Êgaraniinaay yanepum
15
Haahu, Jesus oo ma alhikitenem di bukanaku. Buyabaabu bata buyuupabu koo di sîkusumasu ya kukay ki kutallhen Jesus. 2 Kaaku kata di phârisewwi koo di bulhikitenaabu bata kûboñaku kata Emitay di kujikerool, ma ya kûŋuŋunoor to, ma kêenul: “Âynaaw ume poop, naane bukana'uke kagam sîkusumasu ko ka mbi ajam di buko, ya ari poop di buko.”3 Jesus nañaaŋeniil kaliikuma'uke: 4 “Miwuul, kama nokoorum non, anaw abaa'jaa sîgaraniinaasu êteemeer, be yanor di enep, aatuba awaa'bo usu ta sihenem, ma akay ka âpaamuu'yo be na mbi ajuu'yo? Mbi awaa'bo kaŋ usu ma nki âpaamul uyu kaŋ poopii be na mbi ajuu'yo. 5 Ajuu'yo jaa, nâririgen ma âraaju'yo, 6 âriiŋ di eluupay, naan kutiyool be di bukaaku ka kukinoorum: Kutiyaay, jeenenom ma ûririgenaal. Mata êgaraniinaay yanepulom yooye, nijuu'yo! 7 Ma iñaaŋenuul kaan moomu poop kaŋ ma Emitay egawem be bata anaw abaam kûbajumiñaku awatatenoorom, ega kâlundaayaku karem kaŋ noon hatiya di emitay, ma ewaa'bo buku kantom, kâkintum ma kuwatatenooro.
Anabawo anepum
8 “Di ga poop kama añakanaw nabaj êteemeray. Ban ña anabawo nâlowul. Ma alolom di etaam, mbi ahikiten ma apaamool. Ajukutoo'jaa, mbi awumen eluupay metetet. 9 Ban, na mbi ajuk anabawo umu, naan kutiyool di bukaaku ka kumooroorum: ‘Kutiyaay, jeenenom ma îririgen. Anabawo anepum d'înje, nijukool’. 10 Ma iñaaŋenuul di kaan, mooma kumalaakaku kata Emitay kubajem hûririgenahu be bata anaw arembelaayaw anoraw a awatatenoorom.”
Aŋilaw Anepum
11 Jesus najaŋen, ma nâanul: “Haahu, âynaaw abaam kuŋilaku egaba. 12 Be huk haahu, aahu agam âbeesumaw, naanool: ‘Ampoom, uwulom bûgiitom, ba mbi kajom ulet jaa, înje niŋar.’ Ampawool nâgiiteriil wahaw kaŋ poowo ma kurewen. 13 Piyowut poop, ampa umu nakay be êsukay yâraagim. Âriiŋ bo, wahaw wa ampawool awuloom, nakajen wo kaŋ poowo di eroŋay yajakutaay yata di sîkusumasu. 14 Nagam nakajene wahaw poowo, ña êsuka'uyu bacaarabu di bûlowumiil, oo ma aakutum ban wah wakeel. 15 Ña nakay ka agoroor di kaŋenaku kata âynaaw ata êsuka'uyu. Âynaaw umu nâboñool ma ya acookoor sikumbaasu satawool. 16 Oo kaŋ utu nâkinene apooñulankenum di mumposamu mata sikumbaasu. Be an akeel alet a mbi awuloo'mo.
17 “Utu, najiker poopii, nanongoor di hûkowahu hatawool, nâanul: ‘Bugorooraabu bata ampoom kamemmi umu di kuri, di kukaten, be injume ma iketem di bacaarabu. 18 Mbi ilhaalo keen ampoom: Nibaje kûbajumiñ di Emitay, be d'aw poop. 19 Înje mumulet bi ûwoolom maame añooli. Ña ugawom non bugorooraabu batayi.’ 20 Ña naga ban, nalhaalo ma akay be baabu di ampawool. Na ampawool aŋandeloom, nañankiitool, natey ka alhomool, nâpoonool. 21 Añoolool naanool: ‘Ampoom, nibaje kûbajumiñ di Emitay, be d'aw poop. Înje mumulet bi ûwoolom maame añooli.’ 22 Ampawool naan bugorooraabu: ‘Jikay caba, ki jiŋallool wañaw wahammi majak, ma alhiimo. Jigawool ekopay ban, di jikatabenool. 23 Ban, di jîŋarul yîntay yahammi mâlag ma jiŋaal yo. Ma uriyaal, ma ûririgenaal, 24 mata aŋila'ume ûmbaam akeem, naroŋulo, anepemmi, be naraŋulo.’ Ña utu di kûcuk kâlundaayaku karem kaŋ noon.
25 “Atiyool araheroom, oo baroŋ bo butat. Nagam oma atewuum ahuutul eluupay, najam kâlundaayaku, êsukay ma emagem. 26 Nâwool aahu ata di bugorooraabu, narinkool: ‘Utu waywoom wa ulhokem di umu?’ 27 Naanool: ‘Neene, atiyi oo ma aatulom, mo ma ampayi aŋaalum yîntay yahammi mâlag, mata najukool oo too ma arommi jak.’ 28 Ña ampa umu araheroom nabirik, âkinut anebejeen poop. Ampawool nâcaalhul, âriiŋ nawaasiyenoorool. 29 Añoolool naanool: ‘Jijaa, înje ujaañaw lhay na igoroorum be baabu d'aw. Be kaŋ wahaw wa bi ulobom, îlatoriit kaga wo. Be kaŋ oonutom poop nakeel, aay jijaameena'uje jooje, îririgenum di kupaalom. 30 Be añooli umu alallom, abeem wahaw watayi peh di sîkusumasu, nubujool yîntay yahammi mâlag.’