Jesus koo di Moyses di Êliyas
17
Ban na kukaku hutok di hanor kugam kubawe, Jesus naŋar Pedru, di Tiyaagu, be di atiyool Joŋ, ma kuŋool di hurimbiliŋahu hâraagim. 2 Na kûrindom, haanaahu hata Jesus di hutiinoor. Ña buulabu batawool di buga jaŋaŋaŋ non jaley, wañaw watawool di ûtumpaay non majaaŋa mata ehikitenum. 3 Ña Moyses, koo di Êliyas, di kûgawuu'to weh ma ya kûcuuk d'oo. 4 Ña Pedru naan Jesus: “Ata Emit, Jake ma ulakuwaal ute. Ôonul jaa aawo, niga ûngungaw ûhaaji: baabu batayi, baabu bata Moyses, baabu bata Êliyas.” 5 Be Pedru oo baroŋ ma alobem, kawiiñaku kagam jaŋaŋaŋ di kûkayil ki kugaayeniil. Di kawiiña'uku, hurimahu hata anaw di hûlobumuu'dô hêenul: “Ume añoolom a iboolaatum noon, agawewommi îririgen. Mbi ya jijam d'oo.” 6 Na kurebooraa'uku katawool kujammi hurima'uhu, ña di kûkoli ma kuya wuulaw watayiil di etaam. 7 Be Jesus nakay be to kemmi âriiŋ nagoriil ma aaniil: “Jilhaalo, aatuba jîkoli.” 8 Be na kugalom lhâar, di kujuu'to keb Jesus.9 Na kugam kôkawaluwewuum di hurimbiliŋa'uhu, Jesus naaniil: “Aatuba mbi jiloo'mo an akeel wahaw wa jijukulom ii be na mbi Añool Ajamaat alhaalelli di kuketaaku.” 10 Ña kurebooraaku katawool di kurinkool keenool: “Kama mata wa ma bulhikitenaabu bata kûboñaku kata Emitay, kêenumem Êliyas mbi asing âkayil?” 11 Ña naaniil: “Malhegen Êliyas oo mbi âkayil ma acookoorlanken wahaw peh. 12 Be neenuul, Êliyas nakaylo ban, be kumanjutool ma kûgawikoorool non ma kûkimmi. Moomu poop kaŋ ma mbi kuga Añool Ajamaat.” 13 Ña kurebooraaku katawool, di kunamulen kaan omalobem mata Joŋ Batista.
Jesus nabuunen aŋilaw
14 Na kugam kûriiŋe ta buyooŋabu bata bukanaku bemmi, âynaaw aahu nâkayil ki atoo'to Jesus, âriiŋ nâtiigen ma aanool: 15 “Ata Emit, uñankiit; añoolom ya alo kagekaku lhînŋa, omu ma âlaamum noon, mata haahu nalo di sambunasu, haahu nalo di mumelamu! 16 Momakiimom ma iŋarumuloom be baabu kurebooraaku katayi ma kubuunenool, be kuyetoorut.” 17 Ña Jesus naan kurebooraaku katawool: “Miwuul bukanaku kalesaaku, kâynendiitum! Kama mbi ilako ute di miwuul be ûney? Mbi imunten di miwuul be ûney? Jiŋallommool be ute.” 18 Ña na kuŋalloom, Jesus nâlhus amalaw umu âjupuwoom, ña nâcaalh d'oo, ma aŋilaw âju no.
19 Ban kurebooraaku kata Jesus di kûwollool ma kuwaynoor ma kurinkool keenool: “Kama mata wa ma ûli ûyetoorutummi di amalaw umu?” 20 Ña Jesus naaniil: “Mata ma kâynenaku katawuul kuyejutum. Be ma ilobuul malhegen eenuul, palimo kâynenaku katawuul kûtiitiye non jikool jata mustarda, jeeliye jeen hurimbiliŋa'uhe: ‘Uroocooro ute ma ukay be unta’, di huga mo. Mata makeel mulet ma jeeliitum bi jiga. 21 Be kumalaku non uku, ya kûcaalheni keb di kalhawaku kata Emitay, di bawoorabu.”
Jesus nalob joon mata eketay yatawool
22 Huk haahu kurebooraaku katawool ma kûmeboorum tiŋ tanor Gâlileeya, ña Jesus naaniil: “Añool Ajamaat mbi aŋari awuli bukanaku. 23 Be bukana'uku mbi kubujool, be di hukahu hûhaajutahu, mbi alhaalelli di kuketaaku.” Ña kurebooraaku katawool, di kuga ñânkiiteni.
Buyuupabu bata di Eluupay yata Emitay
Mar 9:30-32; Luk 9:43b-45
24 Ban na kugam kûriiŋe di êsukay yata Kâpharnawuŋ, buyabaabu bata buyuupabu, di kurink Pedru keenool: “Kama mata wa ma annahaanaw atawuul âyuupumoriitum buyuupabu bata di eluupay yata Emitay?” 25 Be Pedru naaniil: “Ya ayuup.” Na Pedru anebeem di eluupay, Jesus nasing arinkool aanool: “Simoŋ, bu nunongum? Kama kîyyaku kata etaamay, di yaymoom kuyabem bancaamabu bata buyuupabu? Mante di bukanaku kâwoodom, be mante di emaasooraay?” 26 Be Pedru naanool: “Ya kuyaa'bo di emaasooraay.” Ña Jesus naanool: “Ña kama bukanaku kâwoodom, kûlee'dô di buyuupabu. 27 Be îkint ma mbi kêenul nulaahaaliil; ukay be di hulhuwahu ma nki ubuut, be ewolay êtiyaaray ya mbi ûsohul, nûŋaaŋul butumabu bata yo, mbi ujuu'dô empeesaay yata praata; ña nuŋaa'yo ma nki uyuupaal.”