Kaliikumaku kata agorooraaw agugujooraaw
16
Ban Jesus nâanul joon kurebooraaku katawool: “Âynaaw asaanumom nabaj agorooraaw agam annahaanaw ata husaanumahu hatawool, di keenool ya akajen husaanumahu hatawool. 2 Âynaaw umu asaanumom nâwoolul agorooraaw ma arinkool aanool: ‘Wah bu uwe wa ijamem di wo matayi? Urejom bu nugoroorem dêeni, mata eetubi iwalhi ma onken ma uga ma uga bugoroora'ubu.’3 “Ña agorooraaw umu nanongoor poopii, nâanul: ‘Bu mbi iga ma ammi mbi âcaalhenom di bugoroorabu? Înje ibajut sembe ma iwañ, nipuñuwe poop ma ikay kalhaw. 4 Be ña nîmire ban maama mbi iga, na mbi iwalen bugoroorabu, kajom bukanaku di kuyaañuwom saŋiil.’ 5 Ña nâwool anor anor di bukanaku kayaarerum annahaanaw atawool. Ban narink aahu âtiyaaraw ma aanool: ‘Butum bu nuyarerum annahaanaw ûmbaam?’ 6 Naanool: ‘Silompasu êteemeer sata mîitamu neekoom.’ Agorooraaw naanool: ‘Ûŋarul kaytaku katayi ban nuleeho cab ma uŋiic dô bukanaku egaba di kunŋen.’ 7 Ban narink joon aahu: ‘Aw butum bu nuyarerum annahaanaw ûmbaam?’ Naanool: ‘Kumbootaaku êteemeer kata emaanaay.’ Agorooraaw naanool: ‘Ûŋarul kaytaku katayi ma uŋiic dô bukanaku ebakiir.’
8 “Ña âynaaw umu asaanumaw nasal agorooraaw atawool agugujoorem mata ma ajaalhom. Mata bukanaku kammi di etaŋa'uye ya kujaalho di wahaw wa kugawem be batayiil, kuhaŋ kaaku kammi di majaaŋaamu. 9 Ma iñaaŋenuul eenuul, jiŋar husaanumahu hata ube di etaamay jîpaamum kupaalayaku, ma mbi hubawo, kupaaluul buku di kuyaañuwuul di hukinahu haatumbi hubawurer. 10 Anaw âynenaayaw di wahaw wagam winŋet, mbi ga mo poop kaŋ di wahaw wagam wâamak. Aahu poop agugujoorum di wahaw winŋet, mbi agugujoor poop di wahaw wagam wâamak. 11 Mata jigawut jaa bukanaku kâynenaayaku di husaanuma'uhe hata di etaama'uye, aymoom mbi âynenuul ma awuluul wahaw hagam hata malhegen? 12 Ga jaa di wahaw wata bukanaku jîynentim, waawu wata hatiya di emitay, ay mbi awuluu'wo?
13 “Mumulet bi anaw arees di uruŋaw ugaba di manor, mata mbi haŋ masoh jak baabu, ma aheleken di baabu. Manooman mbi âynen baabu, narembeel baabu. Mumulet bi jigoroor be bata Emitay, di jigoroor poop be bata husaanumahu hata ube di etaamay.”
14 Ña kûynaaku kaaku kata di kaasaaku kata phârisewwi kâkimmi noon bancaam, na kujammi hurima'uhu ha Jesus aloom, di kurinenool. 15 Jesus naaniil: “Miwumu jâkinem jîyis êsukay kaan miwuul bukanaku kajakaaku, be Emitay êmire ûyegetaw watawuul, mata wahaw wa ajamaataw ammi ujake ma asoo'wo nîririr, wowu ma ûgiipunenim di Emitay.
16 “Kûboñaku kata Emitay, di elobay yata buñaaŋenaabu bata kûboñaku kata yo, ebaano sembe be kaŋ na Joŋ ârillom. Mata kata kaŋ nownu, elobay yâsuumaay yata kâyyaku kata Emitay êcukum elobi, bukanaku poopiil mbi kuga di sembe ma kunebej di kâyyaku kata yo. 17 Haŋ mahil ma hatiya di emitay, di etaamay peh êbuyo, be kûboñaku kata Emitay keetukaŋaso jinŋet.
18 “Ga jaa non, ânniine akeel acahum di apañoorool ma aanool aat ma âyabul aahu, nabaje kûbajumiñ. Be aahu poop ayaa'jaa anñaakanaw umu a apañoorool acahum d'oo, oo poop nabaje kûbajumiñ.”
Âynaaw asaanumom koo di Laasaru
19 Jesus najaŋen ma alhikiteniil aaniil: “Nownu, di êsuk yaayu baje âynaaw asaanumom noon, hukoohuk ya aga bûneŋabu, ya alhiimo wañaw wâyemaaw wajakaaw wata ehulay yagawaay bururur. 20 Too di êsuka'uyu bajeene poop âynaaw aaneyim Laasaru, âsukateenom noon, naga saakasu di eniilay pooyo, ban ya alako âhug di eluupay yata asaanumaw umu. 21 Ya âkineen mâamak ari buŋañenabu bata âynaaw asaanumom; silhokaasu poop ya sîkayil ki simeesen saakasu satawool.
22 “Huk haahu, Laasaru naket, di kuhokool. Na kuhokoom, kumalaakaku kata Emitay di kûkayil bi kuŋarool ki kuga ta Abrawoŋ ammi hatiya di emitay. Âynaaw asaanumom poop naket, di kuhokool. 23 Emitay di eŋarool be tiŋatu tata kuketaaku. Nagam omu di hûlaamahu, nalhag hatiya naŋanden Laasaru koo tiŋ tanor di Abrawoŋ. 24 Nâŋaaŋulo ma âanul Abrawoŋ: Ampoom Abrawoŋ, ubonket oonom Laasaru âyookenul husinkahu ban nâkayil bi ayookenom hûlelempahu, mata ta emmi ume injumu ma îhaahum noon di sambunasu.
25 “Be Abrawoŋ naanool: ‘Âñumooy, uwollho di kaan aw too ma urommi, wahaw poowo wa ûkimmi nujuu'wo, be Laasaru oo di hûsukatenaahu be kaŋ na akeem. Mowme, oo nagayluwe, be aw poop ulako di hûlaamahu. 26 Ban palimo ntuwa moo poop, mumulet bi an âcaalhul ute ma âkayil be ta aw ommi, an poop aaliit âcaalhumul ta aw ommi be ube. Mata baje husunahu hâlahum hammi di tutaru tatoolaal.’ 27 Âynaaw umu naanool joon: ‘Kama magam umu, uboñom Laasaru ma akay be baabu di ampawom, 28 ma nki âlobul di kutiyom koku bo hutok ma keetubi kûkayil be ûde tiŋatu tata hûlaamahu.’
29 “Be Abrawoŋ naanool: ‘Kubaje kaytaku kata kûboñaku kata Moyses, be di wata buñaaŋenaabu bata kûboñaku kata Emitay, ma kujam wo.’ 30 Be naanool joon: ‘Ampoom Abrawoŋ, iyiy, anaw alhaalowulom di kuketaaku, akay jaa ki añaaŋeniil, mbi kuwatatenooro mata kûbajumiñaku katayiil.’ 31 Abrawoŋ naanool: ‘Kûynent jaa elobay yata Moyses, di yata buñaaŋenaabu bata kûboñaku kata Emitay, palimo anaw akeem ban nâlhaalowul akayum ki alob di buko, keetubi kûynen.’ ”