Bukanaku di kulhaw Jesus êmanjumay yata hatiya di emitay
16
Be phârisewwi, di poop sadusewwi kaaku, di kûkin kûhop Jesus. Ña di kukay ki kûhugool ma keenool âyisiil êmanjum yakeel yata hatiya di emitay. 2 Be Jesus naaniil: “Miwuul ya jiga na mbi tihep uwiiñaw ûyem, di jêenul emitay eetubi êlubul; 3 be na mbi ga bûjomaru, uwiiñaw umuucen, di jêenul emitay mbi êlubul. Miwuul hatiya di emitay jigawem jijiker, di jinamulen mata kalubaku; moo bu jigawe ma jinamulent mata sîmanjumasu sata hatiya di emitay? 4 Bukanaku kata jaat kujakut, ban kûynent Emitay. Ban ya kûkin ma îyisiil êmanjum yakeel yata hatiya di emitay. Be eetubi îyisiil êmanjum yakeel, be mbi îyisiil keb yata Jonas.” Ban nawalhii'to ma akay.Phermentu yata phârisewwi, di Sadusewwi
5 Na kurebooraaku kata Jesus kûtipum be kareb kaaku kata hulhuwahu, di kûwuken kakay di kûmburuwaaku. 6 Ña Jesus naaniil: “Jijaamo phermentu yata phârisewwi di sadusewwi.” 7 Ña kurebooraaku katawool, ya kulob ma ya kêenul: “Ma uŋallootaam kûmburuwaaku mo ma âlobumem di umu.” 8 Be na Jesus ajamiim ma ya kuloom umu, ña narinkiil aaniil: “Kama mata wa ma jilobumem mata kûmburuwaaku ka jiŋallootum? Miwuul bukanaku kaakutum kâynen. 9 Kama jînamulenoriit? Jiwolhowut poop kûmburuwaaku hutokay, kâgiiterim bukanaku kârimmi Sînjunnaasu hutok (5.000)? Kama sîkutasu seemom bu sa jimeeŋemmi sata kaaku kaŋañom? 10 Jiwolhowut poop kaaku kagam hutok di kugaba, kâgiiterim bukanaku kârimmi sînjunnaasu sibakiir (4.000)? Ban poop sîkutasu seemom bu sa jimeeŋemmi sata kaaku kaŋañom? 11 Kama miwuul jinamulent kaan ilee'nilobuul mata kûmburuwaaku? Be eenuul, jijaamo mata phermentu yata phârisewwi, di sadusewwi.” 12 Ña kurebooraaku katawool, nkit di kunamulen kaan antiil kujaamo phermentu yata kûmburuwaaku, be omalobem mata balhikitenerabu bata phârisewwi, di sadusewwi.
Pedru nasalhen mata Jesus
13 Ban Jesus nakay be di bantaabu bata Sesareya yata Philiipi. Na kûrimbom, narinkiil aaniil: “Kama êsukay ya kêenul Añool Ajamaat oo aymoom?” 14 Di keenool: “Bukan kaaku ya kêenul aw Joŋ Batista; bukaaku di kêenul aw Êliyas; kaaku di kêenul aw Jeremiyas, be mante anaw aahu ata di buñaaŋenaabu bata kûboñaku kata Emitay.” 15 Be Jesus naaniil joon: “Moo, miwuul ya jêenul înje aymoom?” 16 Ña Simoŋ Pedru naanool: “Aw Kristu, aamom Añool Emitay yaroŋaay.” 17 Ña Jesus naanool: “Simoŋ, añool Jonas, aw nubaje hûpiira, mata ntuwa ajamaat âyisim wahaw uwe, be Ampawom ammi hatiya, âyisiwom. 18 Malhegen aw Pedrua neeni, di huwaalisa'uhe mbi ijuumen grîsiya yûmbaam; be eketay eetubi ehaaturer yo. 19 Înje mbi iwuli ekulhulumay yata kâyyaku kata hatiya di emitay, moo wahaw peh wa mbi ukok ute di etaamay, mbi ukoki poop hatiya di emitay; wahaw poop wa uhelhum ube di etaamay, mbi uhelhi poop hatiya di emitay.” 20 Ban naan kurebooraaku katawool, keetubi mbi keen an oo Kristu.
Jesus nalob mata eketay yatawool
21 Ña ban nownu, Jesus ya alob salh kurebooraaku katawool mata eketay yatawool ma aaniil: “Înje jake ma ikay be Jerusaleŋ, ma nki îriiŋ yahaanay yata jûdewwi, di bumaaŋenaabu bata Emitay, di poop bulhikitenaabu bata kûboñaku kata yo, di kulesom lhînŋa, ban di kubujom, be ban mbi ilhaalelli di kuketaaku di hukahu hûhaajutahu.” 22 Ña Pedru nâwoolool buko diyooniil, ban nawaŋool ma aanool: “Ata Emit, uñankiitooro; wahaw wa ulobem di wo, mumulet bi uga!” 23 Be Jesus nâtiiwowul ma aan Pedru: “Esatanaaye, ûrangiyom! Aw magawem d'înje ma etuba iga wahaw wa Emitay êkimmi, mata ulee'ma unongem non ma Emitay enongem, be aw manongem non ma ejamaatay enongem.”
Anoowan mbi araaj êkrusay yatawool
24 Ban naan kurebooraaku katawool: “Anaw âkin jaa aga arebooraaw ûmbaam, mbi alatooro ma apeeno êkrusay yatawool, ban nasoolhellom. 25 Mata anaw âkimmi apakenooro, mbi anep, be anaw âkintum apakenooro mata înje, mbi apak. 26 Kama hûpiira bu hento, an babajer wahaw peh wata etaama'uye, ban nâbuur yâarooray yatawool? Wa an aalim ancaam ma amellhen yâarooray yatawool? 27 Malhegen Añool Ajamaat, mbi âkayil di majaaŋaamu mata Ampawool, di kumalaakaku katawool, ma mbi âriiŋul nancaam anoowan wahaw wa agam. 28 Ma ilobuul malhegen eenuul, bukan kaaku kata di miwuul kammi ute, keetubi kuket be na mbi kujuk Añool Ajamaat oo ma âkayewuum di Kâyyaku katawool.”