Anaw a mbi aga annahaanaw
18
Nownu, kurebooraaku kata Jesus, di kukay ki kûhugool ma kurinkool keenool: “Aymoom agam annahaanaw di Kâyyaku kata hatiya di emitay?” 2 Ña Jesus nâwoolul aŋilaw ma ajuumenool tutaru tatayiil, 3 ban naaniil: “Ma iñaaŋenuul malhegen eenuul, jiwalent jaa bagawerabu batawuul ma jilaañ jiga non aŋilaw ume, jeetubi jileeŋowurer di Kâyyaku kata di hatiya emitay. 4 Mata anaw arembeeloorom ma aga non aŋilaw ume, oo mbi aga annahaanaw di Kâyyaku kata hatiya di emitay. 5 Mata anaw ajegum aŋilaw non ume mata kañaaŋaku kûmbaam, înje najegum. 6 Be anaw a mbi aga aŋilaw ata di buke kâynenommi alo di kûbajumiñaku, haŋ majak ma akoki huwaaliisahu hâamak di elhekejay, ban na araaci di hulhuwahu ma âmee'dô.Makojaamu mata kûbajumiñaku
7 “Awo, bukanaku kammi di etaamay, buhiiraabu bâamak mbi busohiil, hurim wahaw wagawem ma bukanaku kulo di kûbajumiñaku. Malhegen wahaw uwu manooman mbi uga, be buhiiraabu bâamak mbi busoh anaw a mbi aga bukan kaaku kulo di kûbajumiñaku. 8 Momakiimom ga jaa non kaŋenaku katayi, be mante kâkandumaku katayi, mbi kugawi ulo di hûbajumiñ, utii'ko ban nubee'ko râagi; mata haŋ majak ma uleeŋo di eroŋay yâbaworiitaay aw di kaŋen kanor, mante di kâkandum kanor, ma aatuba mbi uraaci di sambun sâbaworiit aw tuumayi. 9 Ga jaa non ñîkilañu ñatayi mbi ñigawi ulo di kûbajumiñaku, nûkooluu'ño ubet; mata haŋ majak ma uleeŋo be di eroŋay yâbaworiitaay aw di kankooñaku, ka mbi uraaci di sambun sâbaworiit aw too di kûkilaku pooko.
Êgaraniinaay yanepum
10 “Moo jijaamo, aatuba jikaalen buke kagam kinŋet; mata ma ilobuul eenuul, kumalaakaku katayiil ya kujuk nanoonan buulabu bata Ampawom ammi hatiya. 11 Mata Añool Ajamaat, oo akaylom bi apaken bukanaku kanepum.
12 “Ban Jesus naaniil joon: Bu jinongum? Kama an abaa'jaa sîgaraniinaasu êteemeer, ban yanor di enep d'oo, aatuba awaa'bo pîya usu saamom bukanaku ebakiir di kunŋen di hutok di sibakiir, ma akay âpaamul uyu yanepum? 13 Na mbi ajuu'yo, malhegen mbi âririgen mata yo, haŋ usu saneputum saamom bukanaku ebakiir di kunŋen di hutok di sibakiir. 14 Moomu poop kaŋ ma Ampawuul ammi hatiya di emitay âkintum ma an akeel ata di buke kinŋetaaku anep.
Bu noolim uga an abaam kûbajumiñ d'aw
15 “Moo, atiyi abaa'jaa hûbajumiñahu d'aw, haŋ majak ma ukay ki ulob d'oo miwuul egaba, aani jaa nukooŋe, ña nuhikule atiyi. 16 Be aani jaa see, nûwoolul an anor, be mante bukanaku egaba, ma kujuumuul ma kujam maama mbi jilob, ma mbi ga non ma Baŋiicerabu Bâñoyyaabu buloom kaan: ‘Elob peh ya âyneni, na mbi bukanaku egaba, mante êhaaji kusallhen ma kêenul malhegen.’ 17 Be alat jaa kaani nukooŋe, nuñaaŋen mo grîsiya; alat jaa poop kaan grîsiya ekooŋe, ña nusohawool non an agawut âynena, non poop non ayaba ata buyuupabu.
18 “Ma ilobuul malhegen eenuul, wahaw peh wa jikokum ube di etaam, mbi ukoki poop hatiya di emitay; wahaw poop peh wa jihelhum ube di etaam, mbi uhelhi poop hatiya di emitay. 19 Ma ilobuul malhegen eenuul poop, bukan egaba kata di miwuul, kujamoor jaa ma kulhaw Ampawom wah wakeel, mbi awulii'wo. 20 Mata ta bukan egaba, mante êhaaji kûmeboorum ma kûwool kañaaŋaku kûmbaam, înje mbi itutuwiil.”
Ñeemo bu noolim ubonket atiyi
21 Ña Pedru nakay ki âhug Jesus ma naanool: “Ata Emit, ñeemo bu neelim ibonket atiyom abaam kûbajumiñ d'înje? Be hutok di ñagaba?” 22 Be Jesus naanool: “Ntuwa ñeemo hutok di ñagaba, be mbi ubonketool ñeemo hutok di ñagaba ii be na mbi utooken bukanaku êhaaji di kunŋen (70).
23 “Momakiimom, kâyyaku kata hata di emitay, koo kugam poop non âyyaw âkimmi ma âmir maama bugorooraabu batawool kûgoroorummi bancaamabu batawool. 24 Na kugam kokapinem, ña di kuŋallool âynaaw aahu ayaareroom bancaamabu bârimmi similiyoŋ bata praata. 25 Be ma abajutum maama mbi aga ma ancaamool, ña annahaanaw atawool naaniil kunoom âynaaw umu, di apañoorool, di kuñoolool, di poop wahaw peh watawool, ma mbi aali ancaam eyaarera'uyu. 26 Ña âynaaw umu nâtiigen kayooŋ annahaanaw atawool ma aanool: Annahaanaw, uñankiitom, mbi incaami kaŋ peh maama iyaarerim. 27 Ña na annahaanaw atawool ajuum ma âynaaw umu akaawooroom, ña nañankiit ma awalhoo'bo eyaarera'uyu.
28 “Be na âynaaw umu âcallhom, di kupam di âynaaw aahu ayaareroom êteemeer yata praata, ña nasohool ban nakuucool ma aanool: ‘Uncaamom bancaamabu ba uyaarerommi.’ 29 Ña âynaaw umu nâtiigen di ûkandumaw watawool ma aanool: ‘Atii uñankiitom, mbi incaami bancaamabu peh ba iyaarerim.’ 30 Be nalat kabonketool, ma aŋarool ki akullh di ekullhay be kaŋ na mbi ancaamool eyaarera'uyu. 31 Ña na kûynaaku kaaku kujuum maama âynaaw umu agam apaalool, sûumutiil, ña di kukay ki kuñaaŋen mo annahaanaw atayiil. 32 Ña annahaanaw atawool nâwollool, na ârillom naanool: ‘Aw agorooraaw âlhapitaaw, inja aw ulhawommi nibonketi siyaarerasu satayi; 33 moo, aw poop ooliit ubonket apaali ayaarerim, non ma înje ibonketim?’ 34 Ña annahaanaw umu ma abirikum d'oo, ña naŋarool ki awul bukanaku kânagulem bukan, ma kulesool ii be na mbi ancaam eyaareray uyu pooyo. 35 Moomu poop kaŋ ma Ampawom ammi hatiya, mbi iga anoowan ata di miwuul abonketutum di malhegen atiyool.”