujuum di kujaahali ma ya kêenul: “Memmii, kama ume ntuwa añool David.” 24 Ña na phârisewwi kujammi ma kuloom umu di kêenul: “Âynaaw ume ya âcaalhen kumalaku di sembaasu sata Bêlsebu aamom annahaanaw ata kumalaku.” 25 Be Jesus ma âmiim banongerabu batayiil, ña naaniil: “Êsukay êgiitoor jaa ma kutiikoor dô, noon mbi ewaas. Hank poop, be mante eluup, yâgiitoorum ma etiik, mbi ewaas. 26 Esatanaay ecah jaa di Esatanaay, non yoyu ma êgiitoorum. Moo, bu mbi kâyyaku kata yo, keeli kujuum? 27 Non înje ya îcaalhen kumalaku di sembaasu sata Bêlsebu, ña kama kuñooluul ya kûcaalhen ko di sembaasu sata ay? Momakiimom buko mbi kugawuul batalenabu. 28 Be non înje ya îcaalhen kumalaku di sembaasu sata Buynumabu bata Emitay, di jîmir kaan kâyyaku kata Emitay kûrillo tutaru tatawuul.
29 “Kama bu an aalim aleeŋo di eluupay yata an agawe hûlaat, ma âkuut wahaw watawool oo bagenkutool para? Malhegen mbi agenkool para, ban nkit nâkuut wahaw peh wammi yanŋool. 30 Moo, anaw âamiwutum d'înje, oo âsuumutom. Anaw aanentommi ma îmeb wahaw tanor, anaw umu oo awaasem di wo. 31 Moo, ma iñaaŋenuul eenuul, kûbajumiñ peh, be mante kûgelikoor ka anaw ageem Emitay, naali bi abonketi. Be anaw âgelikoorum Buynum Bunapaabu, aatubi abonketureri. 32 An âlobikoor jaa Añool Ajamaat, mbi abonketi. Be anaw âlobikoor jaa Buynum Bunapaabu, aatubi abonketureri ube di etaama'uye, palimo poop di yaayu yâreesewuum.”
Buyaajabu di muriyaayamu mata bo
33 “Mata ya jêenul buyaajabu bujake, mata ma muriyaayamu mata bo mujakum. Di jêenul poop buyaajabu bujakut, mata muriyaayamu mata bo mujakutum. Mata buyaaj ya amanjumi mata muriyaayamu mata bo. 34 Silunase, bu jeelim jilob wah wajake, ban miwuul jijakut. Mata wahaw wamemmi di êsigiray yata anaw, wo wa alobem. 35 Anaw ajakum, ya âcaalhenul wahaw wajakaaw di bûyegetabu batawool bajakum. Anaw poop ajakutum, ya âcaalhenul wahaw wajakutaaw di bûyegetabu batawool bajakutum. 36 Moo, ma iñaaŋenuul eenuul, elob kaŋ peh ya ânoowan aloom ebeebel, mbi arinki yo di hukahu hata batalenabu. 37 Mata elobay ya anaw aloom, yo ya mbi Emitay êgawumool batalenabu ma êmir mante nubaje hûbajumiñ, mante ubajut ho.”
Êmanjumay yata Jonas
38 Ña bulhikitenaabu bata kûboñaku kata Emitay, di phârisewwi, di keen Jesus: “Alhikitenaawe, ûli nûkine ma ûgawoli êmanjum yakeel ma ujuk.” 39 Be naaniil: “Bukanaku kata jaat kûlhapit lhapit, ban di kulat Emitay; ban ya kulhaw sîmanjum, be keetubi kugawi êmanjum yakeel ebaŋen di yata añaaŋenaaw ata kûboñaku kata Emitay, aaneyim Jonas. 40 Mata non ma Jonas alakom di harahu hata ewolay kukaku kûhaaji, moomu poop kaŋ ma mbi Añool Ajamaat alako di etaamay kukaku kûhaaji. 41 Be na mbi hukahu hata batalenabu hûriiŋ, bukanaku kata Ninivi mbi keen bukanaku kata jaat kubaje kûbajumiñ, mata ma buko kuwatatenoorom mata kûbajumiñaku katayiil na kujammi elobay yata Emitay ya Jonas alobiim. Moo, anaw oome ute ahammi Jonas. 42 Di hukahu poop hata batalenabu, añakanaw agam âyyaw ata êsukay yata Saaba, mbi aan bukanaku kata jaat kubaje kûbajumiñ, mata oo di êsukay yâraagiyaay nâcaalhumulom ma nki ajam mata majaalhaamu mata Salomoŋ. Moo, anaw oome ahammi Salomoŋ.”
Amal ya âcaalh di an, ban nâlaañul
43 “Na mbi amalaw âcaalh di anaw a âjupom, mbi ya areesoor tiŋatu tawaynoorum ma ya apaam taata mbi ahepulen; 44 be abajut jaa, nâanul: ‘Ukob ma ilaañ be yaŋom ta îcaalhumulom.’ Be na mbi âriiŋ, atoo'yo an bâlee'dô, yoo ma ewumenim, ban wahaw peh wândom ma uboolhim jak, 45 mbi akay ki âŋarul kumalaku kârimmi hutok di egaba kahaŋoom males, ban di kukay ki kûjupo anaw umu. Ña hûbanumahu hata eroŋay yata anaw umu, mbi ehaŋ mâanoyikoor yata bûtiyaar. Moo, mo ma mbi ga di bukanaku kalesaaku kata jaat.”
Iñaaw Jesus di kutiyool
46 Na Jesus ya aloom di êsukay, iñaawool, koo di kutiyool di kûriiŋul di kujuum tîyaŋ ma kûkimmi kulob d'oo. 47 Ña anaw naanool: “Jijaa, iñaayi umma tîyaŋ koo di kutiyi, kûkine ma jilob.” 48 Be Jesus naan anaw umu aŋallom kûboñaku: “Aymoom agam iñaawom? Aymoomii kagam kutiyom?” 49 Ban nañuur kaŋenaku kurebooraaku katawool, ban nâanul: “Buke kugam iñaawom, di kutiyom. 50 Mata anaw agawem non ma Ampawom ammi hatiya âkimmi, oo agam atiyom, di âliinom, di poop iñaawom.”