Jesus nawul buyooŋabu bata bukanaku kuri joon
8
Huk haahu, buyooŋabu bata bukanaku di kulaañ joon ki bûmeboor to. Be ma kubajutum miñ mata huri, Jesus nâwool kurebooraaku katawool ma aaniil: 2 “Înje niñankiite êsuka'uye, mata gawe ban kukaku kûhaaji na kemmi ute d'înje babajut miñ kuri. 3 Mo, eenii'jaa keet be sanŋiil bariit, mbi kulaapo di buruŋabu, mata kaaku bûraagiye ba kûcaalhumulom.”4 Kurebooraaku katawool di keenool: “Ma oomaam ute tawaynoorum ume, ûtey ta an mbi âbajumul miñ mata huri bi êsuka'uye eri?” 5 Be Jesus narinkiil aaniil: “Kama kûmburuwaaku keemo bu jeekum?” Di keenool: “Kûmburuwaaku hutok di kugaba nookum.”
6 Ña Jesus naan êsukay kuleeho di mahosamu, ban nasoh kûmburuwaa'uku hutokay di kugaba, ban nasal Emitay. Ban natijer ko awul kurebooraaku katawool ma kûgiiter ko êsukay. 7 Di poop muwolamu minŋet ma kubaatom. Jesus nasal Emitay, ban nawuu'mo joon kurebooraaku katawool kûgiiter êsukay. 8 Êsukay peh di etokoñ poopii di epooñ. Ña kurebooraaku katawool, di kûŋarul bâmonkabu baŋañunom di kumeeŋen sîkutasu seemo hutok di sigaba. 9 Bukanaku katokonnom kûmburuwaa'uku di muwola'umu, keeliye kûriiŋ sînjunnaasu sibakiir. Ban Jesus naga êsukay yeet. 10 Naga ban, nâjupo di busaanaabu di kurebooraaku katawool, ma akay be di bantaabu bata êsukay yaaneyim Dalmanuta.
Phârisewwi di kulhaw Jesus ma aga miñ mata sembaasu sata Emitay kujuk
11 Ña bukan kaaku kata di kaasaaku kata phârisewwi, di kûkayil ki ya kulaso Jesus ma kûkin kûhopool ma keenool aga miñ mata sembaasu sata Emitay, ma mbi kûmir kaan sembaasu satawool ya sîkaymul di Emitay. 12 Be Jesus nayiih ham, ban naaniil: “Mata wa ma bukanaku kata jaat, kugawem di kulhaw miñ mata sembaasu sata Emitay? Ma ilobuul malhegen eenuul, miñ mata sembaasu sata Emitay meetubi mugayi be bata bukana'uke!” 13 Ña Jesus nawalhii'to, ma âjupo di busaanaabu ma alaañ be kareb kaaku kata hulhuwahu.
Jesus nalob mata phârisewwi koo di Erodis
14 Kurebooraaku kata Jesus na kugam koku di busaanaabu, di kûwuken kâŋarul kûmburuwaaku, ma kûkayetum hanor. 15 Jesus ya alob di buko aaniil: “Jijaa, jijaamo phermentua yata phârisewwi di yata Erodis.”
16 Ña kurebooraaku katawool ya kulob kêenul: “Ma ookutaam kûmburuwa moo ma âlobumem di umu.” 17 Be Jesus nanamulen maama ya kuloom, ña narinkiil aaniil: “Kama mata wa ma jîlobumem mata kûmburuwaaku ka jiŋallootum? Kama mata wa ma jînamulenaaliyeriitum? Be maame kûkuwaku katawuul kuroŋ ma kûnaatum? 18 Kama miwuul jibaj kûkilaku ban jîjukoriit? Di jibaj ûjaŋayaw ban jîjamoriit? Kama jiwolhowut 19 mata kûmburuwaaku hutokay ka igiiterum bukanaku kârimmi sînjunnaasu hutok, sîkutasu seemo bu, sa jiŋallom samemmi bâmonkabu baŋañunom?” Di keenool: “Seemo kunŋen di sigaba!” 20 Jesus naaniil joon: “Kama na îgiiterum kûmburuwaaku hutokay di kugaba be bata bukanaku kârimmi sînjunnaasu sibakiir, sîkutasu seemo bu jimeŋellom sata bâmonkabu baŋañunom?” Di keenool: “Seemo hutok di sigaba.” 21 Ña Jesus naaniil: “Moo, be maame jinamulenorut kaŋ?”
Jesus nabuunen âynaaw âpuumum
22 Na kugam kûriiŋe di êsukay yaaneyim Betsayda, bukan kaaku di kûŋarul âynaaw âpuumaaw, kûriiŋ di kulhaw Jesus ma agorool. 23 Ña Jesus nasoh kaŋenaku kata âynaaw umu ma âcaalh d'oo di hankahu. Âriiŋ nacuh, ban naŋar kucuha'uku asaas di kûkilaku kata âynaaw umu, ban naŋar kaŋenaku alaken d'oo, ban narinkool aanool: “Aw ma ajukem?” 24 Âynaaw umu nâgawul hâat, ban naanool: “Nijuke, be ijuk bukanaku, di kunaamorom non ununukenaw ureesem.” 25 Jesus naga joon kaŋenaku di kûkilaku katawool. Ña âynaaw umu nâju jak, miñ kaŋ peh nâjuu'mo jak. 26 Ban Jesus nagawool aat, ban naanool: “Aatuba unebej di êsukay.”
Pedru nalob mata Jesus
27 Ban Jesus di kukay di kurebooraaku katawool be di mûsukamu mammi ñata di êsukay yaaneyim Sesareya yata Philiipi. Na kugam koku di buruŋabu, narinkiil aaniil: “Kama êsukay ya kêenul înje aymoom?” 28 Di kulaañenool keenool: “Bukan kaaku ya kêenul aw Joŋ Batista; kaaku di kêenul aw Êliyas; kaaku di kêenul aw ata di buñaaŋenaabu bata kûboñaku kata Emitay.” 29 Narinkiil joon aaniil: “Kama miwuul, ya jêenul înje aymoom?” Pedru naanool: “Aw Kristu.” 30 Ña Jesus, nawaŋiil aaniil aatuba mbi kuloburer mo an akeel.
Jesus nalob mata eketay yatawool
31 Ña Jesus yalhikiten kurebooraaku katawool ma aaniil: “Malhegen Añool Ajamaat mbi âlaam lhînŋa. Yahaanay yata jûdewwi, di yahaanay yata bulhikitenaabu bata kûboñaku kata Emitay di yahaanay yata bulhikitenaabu bata kûboñaku kata Emitay, mbi kulatool, ban di kubujool, be di hukahu hûhaajutahu, mbi âlhaalowul di kuketaaku.” 32 Jesus nalobii'mo salh. Be Pedru nâwoolool buko egaba ban nawaŋool. 33 Be Jesus nâtiiwowul ma ajooŋoor di kurebooraaku katawool, ban nâlhus Pedru ma aanool: “Ulambo Esatanaaye! Aw ûnongoororiit non ma Emitay enongem, be ya unong non ejamaatay.”
Gîitiye ma uga arebooraaw ata Jesus
34 Ban Jesus nâwoolul buyooŋabu bata bukanaku di poop kurebooraaku katawool ma aaniil: “Aw jâkimmi uga arebooraaw ûmbaam, mbi ulatooro para, ban nuraaj êkrusay yatawool ma asoolhellom. 35 Mata an âanul jaa ahikulooro, mbi âjim, be an âbuunooro jaa mata înje, di poop mata Elobay Yâsuumaay yata Emitay mbi apak. 36 Ña wa uhaŋ majak ma an abaj wah peh wata di etaamay ban yâarooray yatawool di êjimeni? 37 Miñ bu an aalim awul âtinoorum yâarooray yatawool? 38 Mata ute di etaama'uye yamemmi kûbajumiñ, an apuñuwom jaa, ban napuño poop elobay yûmbaam, Añool Ajamaat poop, mbi apuñeniil na mbi âkayil di majaaŋaamu mata ampawool di mata kumalaakaku kanapaaku.”