Jesus nabuunen âynaaw di hîyyaayahu hata jûdewwi
14
Haahu di hîyyaayahu hata jûdewwi, Jesus nanebej di eluupay yata annahaanaw ata phârisewwi ma nki kuri. Bukanaku kalakotom ya kulasuwool. 2 Âynaaw a ûkandumaw di uŋenaw ulaawum oo to. 3 Jesus narink phârisewwi di bulhikitenaabu bata kûboñaku kata Emitay: “Kama jakut pîya kabuunen an di hîyyaayahu hata jûdewwi?”4 Be kulaañentool makeel. Ña nasohool ma abuunenool, ban naanool akay. 5 Ban naaniil: “Aymoom di miwuul a mbi embaamay, be mante ebaay yatawool elo di enkoloŋay di hîyyaayahu hata jûdewwi âtukacaalhenuu'yo?” 6 Na arinkiim umu kubajut kulaañenool.
Aatuba jîkoli bukan
7 Ña Jesus ya alaso maama bukanaku kâwoollim be huriyahu kujotem di mo tiŋatu tata kaleehaaku tahammi majak, ña naga kaliikumaku ma añaaŋeniil aaniil: 8 “Na anaw âwoolli be bûneŋabu bata bûyababu yanŋool, aatuba ûriiŋ nujot tiŋatu tata kaleehaaku tahammi majak, mata ûmirut mante anaw aahu omu to ahaŋim mâyanki. 9 Ma aatuba mbi ata bûneŋa'ubu aani: Bila ma uleeho ute, ma uwul ume hûtenka'uhu. Ña mbi upuño na mbi uleeho di hûtenkahu hajakutaahu. 10 Be na mbi anaw âwoolli be yanŋool, aatuba ûriiŋ nuleeho di hûtenkahu hahammi majak. Ma oo mbi âriiŋul naani: Apaalom, ûkayil ma uleeho ute. Ña nubaa'to êriibiinaay di kupaali ka jentom. 11 Mata anaw agawem hûkowahu hatawool non nahaŋe kupaalool, mbi alaañeni be kujeeŋanda. Aahu agawem hûkowahu hatawool non ahaŋut an, mbi agawi kayooŋ.”
12 Nâanul poop umu âwollom bukanaku be bûneŋabu: “Oon jaa ûwoolul bukanaku be bûneŋabu, aatuba ûwoolul kutiyi, di kupaali, di kukinooraaku katayi kasaanumom. Mata buko poop kajom di kûwooli be huriyahu. 13 Be na mbi oon uga kâlundaayaku, nûwoolul kûsukateenaku di kata uyakasaw di kâpuumaaku di kubapuwooraaku. 14 Uga jaa umu, mbi ubaj hûpiira di Emitay, mata buko kubajut wah wa mbi kuncaami. Be Emitay mbi encaami na mbi bukanaku kagawem jak kûlhaalowul di kuketaaku.”
Kaliikumaku kata kâlundaayaku
15 Aahu ata di bukanaku kaleehotom ma ya kuri di Jesus na ajammi waha'uwu, nâanul: “Anaw a mbi âami di huriyahu di kâyyaku kata Emitay, nabaje hûpiira.”
16 Jesus naaniil: “Baje âynaaw abaam kâlundaayaku ban nâwool bukanaku huc. 17 Na tîrimmi ma kâlundaayaku kuga, âynaaw umu naboñ agorooraaw atawool, âriiŋ naaniil: ‘Jîkayil, mata wahaw peh ubandoori ban.’ 18 Be bukana'uku di kêenul keetubi keeli kûkayil. Aahu âtiyaaraw nâanul: ‘Nibaje butondaabu bi inommi, ubonketom, eetubi eeli ikay.’ 19 Agabutaw nâanul: ‘Nibaje sîmuunaasu kunŋen sa inommi, ubonketom eetubi eeli ikay mata ma nki ilaso so maama mbi siwañ dêeni.’ 20 Âhaajutaw poop nâanul: ‘Injumu jakitem niyab, eetubi eeli ikay.’
21 “Ña agorooraaw nâlaañul añaaŋen ata kâlundaayaku maama bukana'uku kulobuloom. Ña ata kâlundaayaku nabirik noon, nâanul agorooraaw: ‘Ukay cab be di kankaku di sîluulasu uŋallom kûsukateenaku di kata uyakasaw, di kubapuwooraaku, be di bûpuumaabu.’ 22 Ban agorooraaw nâanul ata kâlundaaya'uku: ‘Nigawe ban non ma ulobommi, be kûtenkaku kuroŋ ma kukatom.’ 23 Ata kâlundaayaku nâanul agorooraaw: ‘Ukay be di uruŋaw ma nki ûgawul di sembe bukanaku ma kûkayil ma kûtenkaku keeli kûrir. 24 Ma ilobuul kaan bukanaku îwoolom kâtiyaar be kâlundaayaku an anor ata di buko aatuba âami di huriyahu hûmbaam.’ ”
Bu neelim iga arebooraaw ata Jesus?
25 Haahu buyooŋabu bâamak bata bukanaku ma kureboorem di Jesus, najooŋoor di buko, ma aaniil: 26 “Anoowan âkimmi asoolhellom ban nahaŋ ma âkin hûkowahu hatawool di ampawool, di iñaawool, di kuñoolool, di kutiyool, di kûliinool, ahaŋen înje, aaliit aga arebooraaw ûmbaam. 27 An alat jaa karaaj êkrusay yatawool ma asoolhellom, mumulet bi aga arebooraaw ûmbaam.
28 “An ata di miwuul âkin jaa ateep eluupay yâamak, waywoom mbi aga para? Mbi aleeho ma anongoor para ma âmir mante mbi aali ayetoor ma aban yo. 29 Be ajuumen jaa hukalahu hûtiyaarahu, ban abajut makeel ma mbi aban yo, bukanaku peh mbi kurinenool. 30 Ma kêenul: Jijiker âynaaw ume ateepum eluupay be aaliit aban yo.
31 “Kama âyyaw âkin jaa atiik di âyyaw aahu, aatuba aleeho para ma ajiker mante esellooraay yatawool kaamom sînjunnaasu kunŋen, mante mbi aali kutiik di apaalool abaam esellooraay sînjunnaasu anabawo? 32 Be aaliit jaa, apaalool oo baroŋ bo, mbi aboñ ma aanool ña kuga kâsuumaayaku. 33 Moomu poop kaŋ ma anoowan ata di miwuul awalhutubom wahaw peh wabaam, mumulet bi aga arebooraaw ûmbaam.
Musisamu magam balalal